*ການສຳຫລວດພົນລະເມືອງ ແລະ ທີ່ຢູ່ອາໄສໃນ ສປປ ລາວ ທີ່ກຳລັງຈະມາເຖິງໃນເດືອນມີນາ 2025 ນີ້, ເປັນການເປີດໂອກາດໃຫ້ທຸກຄົນໃນຊຸມຊົນໄດ້ເປັນຕົວແທນ ແລະ ທຸກໆສຽງທີ່ສະແດງຄວາມຄິດເຫັນຈະໄດ້ຮັບການຮັບຟັງ. ການມີສ່ວນຮ່ວມຂອງທຸກຄົນຈະຊ່ວຍສ້າງອະນາຄົດຂອງຊຸມຊົນ ແລະ ປະເທດຊາດ, ເມື່ອຮ່ວມມືກັນເຮົາສາມາດສ້າງສັງຄົມທີ່ມີຄວາມສະເໝີພາບ ແລະ ເທົ່າທຽມກັນໄດ້ຫລາຍຂຶ້ນກວ່າເກົ່າ. ການມີສ່ວນຮ່ວມຂອງຊຸມຊົນຕັ້ງແຕ່ເລີ່ມຕົ້ນການກະກຽມການສຳຫລວດພົນລະເມືອງ ຊ່ວຍເສີມຂະຫຍາຍຄວາມຮັບຮູ້ ແລະ ການມີສ່ວນຮ່ວມ, ຮັບປະກັນໄດ້ວ່າການສຳຫລວດພົນລະເມືອງ ຄັ້ງຕໍ່ໄປຈະສະທ້ອນໃຫ້ເຫັນເຖິງຄວາມຕ້ອງການ ແລະ ຄວາມເປັນຈິງທີ່ຫລາກຫລາຍຂອງປະຊາກອນໄດ້ຢ່າງຖືກຕ້ອງ.

    ຂໍ້ມູນທີ່ຖືກຕ້ອງ ແລະ ເຊື່ອຖືໄດ້ແມ່ນມີຄວາມສຳຄັນຕໍ່ການວາງນະໂຍບາຍທີ່ມີປະສິດທິພາບໃນຂະແໜງການຕ່າງໆ ເຊັ່ນ: ສາທາລະນະສຸກ, ການສຶກສາ, ພື້ນຖານໂຄງລ່າງ, ການເງິນ ແລະ ການບໍລິການສັງຄົມ. ການເກັບກຳຂໍ້ມູນຢ່າງຄົບຖ້ວນຊ່ວຍໃຫ້ການນຳພັກລັດ ມີຂ້ໍມູນໃນການຕັດສິນໃຈເພື່ອສາມາດຕອບສະໜອງຄວາມຕ້ອງການຢ່າງສະເພາະເຈາະຈົງໃຫ້ແກ່ຊຸມຊົນ, ຮັບປະກັນການຈັດສັນຊັບພະຍາກອນຢ່າງມີປະສິດທິພາບ ແລະ ມີແຜນງານທີ່ເໝາະສົມເພື່ອປັບປຸງຄຸນນະພາບຊີວິດຂອງພົນລະເມືອງທຸກຄົນ. ດັ່ງທ່ີຮູ້ແລ້ວວ່າການສໍາຫລວດພົນລະເມືອງ ແລະ ທີ່ຢູ່ອາໄສຄ້ັງ ທີ 5 ຈະເປັນແຫລ່ງຂໍ້ມູນອ້າງອີງທີ່ສໍາຄັນ ແລະ ນໍາໃຊ້ເຂົ້າໃນການປະເມີນຜົນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 9 ແລະ ການກະກຽມສ້າງບົດລາຍງານແຫ່ງຊາດ ແບບສະໝັກໃຈກ່ຽວກັບການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ ເຊິ່ງການສໍາຫລວດພົນລະເມືອງ ແລະ ທີ່ຢູ່ອາໄສ ແມ່ນເກັບກໍາຂໍ້ມູນຂອງທຸກໆຄົນໃນທົ່ວປະເທດ, ຂໍ້ມູນຈາກການສໍາຫລວດເປັນໝາກຫົວໃຈ ຂອງແຜນ ພັດທະນາເສດຖະກິດ-ສັງຄົມ ແລະ ເປົ້າໝາຍການພັດທະນາແບບຍືນ ຍົງ, ມີ 45% ຂອງຕົວຊີ້ວັດເປົ້າ ໝາຍ ເຊິ່ງເປົ້າໝາຍການພັດທະນາ ແບບຍືນຍົງຮຽກຮ້ອງໃຫ້ມີຂໍ້ມູນ ແຍກເພດ ແລະ ກຸ່ມອາຍຸທີ່ເຊື່ອຖືໄດ້ ແລະ ຂໍ້ມູນທາງພູມສາດທີ່ຊັດເຈນ ແມ່ນມີຄວາມສໍາຄັນຕໍ່ຄວາມໝາຍໝັ້ນຂອງພວກເຮົາ ທີ່ບໍ່ປະໃຜຢູ່ທາງຫລັງ ແລະ ຊ່ວຍເຫລືອຜູ້ທີ່ຈໍາເປັນຫລາຍທີ່ສຸດກ່ອນ.

    ການສໍາຫລວດພົນລະເມືອງ ແລະ ທີ່ຢູ່ອາໄສທົ່ວປະເທດຂອງ ສປປ ລາວ ແມ່ນດໍາເນີນທຸກໆ 10 ປີ ພາຍໃຕ້ກົດໝາຍວ່າດ້ວຍສະຖິຕິສະບັບເລກທີ 03/ສພຊ, ລົງວັນທີ 30 ມິຖຸນາ 2010 (ສະບັບປັບປຸງວັນທີ 11 ພຶດສະພາ 2017) ແລະ ຄຳແນະນຳຂອງອົງການສະຫະປະຊາຊາດ ກ່ຽວກັບການດໍາເນີນການສໍາຫລວດພົນລະເມືອງ ແລະ ທີ່ຢູ່ອາໄສທົ່ວປະເທດ. ສໍາລັບການສໍາຫລວດພົນລະເມືອງ ແລະ ທີ່ຢູ່ອາໄສ ຄັ້ງທີ 5 ນີ້, ລັດຖະບານຈະໄດ້ນໍາໃຊ້ນະວັດຕະກໍາທັນສະໄໝ ກໍຄືເຕັກໂນໂລຊີດີຈີຕອນ ທ່ີມີຄວາມເປັນມິດຕ່ໍສ່ິງແວດລ້ອມສໍາລັບການເກັບກໍາຂໍ້ມູນ ແລະ ຄາດຈະໃຊ້ງົບປະມານປະມານ 22,2 ລ້ານໂດລາສະຫະລັດ.

ໂດຍ: ສຸວັນນະ

KPL