ຂ​ປລ. ສຳນກັຂ່າວ ວິທະຍຸ ກະຈາຍສຽງ​​ ແຫ່ງ​ຊາດ ຫວຽດນາມ, ວັນທີ 8 ສິງຫາ, ອາຊຽນ ໄດ້ສະເຫລີມ ສະຫລອງ ການສ້າງຕັ້ງ ຄົບຮອບ 57 ປີ (8/8/1967 – 8/8/2024). ​ໃນໄລຍະ ເວລາ 57 ປີ ຜ່ານມາ, ອາຊຽນ​ໄດ້ປະສົບຜົນສຳເລັດ ອັນສຳຄັນ ທີ່ສຸດ ແມ່ນການຮັບປະກັນ, ການຮັກສາ ສັນຕິພາບ ແລະ ສະຖຽນລະພາບ ຢູ່ໃນພາກພື້ນ ອາຊີ ຕາເວັນອອກ ສຽງໃຕ້, ບັນດາ ປະເທດ ສະມາຊິກ ໄດ້ເພີ່ມທະວີ ຮ່ວມມືກັນ ຢ່າງແໜ້ນແຟ້ນ, ຄວາມແຕກຕ່າງກັນ ລະຫວ່າງ ບັນດາ ສະມາຊິກ, ຂໍ້ຂັດແຍ້ງ ຫລື ຄວາມບໍ່ເອກະພາບກັນ ໃນບາງບັນຫາ ກໍໄດ້ຮັບການເຈລະຈາ ແລະ ໄກ່ເກ່ຍ ບົນພື້ນຖານ ເພື່ອຜົນປະໂຫຍດ ສ່ວນລວມ.

ເມື່ອກ່ອນ ການສ້າງຕັ້ງ ອາຊຽນ ມີປະຊາກອນ ພຽງແຕ່ ປະມານ 260 ລ້ານຄົນ ​ແຕ່ ປັດຈຸບັນ ອາຊຽນ ມີປະຊາຊົນ ຫລາຍກວ່າ 650 ລ້ານຄົນ ແລະ ເປັນຕະຫລາດ ທີ່ມີ ກຳລັງ ບົ່ມຊ້ອນຫລາຍຢ່າງ. ຄາດວ່າ ປີ 2050, ອາຊຽນ ຈະກາຍເປັນ ພື້ນຖານ ເສດຖະກິດ ຂະໜາດໃຫຍ່ ອັນ​ດັບ 4 ​ຂອງໂລກ. ໂດຍສິ່ງທີ່ເປັນພື້ນຖານ ໃຫ້ແກ່ໝາກຜົນສຳເລັດ ໃນເກືອບ 6 ທົດສະວັດ ຜ່ານມານັ້ນ ແມ່ນບັນດາ ກົນໄກ ການຮ່ວມມື ພາຍໃນກຸ່ມ ຂອງ ອາຊຽນ ກໍຄື ສຳລັບ ບັນດາ ຄູ່ຮ່ວມມື, ໄດ້ມີການ ປະກອບສ່ວນ ນັບມື້ນັບສຳຄັນ ໃນການ ແກ້ໄຂ ບັນຫາລວມ ຂອງ ພາກພື້ນ.  ສະນັ້ນ ອາຊຽນ ນັບມື້ ກາຍເປັນ ຄູ່ຮ່ວມມື ທີ່ ສຳຄັນ ສຳລັບ ຫລາຍປະເທດ, ໃນນັ້ນ ລວມມີ ບັນດາປະເທດ ມະຫາອຳນາດ.

ສ.ອາເມລິກາ ຈັດ ອາຊຽນ ເປັນຈຸດໃຈກາງ ໃນຍຸດທະສາດ ມະຫາສະໝຸດ ອິນເດຍ-ປາຊີຟິກ ແລະ ຖືບົດບາດ ຂອງ ອາຊຽນ ເປັນສຳຄັນທີ່ສຸດ ຄື ດັ່ງຄຳຢືນຢັນ ຂອງທ່ານ ຢູຮາເນສ ອາບຣາຮາມ  ເອກອັກຄະລັດ ຖະທູດ ສ.ອາເມລິກາ ປະຈຳ ອາຊຽນ ລະບຸວ່າ. “ໃນຊຸມປີ ຜ່ານມາ, ບັນດາ ຄຳໝັ້ນສັນຍາ ໄດ້ມີການ ເປີດກວ້າງ ລະຫວ່າງ ສ.ອາເມລິກາ ກັບ ອາຊຽນ, ໃນນັ້ນ ລວມມີ ທ່ານ ​ໂຈ​ໄບ​ເດນ ປະທານາທິບໍດີ ເຂົ້າຮ່ວມກອງປະຊຸມ ສຸດຍອດອາຊຽນ ແລະ ການຈັດຕັ້ງ ກອງປະຊຸມ ສຸດຍອດ ອາຊຽນ ປະຈຳ ວໍຊິງຕັນ ຫລື ການຢ້ຽມຢາມ ຄັ້ງຫລ້າສຸດ ຂອງ ທ່ານນາງ ຮາຣິສ ຮອງປະທານາທິບໍດີ ເຂົ້າຮ່ວມ ກອງປະຊຸມ ສຸດຍອດ ອາຊຽນ ທີ່ ຈັດຂຶ້ນ ຢູ່ ຈາກາຕາ ປະ​ເທດ ອິນໂດເນເຊຍ. ໃນຕົວຈິງ, ສ.ອາເມລິກາ ໄດ້ຈັດແບ່ງເວລາ, ກຳລັງສ່ວນຫລາຍ ກໍຄື ການຊອກຫາວິທີ ການຮ່ວມມື ຢ່າງແໜ້ນແຟ້ນ ກັບ ບັນດາ ຄູ່ຮ່ວມມື ອາຊຽນ. ການພົວພັນ ລະຫວ່າງ ສ.ອາເມລິກາ ແລະ ອາຊຽນ ບໍ່ພຽງແຕ່ ເປັນບຸລິມະສິດ ຂອງ ອຳນາດ ການປົກຄອງ ເທົ່ານັ້ນ ຫາກຍັງໄດ້ຮັບ ຄວາມສົນໃຈ ຈາກ ສະພາສູງ ແລະ ສະພາຕ່ຳນຳອີກດ້ວຍ.”/

KPL