ຂປລ
ທ່ານ ນາງ ລຸສ ອາເບີ(Louise Arbour) ຜູ້ສຳເລັດ ລາດຊະການ ການາດາ ໄດ້ເປັນປະທານພິທີຕ້ອນຮັບ ທ່ານ ໂຕເລິມ ເລຂາທິການໃຫຍ່ ຄະນະບໍລິຫານງານສູນກາງພັກ ກອມມູນິດ ຫວຽດນາມ, ປະທານປະເທດ ຫວຽດນາມ ແລະ ຄະນະຜູ້ແທນຂັ້ນສູງ ຫວຽດນາມ ເນື່ອງໃນໂອກາດໄປຢ້ຽມຢາມ ທາງລັດຖະກິດ ການາດາ ຢ່າງສົມກຽດ.
ຂປລ.ວິທະຍຸ ໂທລະພາບ ສູນກາງຈີນ, ວັນທີ 24 ກັນຍານີ້ ຢູ່ທຳນຽບ ຜູ້ສຳເລັດ ລາດຊະການ ການາດາ ຢູ່ນະຄອນຫລວງ ອອດຕາວາ(Ottawa), ທ່ານ ນາງ ລຸສ ອາເບີ(Louise Arbour) ຜູ້ສຳເລັດ ລາດຊະການ ການາດາ ໄດ້ເປັນປະທານພິທີຕ້ອນຮັບ ທ່ານ ໂຕເລິມ ເລຂາທິການໃຫຍ່ ຄະນະບໍລິຫານງານສູນກາງພັກ ກອມມູນິດ ຫວຽດນາມ, ປະທານປະເທດ ຫວຽດນາມ ແລະ ຄະນະຜູ້ແທນຂັ້ນສູງ ຫວຽດນາມ ເນື່ອງໃນໂອກາດໄປຢ້ຽມຢາມ ທາງລັດຖະກິດ ການາດາ ຢ່າງສົມກຽດ. ກ່າວຄຳເຫັນຕໍ່ວົງການນັກຂ່າວ ພາຍຫລັງ ພິທີການຕ້ອນຮັບ ຢ່າງສົມກຽດ, ທ່ານ ນາງ Louise Arbour ຜູ້ສຳເລັດລາດຊະການ ການາດາ ໄດ້ຢັ້ງຢືນການຢ້ຽມຢາມແມ່ນໂອກາດ ເພື່ອໃຫ້ສອງຝ່າຍພ້ອນກັນຮັບຮູ້ ບັນດາຜົນສຳເລັດທີ່ບັນລຸໄດ້ ແລະ ມຸ່ງໄປເຖິງອະນາຄົດ. ໃນໂລກທີ່ເຕັມໄປດ້ວຍການຜັນແປ ຢ່າງເລິກເຊິ່ງ, ການຮ່ວມມື ຍັງແມ່ນເສັ້ນທາງດີ ທີ່ສຸດເພື່ອໃຫ້ສອງປະເທດ ພ້ອມກັນ ຜ່ານຜ່າບັນດາສິ່ງທ້າທາຍເຊິ່ງ ປະຊາຊົນສອງປະເທດ ພວມຜະເຊີນໜ້າ, ຊຸກຍູ້ຄວາມວັດທະນາຖາວອນ ແລະ ປະກອບສ່ວນ ເຂົ້າໃນຄວາມສະຖຽນລະພາບ ອັນຍາວນານ. ສ່ວນ ທ່ານ ເລຂາທິການໃຫຍ່, ປະທານປະເທດ ໂຕເລິມ ເຊື່ອໝັ້ນວ່າ ການພົວພັນ ຫວຽດນາມ-ການາດາ ຈະກ້າວເຂົ້າສູ່ໄລຍະພັດທະນາໃໝ່, ຍຸດທະສາດກວ່າ, ຮອບດ້ານກວ່າ, ແທ້ຈິງກວ່າ ແລະ ມີປະສິດທິຜົນກ່ວາ.ສຳລັບ ການຢ້ຽມຢາມນີ້ ຈະເປີດພາກໃໝ່ໃນການພົວພັນ ຫວຽດນາມ-ການາດາ, ສ່ອງແສງຄວາມໄວ້ເນື້ອເຊື່ອໃຈ ດ້ານການເມືອງໃນລະດັບສູງໃໝ່, ຄວາມສະໜິດ ຕິດພັນທີ່ນັບມື້ ນັບເລິກເຊິ່ງກ່ຽວກັບ ຜົນປະໂຫຍດ ແລະ ວິໄສທັດ, ກໍ່ຄືຄວາມຕັດສິນໃຈຂອງສອງປະເທດ ພ້ອມກັນສ້າງການພົວພັນ ອັນຍາວນານ, ມີສະຖຽນລະພາບ, ແທ້ຈິງ ແລະ ກາຍເປັນແບບຢ່າງທີ່ດີ ໃນການຮ່ວມມືລະຫວ່າງສອງປະເທດຢູ່ສອງຝັ່ງ ປາຊີຟິກ. ໃນການພົບປະກັນ ພາຍຫລັງ ພິທີຕ້ອນຮັບລະດັບຊາດ, ທ່ານ ນາງ Louise Arbour ຢັ້ງຢືນວ່າ ການາດາ ຖື ສສ ຫວຽດນາມ ແມ່ນຄູ່ຮ່ວມມື ສຳຄັນ ຢູ່ພາກພື້ນ. ການາດາ ພ້ອມແລ້ວ ທີ່ຈະເສີມຂະຫຍາຍ ທ່າແຮງກ່ຽວກັບແຫລ່ງກຳລັງ, ອຸດສາຫະກຳ, ການສຶກສາ, ພະລັງງານ, ກະສິກຳ ແລະ ການເງິນ ເພື່ອເພີ່ມທະວີການຮ່ວມມືກັບ ສສ ຫວຽດນາມ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
