ຂປລ
ທ່ານ ເຮີຢ້າຕົ່ງ ໂຄສົກກະຊວງການຄ້າຈີນ ໄດ້ຕອບຄຳຖາມ ຂອງນັກຂ່າວກ່ຽວກັບ ການເຈລະຈາດ້ານເສດຖະກິດການຄ້າ ຮອບທີ 8 ລະຫວ່າງ ທີມງານເສດຖະກິດການຄ້າຈີນ ແລະ ອາເມລິກາ ຢູ່ນະຄອນນິວຢອກຂອງ ສ.ອາເມລິກາ.
ຂປລ.ວິທະຍຸ ໂທລະພາບ ສູນກາງຈີນ, ໃນກອງປະຊຸມຖະແລ່ງຂ່າວ ທີ່ຈັດໂດຍກະຊວງການຄ້າຈີນ ໃນວັນທີ 24 ກັນຍານີ້, ທ່ານ ເຮີຢ້າຕົ່ງ ໂຄສົກກະຊວງການຄ້າຈີນ ໄດ້ຕອບຄຳຖາມ ຂອງນັກຂ່າວກ່ຽວກັບ ການເຈລະຈາດ້ານເສດຖະກິດການຄ້າ ຮອບທີ 8 ລະຫວ່າງ ທີມງານເສດຖະກິດການຄ້າຈີນ ແລະ ອາເມລິກາ ຢູ່ນະຄອນນິວຢອກຂອງ ສ.ອາເມລິກາ.ທ່ານ ເຮີຢ້າຕົ່ງໃຫ້ຮູ້ວ່າ, ເມື່ອບໍ່ດົນມນີ້, ທີມງານເສດຖະກິດ ການຄ້າຂອງ ສປ ຈີນ ແລະ ສ.ອາເມລິກາ ໄດ້ດຳເນີນການເຈລະຈາ ດ້ານເສດຖະກິດ ການຄ້າ ຮອບທີ 8 ຢູ່ ສ.ອາເມລິກາ. ສອງຝ່າຍຖືເອົາຄວາມຮັບຮູ້ ທີ່ເປັນເອກະພາບກັນອັນສຳຄັນຂອງປະມຸກລັດ ສອງປະເທດ ເປັນທິດນຳ, ປະຕິບັດຕາມຫຼັກການ ເຄົາລົບເຊິ່ງກັນແລະກັນ, ຢູ່ຮ່ວມກັນໂດຍສັນຕິ, ແລະ ການຮ່ວມມືກັນ ແບບຕ່າງຝ່າຍ ຕ່າງໄດ້ຮັບຜົນປະໂຫຍດ, ປິ່ນອ້ອມບັນຫາ ດ້ານເສດຖະກິດ ການຄ້າທີ່ສອງຝ່າຍ ມີຄວາມສົນໃຈຮ່ວມກັນ, ເຊັ່ນ: ຈັດຕັ້ງປະຕິບັດຄວາມຮັບຮູ້ ທີ່ເປັນເອກະພາບກັນ ໃນການເຈລະຈາດ້ານເສດຖະກິດການຄ້າທີ່ມີຢູ່ແລ້ວ, ຈັດວາງມາດຕະການຫລຸດພາສີ ແບບເທົ່າທຽມກັນ, ສ້າງຕັ້ງສະພາການຄ້າ ແລະ ສະພາການລົງທຶນ, ແກ່ຍາວເວລາ ຂໍ້ຕົກລົງຮ່ວມກັນ ສຳລັບ ການເຈລະຈາ ດ້ານເສດຖະກິດການຄ້າ ລະຫວ່າງ ສອງຝ່າຍ ທີ່ຈັດຂຶ້ນຢູ່ນະຄອນຫລວງກົວລາລຳເປີ ຂອງມາເລເຊຍ ແລະ ອື່ນໆ, ໄດ້ດຳເນີນການແລກປ່ຽນ ຄວາມເຫັນຢ່າງກົງໄປກົງມາ ເລິກເຊິ່ງ ແລະ ສ້າງສັນ, ບັນລຸຄວາມເຫັນ ທີ່ເປັນເອກະພາບກັນ ຫລາຍປະການ. ທ່ານ ເຮີລີ້ເຟີ່ງ ຮອງນາຍົກລັດຖະມົນຕີ ແລະ ທ່ານ ສະກອດ ເບສເຊນ ລັດຖະມົນຕີກະຊວງການເງິນ ຂອງ ສ.ອາເມລິກາ ໃນນາມຫົວໜ້າທີມງານ ເຈລະຈາໄດ້ດຳເນີນການສົນທະນາຄັ້ງທຳອິດ ກ່ຽວກັບ ປັນຍາປະດິດ ພາຍໃຕ້ກົນໄກ ການເຈລະຈາ ດ້ານເສດຖະກິດການຄ້າຈີນ-ອາເມລິກາ. ໃນຕໍ່ໜ້າ, ສປ ຈີນ ແລະ ສ.ອາເມລິກາ ຈະຮັກສາການແລກປ່ຽນ ຢ່າງໃກ້ຊິດກ່ຽວກັບ ວຽກງານທີ່ຕາມມາພາຍໃຕ້ກົນໄກດັ່ງກ່າວ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
