ຂປລ. ໃນໂອກາດວັນສື່ມວນຊົນ ແລະ ການພິມຈໍາໜ່າຍ ຄົບຮອບ 74 ປີ (13/8/1950-13/8/2024) ທ່ານ ສະຫວັນຄອນ ຣາຊະມຸນຕີ ປະທານສະມາຄົມນັກຂ່າວ ແຫ່ງ ສປປ ລາວ ໄດ້ກ່າວບາງທັດສະນະ ຕໍ່ດັ່ງກ່າວໃນວັນທີ 6 ສິງຫາ ຜ່ານມາ ໂດຍທ່ານ ໄດ້ໃຫ້ຍົກໃຫ້ເຫັນ ກ່ຽວກັບຄວາມເປັນມາ ແລະ ຄວາມສຳຄັນຂອງສື່ມວນຊົນລາວ ຕໍ່ການພັດທະນາປະເທດຊາດ, ພັດທະນາເສດຖະກິດ-ສັງຄົມ ກໍຄື ການເປັນກະບອກສຽງອັນແຫລມຄົມ ໃຫ້ແກ່ ພັກ ແລະ ລັດຖະບານ ໃນການໂຄສະນາເຜີຍແຜ່ ຂໍ້ມູນຂ່າວສານສຳຄັນຕ່າງໆ ໃຫ້ສັງຄົມ ໄດ້ຮັບຮູ້ຢ່າງທົ່ວເຖິງ.

ທ່ານ ສະຫວັນຄອນ ຣາຊະມຸນຕີ ກ່າວວ່າ: ວັນທີ 13 ສິງຫາ ແມ່ນວັນທີ່ມີຄວາມສຳຄັນທາງປະຫວັດສາດ ເປັນວັນສ້າງຕັ້ງແນວລາວອິດສະຫລະ, ທັງເປັນວັນສ້າງຕັ້ງວັນສື່ມວນຊົນລາວ ເຊິ່ງໃນເມື່ອກ່ອນ ແມ່ນໜັງສືພິມປະ ຊາຊົນ ເປັນໜັງສືພິມຂອງພັກ, ຂອງແນວລາວອິດສະຫລະ ເນື່ອງຈາກສື່ມວນຊົນ ແມ່ນມີຄວາມສຳຄັນໃນພາລະ ກິດຕໍ່ສູ້ກູ້ຊາດ ເພື່ອຮັບໃຊ້ໃນການໂຄສະນາແນວທາງປະຕິວັດ, ອຸດົມການ ຂອງການປະຕິວັດ ເພື່ອໃຫ້ປະຊາຊົນລາວ ບັນດາເຜົ່າ ໄດ້ຮັບຮູ້, ເຂົ້າໃຈ ແລະ ຕື່ນຕົວ ເຂົ້າຮັບໃຊ້ໃນພາລະກິດຮັບໃຊ້ປະເທດຊາດ. ພ້ອມນີ້, ສື່ມວນຊົນ ລາວ ໄດ້ຕິດພັນສະໜິດແໜ້ນ ທຸກບາດກ້າວ, ທຸກຂະບວນການ ຂອງການນຳພາ ຕໍ່ສູ້ປົດປ່ອຍປະເທດຊາດ ຂອງຜູ້ນຳປະຕິວັດໃນເມື່ອກ່ອນ. ຫລັງຈາກປະເທດຊາດໄດ້ຮັບການປົດປ່ອຍ ແລະ ສະຖາປະນາ ເປັນ ສາທາລະນະລັດ ປະຊາທິປະໄຕ ປະຊາຊົນລາວ ປະເທດຊາດເລີ່ມມີການພັດທະນາ, ວຽກງານສື່ມວນຊົນ ກໍເລີ່ມມີການເຕີບໃຫຍ່ຂະຫຍາຍຕົວ ໂດຍມີສື່ໂທລະພາບ ທີ່ເປັນແບບຂາວ-ດຳ, ຕໍ່ມາກໍເປັນແບບສີ, ມີວາລະສານ, ໜັງສືພິມພາສາຕ່າງປະເທດ, ຈົນເຖິງປັດຈຸບັນ ບັນດາອົງການຕ່າງໆ ກໍໄດ້ມີສື່ເປັນຂອງຕົນເອງ. ຄຽງຄູ່ກັນນີ້, ກໍໄດ້ມີສື່ໃໝ່ ເກີດຂຶ້ນຜ່ານອິນເຕີເນັດ ຫລື ເອີ້ນວ່າ: ສື່ສັງຄົມອອນລາຍ ເຊິ່ງປັດຈຸບັນ ມີຫລາຍຊ່ອງທາງ ໃນການເຜີຍແຜ່ຂໍ້ມູນຂ່າວສານ ຜ່ານສື່ອອນລາຍ.

ທ່ານ ສະຫວັນຄອນ ຣາຊະມຸນຕີ ຍັງໃຫ້ຮູ້ອີກວ່າ: ການກຳເນີດມີສື່ສັງຄົມອອນລາຍ ມີທັງຂໍ້ດີ ແລະ ສິ່ງທ້າທາຍ ເຊິ່ງຂໍ້ດີ ແມ່ນສາມາດຮັບຮູ້ຂ່າວສານວ່າມີຫຍັງເກີດຂຶ້ນຢູ່ ພາຍໃນ ແລະ ຕ່າງປະເທດ ໄດ້ທົ່ວໂລກ ໄດ້ຢ່າງວ່ອງໄວ, ສາມາດເຜີຍແຜ່ຂໍ້ມູນຂ່າວສານ ຢູ່ພາຍໃນປະເທດ ອອກໄປບັນດາປະເທດໃນທົ່ວໂລກ ໄດ້ຮັບຮູ້ຢ່າງວ່ອງໄວ. ຄຽງຄູ່ກັນນີ້, ຍັງມີສິ່ງທ້າທາຍຫລາຍດ້ານ ເພາະທຸກຄົນສາມາດເຜີຍແຜ່ຂໍ້ມູນໄດ້ ໂດຍທີ່ບໍ່ແມ່ນສື່ມວນຊົນ ຫລື ຂໍ້ມູນອາດຈະບໍ່ຄົບຖ້ວນ ຫລື ບໍ່ຖືກຕ້ອງ. ດັ່ງນັ້ນ, ສື່ມວນຊົນລາວ ຕ້ອງໄດ້ເອົາໃຈໃສ່ພັດທະນາຕົນເອງ ໃນການນຳໃຊ້ສື່ຕ່າງໆ, ພ້ອມຮັບມືຕອບໂຕ້ ຫລື ຊີ້ແຈງຕໍ່ຂ່າວ ທີ່ບໍ່ແມ່ນຄວາມຈິງ, ຂ່າວທີ່ບິດເບືອນຄວາມຈິງ, ໃສ່ຮ້າຍປ້າຍສີ ຫລື ໂຈມຕີຕໍ່ແນວທາງນະໂຍບາຍຂອງພັກ ແລະ ລັດຖະບານ ຢ່າງວ່ອງໄວ.

ໃນໂອກາດນີ້, ທ່ານ ສະຫວັນຄອນ ຣາຊະມຸນຕີ ຍັງຝາກເຖິງບັນດາສື່ມວນຊົນລາວ ທັງສູນກາງ ແລະ ທ້ອງຖິ່ນ ໃຫ້ມີຄວາມອົດທົນ, ເຮັດໜ້າທີ່ໃຫ້ສຳເລັດ, ໃຫ້ມີຄຸນນະພາບ, ໄດ້ມາດຕະຖານ, ມີການຍົກລະດັບຄວາມຮູ້, ຄວາມສາມາດຂອງຕົນເອງໃຫ້ທັນຕາມຍຸກສະໄໝ, ຫັນການເຮັດວຽກ ໃຫ້ເປັນທັນສະໄໝ ແລະ ໃຫ້ກຳໄດ້ນະໂຍບາຍ, ລະບຽບການ, ແນວທາງ ໂດຍສະເພາະກົດໝາຍສື່ມວນຊົນ. ພ້ອມກັນນີ້, ທ່ານຍັງໄດ້ ສະແດງຄວາມຮູ້ບຸນຄຸນຕໍ່ການນຳພັກ-ລັດ ທຸກຂັ້ນ ທີ່ຍາມໃດກໍໃຫ້ຄວາມສຳຄັນ ຕໍ່ວຽກງານສື່ມວນຊົນ ເຊິ່ງສະແດງອອກໃນຜົນສຳເລັດເປັນກ້າວໆ ຄຽງຄູ່ກັບຜົນສຳເລັດດ້ານຕ່າງໆ ຂອງປະເທດຊາດ ພາຍໃຕ້ການນຳພາຂອງພັກ, ການຄຸ້ມຄອງຂອງລັດ ແລະ ຄວາມເປັນເຈົ້າຂອງປະຊາຊົນບັນດາເຜົ່າ.

 ຂໍ້ມູນ-ພາບ: ເສດຖະກິດການຄ້າ

KPL