ຂປລ. ກະຊວງປ້ອງກັນຄວາມສະຫງົບ ຈັດກອງປະຊຸມສະຫລຸບຕີລາຄາ ການຈັດຕັ້ງປະຕິບັດວຽກງານຫັນເປັນດີຈິຕອນ ປະຈຳປີ 2024 ແລະ ທິດທາງແຜນການ ປະຈຳປີ 2025 ໃນວັນທີ 5 ພຶດສະພາ 2025 ໂດຍການເປັນປະທານຂອງ ທ່ານ ພົທ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ຫົວໜ້າຄະນະຮັບຜິດຊອບການຫັນເປັນດີຈິຕອນ, ມີຄະນະຮັບຜິດຊອບການຫັນເປັນດີຈິຕອນຂອງກະຊວງ ປກສ ເຂົ້າຮ່ວມ.

ໂອກາດນີ້, ທ່ານ ພົຈວ ແສງປະເສີດ ສຸທຳມະວົງ ຫົວໜ້າກົມສື່ສານ, ຜູ້ປະຈຳການຄະນະຮັບ ຜິດຊອບການຫັນເປັນດີຈິຕອນ ໄດ້ຕີລາຄາການຈັດຕັ້ງເຄື່ອນໄຫວ ວຽກງານຫັນເປັນດີຈິຕອນ ຂອງກະ ຊວງປ້ອງກັນຄວາມສະຫງົບໃນໄລຍະຜ່ານມາ ເຊິ່ງຄະນະຮັບຜິດຊອບແຕ່ລະພາກສ່ວນໄດ້ເອົາໃຈໃສ່ ໂຄສະນາເຜີຍແຜ່ ແນວແນວທາງ ແຜນນະໂຍບາຍຂອງພັກ, ກົດໝາຍຂອງລັດ, ນິຕິກຳຕ່າງໆ ທີ່ຕິດພັນເຖິງວຽກງານ ຫັນເປັນດີຈິຕອນ ໃຫ້ນາຍ ແລະ ພົນຕຳຫລວດຮັບຮູ້, ເຂົ້າໃຈ ແລະ ຫັນປ່ຽນຈິນຕະ ນາການ ໃຫ້ມີຄວາມເຊື່ອໝັ້ນຕໍ່ການນໍາພາຂອງພັກ-ລັດ ຕາມທິດ 3 ເສົາຄໍ້າ ຂອງລັດຖະບານ ເພື່ອພັດທະ ນາລັດດີຈິຕອນ, ເສດຖະກິດດີຈິຕອນ ແລະ ສັງຄົມດີຈິຕອນ; ເປັນໃຈກາງໃນພົວພັນປະສານງານ ກັບພາກສ່ວນທີ່ກ່ຽວຂ້ອງ ເພື່ອຊຸກຍູ້ສົ່ງເສີມບັນດາກົມ-ກອງວິຊາສະເພາະ ຈັດຕັ້ງປະຕິບັດກິດຈະກຳ ໂຄງ ການຕ່າງໆ, ສຶກສາຄົ້ນຄວ້ານໍາໃຊ້ລະບົບ ບໍລິຫານລັດດິຈິຕອນ ເຂົ້າມານໍາໃຊ້ພາຍໃນກໍາລັງ; ເປີດຝຶກອົບ ຮົມລະບົບຫ້ອງການທັນສະໄໝ (E-Office) ໂດຍໄດ້ເຊີນຄູອາຈານ ຈາກສູນບໍລິຫານລັດດີຈິຕອນ ກະ ຊວງ ເຕັກໂນໂລຊີ ແລະ ການສື່ສານ ມາສິດສອນວິທີຄຸ້ມຄອງນໍາໃຊ້ໂປຣແກຣມ ໃຫ້ວິຊາການກົມຄຸ້ມຄອງເອກະສານ ຫ້ອງວ່າການກະຊວງ ແລະ ກົມສື່ສານ. ນອກນັ້ນ, ຍັງມີດ້ານອ່ອນ ແລະ ຂໍ້ຄົງຄ້າງອີກຈຳນວນໜຶ່ງ.

ສຳລັບ ທິດທາງແຜນການ ປະຈຳປີ 2025 ​ແມ່ນ​ສືບຕໍ່ເຊີດຊູບົດບາດການນໍາພາ ຂອງຄະນະພັກທຸກຂັ້ນ ເພື່ອປູກຈິດສໍານຶກໃຫ້ຄະນະພັກ-ຄະນະນໍາທຸກຄົນເຫັນໄດ້ຄວາມໝາຍຄວາມສໍາຄັນ ແລະ ປະກອບສ່ວນຢ່າງຕັ້ງໜ້າໃນການຫັນເປັນດີຈິຕອນ ຂອງກໍາລັງປ້ອງກັນຄວາມສະຫງົບ ໃຫ້ທຽບທັນກັບຂະແໜງການອື່ນ; ພັດທະນາພື້ນຖານໂຄງລ່າງ ໂດຍການນໍາໃຊ້ເຕັກໂນໂລຊີດີຈິຕອນ ເຂົ້າໃນທຸກຂົງເຂດ ວຽກງານວິຊາສະເພາະໃຫ້ຫລາຍຂຶ້ນ, ສຸມໃສ່ຈັດຕັ້ງປະຕິບັດ ກິດຈະກຳໂຄງການສ້າງເຄືອຂ່າຍເນັດເວີກ ຂອງກະຊວງໃຫ້ສໍາເລັດຕາມລະດັບຄາດໝາຍ; ພັດທະນາຊັບພະຍາກອນມະນຸດ ໃຫ້ມີຄວາມຮູ້ຄວາມສາມາດ ທາງດ້ານດີຈິຕອນສາມາດນໍາໃຊ້ເຕັກໂນໂລຊີ ໄດ້ຢ່າງຄ່ອງແຄ້ວ, ເຂົ້າໃຈເນື້ອໃນຂອງດີຈິຕອນ ແລະ ເຂົ້າເຖິງການນໍາໃຊ້ເຕັກໂນໂລຊີດີຈິຕອນ ຢ່າງມີຄຸນນະພາບ, ຄົ້ນຄ້ວາ, ປະດິດສ້າງ ແລະ ສື່ສານດ້ວຍເຄື່ອງມືທີ່ເໝາະສົມ; ຊຸກຍູ້, ສົ່ງເສີມ ແລະ ເປີດກ້ວາງການຮ່ວມມືກັບຄູ່ຮ່ວມມືທັງພາຍໃນ ແລະ ຕ່າງປະເທດ ເພື່ອຫັນເປັນດີຈິຕອນ ຂອງກະຊວງປ້ອງກັນຄວາມສະຫງົບ, ຫລຸດຜ່ອນການໃຊ້ງົບປະມານຂອງລັດໃນການລົງທຶນ, ເຮັດໃຫ້ມີສ່ວນຮ່ວມທັງພາກລັດ ແລະ ເອກະຊົນ.

ຂ່າວ: ກະແຕ

KPL