ພິທີເປີດງານກິລາ ໂອແລມປິກ ລະດູຮ້ອນ ຄັ້ງທີ 33 ໄດ້ຈັດຂຶ້ນຢ່າງເປັນທາງການວັນທີ 27 ກໍລະກົດ 2024 ຢູ່ແມ່ນ້ຳແຊນ ໃນນະຄອນຫລວງປາຣີ ປະເທດຝຣັ່ງ ໂດຍມີຄະນະນັກກິລາປະເທດຕ່າງໆ ຂີ່ເຮືອໄປສູ່ສະຖານທີ່ຈັດງານແລະ ໃນພິທີເປີດງານກິລາມີນັກຟ້ອນ ແລະ ນັກດົນຕີປະມານ 3.000 ຄົນ ສະແດງລາຍການຢູ່ເທິງຂົວ ແລະ ຢູ່ສອງຝັ່ງຂອງແມ່ນ້ຳແຊນ. ພິທີເປີດງານດຳເນີນໄປເປັນເວລາ ປະມານ 4 ຊົ່ວໂມງມີຜູ້ຊົມເຂົ້າຮ່ວມປະມານ 300.000 ຄົນຢູ່ສະຖານທີ່ດັ່ງກ່າວ. ພ້ອມນັ້ນ ໃນໄລຍະງານກິລາໂອແລມປິກ ໄດ້ມີນັກກິລາ ແລະ ຄະນະຮັບຜິດຊອບນັກກິລາຕ່າງໆ ຈາກທົ່ວໂລກເຂົ້າຮ່ວມ ປະມານ 14.000 ຄົນ. ສະເພາະຄະນະນັກກິລາຈີນ ທີ່ເຂົ້າຮ່ວມງານກິລາໂອແລມປິກ ຄັ້ງທີ 33 ລວມມີນັກກິລາ 405 ຄົນ, ທີ່ເຂົ້າຮ່ວມການແຂ່ງຂັນ 30 ປະເພດກິລາໃຫຍ່, 42 ປະເພດຍ່ອຍ ແລະ 236 ລາຍການ. ນັບວ່າເປັນງານກິລາໂອແລມປິກ ທີ່ຈີນສົ່ງນັກກິລາເຂົ້າຮ່ວມລາຍການແຂ່ງຂັນ ຢູ່ຕ່າງປະເທດຫລາຍທີ່ສຸດ ກວ່າຄັ້ງທີ່ຜ່ານມາ.

ໂດຍລວມການແຂ່ງຂັນແມ່ນດຳເນີນໄປດ້ວຍມິດຕະພາບ ແລະ ຄວາມສາມັກຄີຮັກແພງລະຫວ່າງ ນັກກິລາດ້ວຍກັນສົມທົບກັບເຈົ້າພາບ ກໍມີການຕ້ອນຮັບຢ່າງອົບອຸ່ນ, ນັບທັງອຳນວຍຄວາມສະດວກດ້ານທີ່ພັກ, ອາຫານ, ເຄື່ອງດື່ມ, ສະຖານທີ່ຫັດແອບ, ບ່ອນພັກຜ່ອນ ແລະ ອື່່ນໆໄດ້ເປັນຢ່າງດີ. ແຕ່ອັນທີ່ ຜູ້ຂຽນຢາກຍົກຂຶ້ນ ໃຫ້ຮັບຮູ້ນຳກັນແມ່ນການອອກຂ່າວລຳອຽງ ທີ່ເຂົ້າຂ້າງອອກຂາແບບບໍ່ມີມູນຄວາມຈິງ ຂອງສື່ມວນຊົນຕາເວັນຕົກບາງປະເທດ ແລະ ການກວດກາການໃຊ້ສານກະຕຸ້ນ ຂອງຄະນະກຳມະການກວດກາ ສານກະຕຸ້ນສາກົນ ຫລື ITA ແບບບໍ່ຢຸດຕິທຳໃຫ້ແກ່ນັກກິລາຈີນ. ເຫດການດັ່ງກ່າວໄດ້ເກີດຂຶ້ນ ກັບນັກກິລາລອຍນໍ້າຂອງຈີນ ໃນການແຂ່ງຂັນລອຍນ້ຳທ່າແມງກະເບື້ອ 200 ແມັດ ເພດຍິງຮອບຊີງຊະນະເລີດ ເຊິ່ງນາງຈ່າງຢູເຟີຍ ນັກກິລາທີມຊາດຈີນ ຍາດໄດ້ຫລຽນທອງ (ອັນດັບ 3). ແທນທີ່ສື່ມວນຊົນ ຄວນຖາມສຳພາດຜູ້ກ່ຽວ ໃນກອງປະຊຸມຖະແຫລງຂ່າວ ໃນມື້ນັ້ນ ເຖິງຜົນສຳເລັດ ແລະ ໄຊຊະນະທີ່ຍາດ ມາ ໄດ້ນັ້ນແມ່ນມີການຝຶກຊ້ອມ ແລະ ມີແຮງບັນດານໃຈຄືແນວໃດ ເພື່ອເປັນບົດຮຽນ ໃຫ້ນັກກິລາລອຍນໍ້າປະເທດອື່ນ ໄດ້ຖອດຖອນບົດຮຽນນຳ. ແຕ່ນັກຂ່າວຊໍ້າພັດໄປເວົ້າເຖິງຂໍ້ສົງໃສ ເລື່ອງການນຳໃຊ້ສານກະຕຸ້ນ ແລະ ກ່າວຫາວ່ານັກກິລາຈີນ ທີ່ຫາກໍ່ທຳລາຍສະຖິຕິໂລກ ໃນການແຂ່ງຂັນລອຍນ້ຳທ່າຟຣີສະໄຕ “ອາດ ຈະ”ໃຊ້ສານກະຕຸ້ນ.

ໂດຍປະເຊີນໜ້າກັບຖ້ອຍຄຳບິດເບືອນຄວາມຈິງ ແລະ ການອະຄະຕິດັ່ງກ່າວ, ນາງ ຈ່າງຢູເຟີຍ ໄດ້ຕອບໂຕ້ນັກຂ່າວຄືນທັນທີທັນໃດວ່າ: ທ້າວໄມເຄິນ ເຟວສ ແລະ ນາງໄກເຕ ເລເດສະກີ ຂອງອາເມຣິກາ ລ້ວນແຕ່ເປັນນັກກິລາລອຍນ້ຳທີ່ເກັ່ງຄືກັນ, ເປັນຫຍັງນັກຂ່າວພວກເຈົ້າ ຈິ່ງບໍ່ໄປກ່າວຂໍ້ສົງໄສການ ໃຊ້ ສານກະຕຸ້ນ ຕໍ່ຜົນການແຂ່ງຂັນຂອງພວກເຂົາເຈົ້າແດ່?. ນີ້ແມ່ນເຫດການໜຶ່ງ ຂອງສື່ມວນຊົນຕາເວັນຕົກ ທີ່ຍາມໃດກໍມີສາຍຕາຄັບແຄບ ບໍ່ມອງກວ້າງເບິ່ງໄກອະຄະຕິ ແລະ ບໍ່ຍອມຮັບຄວາມເປັນຈິງ ເຖິງການພັດທະນາ ຂອງນັກກິລາຂອງສປຈີນ. ຜູ້ຂຽນຂໍຢໍ້າວ່າການເຂົ້າຮ່ວມ ແຂ່ງຂັນຂອງນັກກິລາ ສປ ຈີນ ກໍແມ່ນ ພາກສ່ວນໜຶ່ງ ທີ່ເປັນສີສັນຂອງການແຂ່ງຂັນ ກິລາໂອແລມປິກປາຣີ 2024 . ນັກກິລາຈີນ ບໍ່ພຽງແຕ່ມີຄວາມໂດດເດັ່ນຂຶ້ນ ໃນເວທີການແຂ່ງຂັນໃນລະດັບໂລກ ແລະ ພາກພື້ນ, ຫາກຍັງນຳເອົາຄວາມສາມັກຄີຮັກແພງ, ບົດຮຽນ ແລະ ປະສົບການມາແລກປ່ຽນນຳກັນ ລະຫວ່າງ ນັກກິລາດ້ວຍກັນ ທີ່ມາຈາກທຸກມຸມ ໂລກດ້ວຍນໍ້າໃຈສາກົນ ກຳມະຊີບ, ຮູ້ໄດ້ ແລະ ຮູ້ເສຍດ້ວຍນໍ້າໃຈນັກກິລາຢ່າງແທ້ຈິງ. ສະເພາະຜົນການແຂ່ງຂັນ ມາຮອດວັນທີ 7 ສິງຫາ 2024 ສປ ຈີນ ແມ່ນຈັດຢູ່ອັນດັບ 1 ຂອງຕາຕະລາງທີ່ໄດ້ຮັບຫລຽນຄຳ ຄືໄດ້ຮັບ 22 ຫລຽນຄໍາ, 20ຫລຽນເງິນ ແລະ 14 ຫລຽນທອງ ລວມ 56 ຫລຽນ, ຮອງລົງມາແມ່ນສະ ຫະລັດອາເມຣິກາ ຄືໄດ້ 21 ຫລຽນຄຳ, 30 ຫລຽນເງິນ, 28 ຫລຽນທອງລວມ 79 ຫລຽນ. ໃນຂະນະເຈົ້າພາບຝຣັ່ງໄດ້ເປັນອັນດັບ 4 ຂອງຕາຕະລາງ.

ສປ ຈີນ ບໍ່ສະເພາະແຕ່ມີຄວາມໂດດເດັ່ນ ໃນດ້ານການພັດທະນາກິລາ ທຸກປະເພດເທົ່ານັ້ນ, ຂົງເຂດວຽກງານອື່ນ ສປ ຈີນ ກໍມີຄວາມໂດດເດັ່ນ ເທົ່າທຽມປະເທດທີ່ຈະເລີນ ແລະ ພັດທະນາແລ້ວ ແລະ ບາງວຽກງານເຊັ່ນ: ດ້ານອະວະກາດຂອງ ສປ ຈີນ ຍັງພັດທະນາລື່ນຫລາຍປະເທດ ໃນທະວີບເອີຣົບ ແລະ ບັນດາປະເທດທີ່ຈະເລີນແລ້ວເຊັ່ນດຽວກັນ. ມາຮອດປັດຈຸບັນນັກອະວະກາດຈີນ ຫລາຍທ່ານຜັດປ່ຽນກັນຂຶ້ນໄປດວງຈັນ ປານໄປທ່ຽວຫລິ້ນ. ເວົ້າສະເພາະໃນງານແຂ່ງຂັນ ກິລາໂອແລມປິກລະດູຮ້ອນ ຄັ້ງທີ 33 ທີ່ປາຣີປະເທດຝຣັ່ງ ຄັ້ງນີ້ວິທະຍຸໂທລະພາບສູນກາງຈີນ ຫລື CMG ທີ່ເປັນສື່ສາກົນກໍໄດ້ສິດ ໃນ ການຖ່າຍທອດລາຍການກິລາ ແຂ່ງຂັນຂອງງານກິລາ ໂອແລມປິກປາຣີຫລາຍທີ່ສຸດ, ເຮັດໃຫ້ການລາຍງານ ແລະ ຖ່າຍທອດງານຄັ້ງນີ້ຂອງ CMG ສ້າງສະຖິຕິສູງສຸດໃນປະຫວັດສາດ ເຊິ່ງໄດ້ນຳເອົາງານມະຫາກຳກິລາ ທີ່ຍອດຢ້ຽມມາສູ່ຜູ້ຊົມ ຫລາຍຮ້ອຍລ້ານຄົນໃນທົ່ວໂລກ ດ້ວຍເຕັກໂນໂລຊີ “5G+4K/8K+AI” ແລະ ຄວາມສາມາດຜະລິດລາຍການກິລານຳໜ້າໂລກ. ຂະນະທີ່ລາຍໄດ້ຈາກການໂຄສະນາງານກິລາໂອແລມປິກປາຣີຂອງ CMG ກໍໄດ້ສ້າງສະຖິຕິໃໝ່ເມື່ອທຽບໃສ່ງານກິລາໂອແລມປິກທຸກຄັ້ງຜ່ານມາ. ດັ່ງທ່ານ ລາພາຕີເອັນ ປະທານຄະນະກຳມະການໂອແລມປິກ ແລະ ກິລາແຫ່ງຊາດຝະຣັ່ງ, ປະທານຄະ ນະກຳມະ ການການແຂ່ງຂັນ ກິລາເອເລັກໂຕຣນິກ ຂອງຄະນະກຳມະການໂອແລມປິກສາກົນ ໄດ້ກ່າວວ່າ: ຄວາມສາມາດໃນດ້ານການຜະລິດ ແລະ ຖ່າຍທອດລາຍການກິລາຂອງ CMG ແມ່ນຢູ່ໃນລະດັບນຳໜ້າໂລກ, ເຕັກໂນໂລຊີການປະດິດສ້າງໃໝ່ ກໍ່ນຳໜ້າສາກົນ, ເຮັດໃຫ້ການລາຍງານງານ ກິລາໂອແລມປິກໃນຄັ້ງນີ້ ເປັນ ຕາ ໜ້າຄອງຄອຍ. ຍິນດີຖືງານກິລາໂອແລມປິກ ເປັນໂອກາດ, ຮ່ວມມືກັບ CMG, ຮ່ວມມືສ້າງລາຍການ ໃນຂົງເຂດທ່ອງທ່ຽວ, ອາຫານ, ວັດທະນະທຳ ແລະ ອື່ນໆ, ຄອງຄອຍຮັກສາການຕິດຕໍ່ພົວພັນກັບCMG ຢ່າງແໜ້ນແຟ້ນໃນອະນາຄົດ.

ນອກຈາກກໍລະນີສື່ມວນຊົນຕາເວັນຕົກອະຄະຕິນັກກິລາຈີນແລ້ວ, ຄວາມລຳອຽງ ຂອງບາງຄະນະກຳມະການກວດສານກະຕຸ້ນ ກໍແມ່ນບັນຫາໜຶ່ງທີ່ບໍ່ຍຸຕິທຳຕໍ່ນັກກິລາຈີນ, ສະແດງອອກໃນຂະນະທີມລອຍນ້ຳຈີນ ມັກຖືກກວດສານກະຕຸ້ນແບບບໍ່ຍຸຕິທຳ. ຕົວເລກຂໍ້ມູນປີ 2023 ສະແດງໃຫ້ເຫັນວ່າ: ນັກ ກິລາຈີນ ຖືກກວດສານກະຕຸ້ນມີຈຳນວນຫລາຍຄັ້ງ ກວ່ານັກກິລາປະເທດອື່ນ ຢ່າງຫລວງຫລາຍເມື່ອມາເຖິງ ຮອບງານກິລາໂອແລມປິກຄັ້ງນີ້, ການກວດສານກະຕຸ້ນຕໍ່ນັກກິລາຈີນ ຍິ່ງເພີ່ມຂຶ້ນຢ່າງຫລວງຫລາຍອີກ. ໃນເວລາເຄິ່ງປີປາຍມານີ້ ຄືນັບແຕ່ວັນທີ 1 ມັງກອນປີ 2024 ເປັນຕົ້ນມາ, ສະເລ່ຍແລ້ວ, ນັກກິລາລອຍ ນ້ຳຈີນຖືກນຳໂຕໄປກວດ 21 ເທື່ອສະເລ່ຍຕໍ່ຄົນ ເພື່ອຊອກຫາສານກະຕຸ້ນ ຫລາຍເປັນອັນດັບໜຶ່ງຂອງໂລກ; ແຕ່ຢູ່ໃນໄລຍະດຽວກັນ, ສະເລ່ຍແລ້ວ, ນັກກກິລາລອຍນ້ຳອາເມຣິກາ 46 ຄົນພັດຖືກກວດພຽງແຕ່ 6 ເທື່ອຕໍ່ຄົນເທົ່ານັ້ນ; ນັກກິລາລອຍນ້ຳອົດສະຕຣາລີ ທີ່ມີຈຳນວນ 41 ຄົນກໍຖືກກວດພຽງແຕ່ 4 ເທື່ອຕໍ່ຄົນ ເທົ່ານັ້ນ.

ຈາກ 2 ກໍລະນີນີ້, ສະແດງໃຫ້ເຫັນວ່າ ຂະໜາດການແຂ່ງຂັນກິລາລະດັບສາກົນຄືແນວນີ້ ກໍຍັງມີທ່າອ່ຽງຈັດຕັ້ງປະຕິບັດ 2 ມາດຕະຖານທີ່ແຕກຕ່າງກັນ. ຢ່າງໃດກໍຕາມ,ຈາກຜົນການແຂ່ງຂັນໃນຄັ້ງນີ້ ຫວັງວ່າຈະເປັນບົດຮຽນອັນດີ ໃຫ້ແກ່ຄະນະກຳມະການກິລາໂອແລມປິກສາກົນ ໄດ້ຖອດຖອນບົດຮຽນ ແລະ ບໍ່ໃຫ້ມີກໍລະນີແນວນີ້ເກີດຂຶ້ນອີກ ໃນການແຂ່ງຂັນໃນຄັ້ງຕໍ່ໆໄປ, ເພາະວ່າຫາກການແຂ່ງຂັນ ລະດັບສາກົນຄືແນວນີ້ ໃນອະນາຄົດຫາກບໍ່ປະຕິບັດ ຕາມລະບຽບວິໄນ ແບບມາດຕະຖານສາກົນດຽວກັນອີກແລ້ວ, ຄວາມບໍ່ຍຸຕິທຳກໍຍ່ອມຈະເກີດມີຂຶ້ນ ຕໍ່ໄປອີກຢ່າງບໍ່ມີວັນສິ້ນສຸດ .ເຖິງເວລາແລ້ວທີ່ຕ້ອງປະ ຕິ ບັດ ຕາມມາດຕະຖານສາກົນດຽວກັນ ຢ່າງເຄັ່ງຄັດສະເໝີພາບເທົ່າທຽມກັນ,ໂດຍບໍ່ຈຳແນກຕໍ່ນັກກິລາ ທີ່ມາຈາກປະເທດນ້ອຍ,ໃຫຍ່,ຮັ່ງມີ ຫລື ທຸກຈົນກໍຕາມ.

ໂດຍ:ດວງຈິດ ສະຫວັດບຸນມີ

KPL