ຂປລ. ກົມແລກປ່ຽນ ແລະ ຮ່ວມມືສາກົນ ກະຊວງວັດທະນະທຳ ແລະ ທ່ອງທ່ຽວຈີນ ຈັດກິດຈະກໍາທັດສະນະສຶກສາທີ່ປະເທດຈີນ ຂອງນັກທຸລະກິດການທ່ອງທ່ຽວອາຊີ ພາຍໃຕ້ຫົວຂໍ້ ສະບາຍດີ ປະເທດຈີນ ຂຶ້ນໃນລະຫວ່າງວັນທີ 20-29 ສິງຫາ ຜ່ານມາ, ນໍາພາຄະນະໂດຍ ທ່ານ ນາງ ຫລີຢີ່ຜິງ ຫົວໜ້າສູນວັດທະນະທຳຈີນ ປະຈຳ ສປປ ລາວ, ມີຜູ້ຕາງໜ້ານັກທຸລະກິດ ການທ່ອງທ່ຽວລາວ ຈາກ 3 ພາກສ່ວນເຂົ້າຮ່ວມກິດຈະກໍາຄື: ບໍລິສັດ ລາວນິດຊິນ ທ່ອງທ່ຽວ (Lao Nisshin Travel), ບໍລິສັດ ທ່ອງທ່ຽວ ນີຍົມລາວ ຈໍາກັດ (Ninhomlao Tour)  ແລະ ບໍລິສັດ ທ່ອງທ່ຽວ ເອບີລາວ ຈໍາກັດ (AB Lao Travel).

ກິດຈະກໍາຄັ້ງນີ້, ໄດ້ແບ່ງອອກເປັນ 3 ເສັ້ນທາງຄື: ພາກເໜືອ, ພາກຕາເວັນອອກ ແລະ ພາກໃຕ້ ​ໃນ​ນັ້ນ​, ນັກທຸລະກິດການທ່ອງທ່ຽວລາວ ແມ່ນຮ່ວມກິດຈະກໍາ ການທັດສະນະສຶກສາ ທາງພາກຕາເວັນອອກ ​ໂດຍເລີ່ມເດີນທາງຈາກຊຽງໄຮ້, ມຸ່ງໜ້າສູ່ເຈ່ຍຊີ້ງ, ຫູໂຈ່ວ ແຂວງເຈີ້ຈ່ຽງ, ຈິວຈ່ຽງ ແຂວງຈ່ຽງຊີ, ຫວູຮັ້ນ ແຂວງຫູເປີຍ. ພ້ອມ​ນີ້, ຍັງຈັດກອງປະຊຸມແລກປ່ຽນ 2 ຄັ້ງທີ່ນະຄອນຈິວຈ່ຽງ ແລະ ນະຄອນ ຫວູຮັ້ນ ແລະ ໃນວັນທີ  26 ສິງຫາ ຜ່ານມາ ກໍໄດ້ຈັດກອງປະຊຸມຄົ້ນຄວ້າ ການພັດທະນາການທ່ອງ ທ່ຽວ ຂາເຂົ້າ ທີ່ເມືອງຫລູຊ່ານ ແຂວງຈ່ຽງຊີ.

ທ່ານ ນາງ ເບັນຈະມາດ ພົນຊຽງດີ ອໍານວຍການ ບໍລິສັດ ລາວນິດຊິນ ທ່ອງທ່ຽວ, ຮອງຫົວໜ້າສະມາຄົມການທ່ອງທ່ຽວລາວ ໄດ້ມີ​ຄຳ​ເຫັນ​ໃນ​ກອງ​ປະຊຸມວ່າ: ກິດຈະກໍາທັດສະນະສຶກສາໃນຄັ້ງນີ້, ຮູ້ສຶກປະທັບໃຈຢ່າງຍິ່ງ ຕໍ່ກັບການພັດທະນະນາ ການທ່ອງທ່ຽວຂອງປະເທດຈີນ ໃນປັດຈຸບັນ ແລະ ຄົນລາວກໍມີຄວາມສົນໃຈຫລາຍຕໍ່ ກັບວິຖີຊີວິດ ທີ່ທັນສະໄໝຂອງຄົນຈີນ ​ແລະ ຫວັງຢ່າງຍິ່ງວ່າການ​ມາ​ທັດສະນະ​ສຶກສານີ້, ຈະເປັນໂອກາດໃນການສົ່ງເສີມ ການຂາຍເສັ້ນທາງໃໝ່ໆ ໃຫ້ກັບບໍລິສັດທ່ອງທ່ຽວລາວ ແລະ ເປັນອີກບາດກ້າວໜຶ່ງໃນການພັດທະນາ ການທ່ອງທ່ຽວໃນອະນາຄົດ. ໃນລະຫວ່າງວັນທີ 27-30 ສິງຫາ ນີ້, ນັກທຸລະກິດການທ່ອງທ່ຽວອາຊີ ທັງ 3 ເສັ້ນທາງ ກໍໄດ້ເຕົ້າໂຮມກັນທີ່ນະຄອນຫວູຮັ້ນ ເພື່ອລົງເລິກທັດສະນະສຶກສາ ທິວທັດທໍາມະຊາດ, ຊັບພະຍາກອນທາງປະຫວັດສາດ ແລະ ວັດທະ ນະທໍາ. ຕາງໜ້ານັກທຸລະກິດ ການທ່ອງທ່ຽວລາວ ໄດ້ກ່າວວ່າ: ປະເທດລາວ ແລະ ປະເທດຈີນ ມີລົດ ໄຟເຊື່ອມຈອດກັນ, ເຮັດໃຫ້ໄລຍະທາງລະຫວ່າງ ປະຊາຊົນສອງປະເທດ ໄດ້ໃກ້ຊິດກັນຍິ່ງຂຶ້ນ, ການເດີນທາງມາປະເທດຈີນ ກໍນັບມື້ນັບສະດວກສະບາຍ ງ່າຍຂຶ້ນ. ອີງຕາມການສັງເກດການທ່ອງທ່ຽວຈີນ ເຫັນວ່າ: ປັດຈຸບັນ, ປະເທດຈີນກາຍເປັນຈຸດມຸ່ງໝາຍ ໃນການມາທ່ອງທ່ຽວຂອງນັກທ່ອງທ່ຽວລາວ.    

ໃນໂອກາດດັ່ງກ່າວ,  ຕາງໜ້ານັກທຸລະກິດການທ່ອງທ່ຽວຝ່າຍລາວ ກໍໄດ້ລົງນາມໃນສັນຍາວ່າດ້ວຍ ການຮ່ວມມືຍຸດທະສາດ ກັບຄະນະກໍາມະການຄຸ້ມຄອງ ເຂດທັດສະນີຍະພາບແມ່ນໍ້າຕົ່ງ, ອຳນາດການປົກຄອງເມືອງຫວງພີ ແລະ ກຸ່ມບໍລິສັດ ວັດທະນະທໍາ ແລະ ທ່ອງທ່ຽວຫວູຮັ້ນ. ພ້ອມນີ້, ຍັງໄດ້ຮັບລາງວັນຄູ່ຮ່ວມມືສົ່ງເສີມວັດທະນະທໍາ ແລະ ການທ່ອງທ່ຽວສາກົນຫວູຮັ້ນ ອີກດ້ວຍ.

ທ່ານ ສືເຈີ້ອີ້ (shi ze yi) ຮອງຫົວໜ້າກົມແລກປ່ຽນ ແລະ ຮ່ວມມືສາກົນ ກະຊວງວັດທະ ນະທຳ ແລະ ທ່ອງທ່ຽວຈີນ ສະ​ແດງ​ຄວາມຫວັງຢ່າງຍິ່ງວ່າ ກິດຈະກໍາຄັ້ງນີ້, ຈະເປັນໂອກາດອັນດີ ໃນການສໍາຫລວດຢ່າງເລິກເຊິ່ງ ທາງດ້ານຊັບພະຍາກອນການທ່ອງທ່ຽວທີ່ນະຄອນຫວູຮັ້ນ ແລະ ສະຖານ ທີ່ອື່ນໆ, ຍົກສູງຄຸນນະພາບ ການບໍລິການທາງດ້ານການທ່ອງທ່ຽວ, ສ້າງຜະລິດຕະພັນການທ່ອງທ່ຽວ ແລະ ສ້າງເສັ້ນທາງການທ່ອງທ່ຽວ ທີ່ມີເອກະລັກສະເພາະ ຂອງທ້ອງຖິ່ນໃຫ້ຫລາຍຂຶ້ນ.

ຂ່າວ: ກິດຕາ

KPL