ຂປລ
ວັນທີ 15-18 ກໍລະກົດນີ້, ກອງປະຊຸມຄົບຄະນະຄັ້ງທີ 3 ຂອງຄະນະກຳມະການສູນກາງພັກກອມມູນິດຈີນສະໄໝທີ XX ໄດ້ຈັດຂຶ້ນຢູ່ນະຄອນ ຫລວງປັກກິ່ງໂດຍໄດ້ວາງແຜນການລວມກ່ຽວກັບການລົງເລິກການປະຕິຮູບຢ່າງຮອບດ້ານຕື່ມອີກທີ່ໝູນອ້ອມຄວາມທັນສະໄໝແບບຈີນ.
（ໂດຍດວງຈັນປາສູນອາຊີອາຝຣີກາວິທະຍຸໂທລະພາບສູນກາງຈີນ）
ວັນທີ 15-18 ກໍລະກົດນີ້, ກອງປະຊຸມຄົບຄະນະຄັ້ງທີ 3 ຂອງຄະນະກຳມະການສູນກາງພັກກອມມູນິດຈີນ ສະໄໝທີ XX ໄດ້ຈັດຂຶ້ນຢູ່ນະຄອນຫລວງປັກກິ່ງ ໂດຍໄດ້ວາງແຜນການລວມກ່ຽວກັບ ການລົງເລິກການປະຕິຮູບຢ່າງຮອບດ້ານຕື່ມອີກ ທີ່ໝູນອ້ອມຄວາມທັນສະໄໝແບບຈີນ. ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການ ສູນກາງພັກຄອມມູນິດຈີນ, ປະທານປະເທດຈີນໄດ້ກ່າວວ່າ: “ເຮັດເພື່ອປະຊາຊົນ, ການປະຕິຮູບຈຶ່ງມີຄວາມໝາຍ; ອາໄສປະຊາຊົນ, ການປະຕິຮູບຈຶ່ງມີແຮງຂັບເຄື່ອນ.”
ຈາກນີ້ເຫັນວ່າ: ແກນກາງຂອງການລົງເລິການປະຕິຮູບຢ່າງຮອບດ້ານຂອງຈີນມີ 2 ເນື້ອໃນສຳຄັນ ຄື: ການປະຕິຮູບແມ່ນເຮັດເພື່ອປະຊາຊົນ ແລະ ການປະຕິຮູບຕ້ອງອາໄສປະຊາຊົນ. ຕໍ່ໄປ, ຂ້າພະເຈົ້າຈະນຳສະເໜີພຶດຕິກຳຕົວຈິງ ແລະ ຜົນງານດ້ານການປະຕິຮູບຂອງຈີນ ໃນຕະຫລອດໄລຍະ 10 ກວ່າປີມານີ້ ເພື່ອອະທິບາຍໃຫ້ຮູ້ວ່າ: ການປະຕິຮູບທີ່ຖືເອົາປະຊາຊົນເປັນໃຈກາງຂອງຈີນ ແມ່ນຫຍັງກັນແທ້?
ອັນທີໜຶ່ງ, ແມ່ນການປະຕິຮູບເພື່ອປະຊາຊົນ. ການດຳເນີນການປະຕິຮູບ ແລະ ຊຸກຍູ້ການພັດທະນາເສດຖະກິດສັງຄົມ, ຈຸດໝາຍສຸດທ້າຍກໍແມ່ນ ເພື່ອໃຫ້ປະຊາຊົນມີຊີວິດທີ່ດີຂຶ້ນກວ່າເກົ່າ. ດັ່ງນັ້ນ, ທ່ານ ສີຈິ້ນຜິງ ໄດ້ສະເໜີແນວຄິດການພັດທະນາທີ່ “ຖືປະຊາຊົນເປັນໃຈກາງ”, ກາຍເປັນຄວາມຮຽກຮ້ອງດ້ານຄຸນຄ່າສຳລັບພັກກອມມູນິດຈີນ ໃນການອອກແບບຈາກຂັ້ນເທິງສູງສຸດ ຕໍ່ສະພາບລວມແຫ່ງການພັດທະນາ ເສດຖະກິດ-ສັງຄົມ, ທັງເປັນຄ່ານິຍົມດ້ານການລົງເລິກ ການປະຕິຮູບຢ່າງຮອບດ້ານຂອງຈີນໃນຍຸກໃໝ່. ທ່ານ ສີຈິ້ນຜິງ ໄດ້ຊີ້ແຈງແນວຄິດດັ່ງກ່າວ ດ້ວຍຄຳເວົ້າທີ່ເຂົ້າໃຈງ່າຍວ່າ: “ຄວາມປາດຖະໜາຂອງປະຊາຊົນທີ່ຢາກມີຊີວິດການເປັນຢູ່ ທີ່ດີງາມກໍຄືເປົ້າໝາຍສູ້ຊົນຂອງພວກເຮົາ.” “ການລົງເລິກການປະຕິຮູບຢ່າງຮອບດ້ານ ຕ້ອງຖືເອົາການສົ່ງເສີມຄວາມຍຸຕິທຳ ແລະ ຄວາມເປັນທຳຂອງສັງຄົມ, ເພີ່ມຄວາມສຸກໃຫ້ກັບປະຊາຊົນ ເປັນຈຸດເລີ່ມຕົ້ນ ແລະ ຈຸດໝາຍ.”
ຈາກຈຸດເລີ່ມຕົ້ນດັ່ງກ່າວ, ຈີນໄດ້ດຳເນີນການປະຕິຮູບຢ່າງເລິກເຊິ່ງແລະຮອບດ້ານໃນຂົງເຂດຊີວິດການເປັນຢູ່ ຂອງປະຊາຊົນຕ່າງໆ ຄື: ລົງເລິກການປະຕິຮູບໂຄງປະກອບດ້ານການຢາ ແລະ ສາທາລະນະສຸກ: ຍົກສູງລະດັບການປະກັນສຸຂະພາບຂັ້ນພື້ນຖານ ແລະ ການປະກັນໄພດ້ານພະຍາດຮ້າຍແຮງ ຢ່າງຕໍ່ເນື່ອງ, ຈັດເອົາຢາປິ່ນປົວທີ່ປະຊາຊົນ ຕ້ອງການຢ່າງຮີບດ່ວນເຂົ້າ ໃນຂອບເຂດການຊຳລະດ້ວຍລະບົບປະກັນສຸຂະພາບ ໃຫ້ຫລາຍຂຶ້ນກວ່າເກົ່າ, ການຊຳລະຄ່າກວດພະຍາດ ແລະ ຄ່ານອນປິ່ນປົວຢູ່ໂຮງໝໍແບບຂ້າມແຂວງໂດຍກົງ ແລະ ອື່ນໆ. ນັບມາຮອດເດືອນພຶດສະພາປີນີ້, ຈີນໄດ້ຈັດເອົາຢາ 374 ປະເພດເຂົ້າໃນຂອບເຂດການຊຳລະ ດ້ວຍລະບົບປະກັນສຸຂະພາບ, ໃນນັ້ນມີສ່ວນໃຫຍ່ແມ່ນຢາປິ່ນປົວ ພະຍາດຊ້ຳເຮື້ອທົ່ວໄປທີ່ພົບເຫັນເລື້ອຍໆ. ດັ່ງນັ້ນ, ໃນຫລາຍປີມານີ້, ປະຊາຊົນທັງຫລາຍໄດ້ຍ້ອງວ່າ: ລາຄາຂອງຢາປິນປົວຫລຸດລົງແລ້ວ, ຄ່າໃຊ້ຈ່າຍທີ່ສາມາດຊຳລະ ດ້ວຍລະບົບປະກັນສຸຂະພາບ ໄດ້ກວມເອົາຫລາຍເປີເຊັນຂຶ້ນ, ການໄປປິ່ນປົວພະຍາດ ມີຄວາມສະດວກຫລາຍຂຶ້ນ, ສຸຂະພາບຂອງປະຊາຊົນໄດ້ຮັບການຮັບປະກັນຫລາຍກວ່າເກົ່າແລ້ວ.
ການລົງເລິກການປະຕິຮູບໂຄງປະກອບ ແລະ ກົນໄກການສຶກສາ: ຊຸກຍູ້ການສຶກສາພາກບັງຄັບຂອງຕົວເມືອງ ແລະ ຊົນນະບົດໃຫ້ພັດທະນາແບບເຊື່ອມໂຍງ ເຂົ້າເປັນອັນໜຶ່ງອັນດຽວກັນ, ປັບປຸງລະບົບອາຊີວະສຶກສາ ແລະ ການອົບຮົບວິຊາຊີບ, ລົງເລິກການເຊື່ອມໂຍງອຸດສາຫະກຳ ແລະ ການສຶກສາ, ການຮ່ວມມືລະຫວ່າງໂຮງຮຽນກັບວິສາຫະກິດ, ສົ່ງເສີມຄວາມຍຸຕິທຳດ້ານການສຶກສາ ແລະ ການຍົກສູງຄຸນນະພາບການສຶກສາຕື່ມອີກ.ປັດຈຸບັນ, ອັດຕາປັບປຸງການສຶກສາພາກບັງຄັບຂອງຈີນມີເຖິງ 95,7%, ໄດ້ສ້າງເປັນສະພາບການໃໝ່ ທີ່ການສຶກສາພາກບັງຄັບຢູ່ໃນຕົວເມືອງ ແລະ ຊົນນະບົດມີຄວາມດຸນດ່ຽງກັນ ແລະ ພັດທະນາຢ່າງເປັນເອກະພາບກັນ.
ການລົງເລິກການປະຕິຮູບລະບຽບການສຳມະໂນຄົວ: ສ້າງຕັ້ງລະບຽບການຈົດທະບຽນສຳມະໂນຄົວຕົວເມືອງ ແລະ ຊົນນະບົດໃຫ້ເປັນເອກະພາບກັນຢ່າງຮອບດ້ານ, ຍົກເລີກ ຫລື ຜ່ອນຄາຍຂໍ້ຈຳກັດ ດ້ານນະໂຍບາຍຍົກຍ້າຍສຳມະໂນຄົວ, ເຊິ່ງໄດ້ທັບມ້າງອຸປະສັກດ້ານສຳມະໂນຄົວ ລະຫວ່າງຕົວເມືອງກັບຊົນນະບົດ, ຊ່ວຍຊຸກຍູ້ຂະບວນການຫັນເປັນຕົວເມືອງແບບໃໝ່. ສາມາດເວົ້າໄດ້ວ່າ: ໃນໄລຍະ10 ກວ່າປີຜ່ານມານີ້, ແຜນການປະຕິຮູບຈຳນວນ 2.000 ກວ່າສະບັບ ໄດ້ກວມເຖິງຂອດຕ່າງໆເຊັ່ນ: ການນຸ່ງຫົ່ມ, ການກິນ, ການຢູ່ ແລະ ການເດີນທາງເປັນຕົ້ນ, ເຊິ່ງໄດ້ປົກຄຸມຂົງເຂດຕ່າງໆເຊັ່ນ: ການເມືອງ, ເສດຖະກິດ, ວັດທະນະທຳ, ສັງຄົມ, ສິ່ງແວດລ້ອມນິເວດ ແລະ ອື່ນໆ, ທັງໝົດນີ້ ລ້ວນແຕ່ໄດ້ສ່ອງແສງໃຫ້ເຫັນເຖິງຄ່ານິຍົມທີ່ຖືປະຊາຊົນເປັນໃຈກາງ.
ອັນທີສອງແມ່ນຊຸກຍູ້ຂະບວນການປະຕິຮູບໂດຍອາໄສປະຊາຊົນ. ພາຍຫລັງເຂົ້າສູ່ຍຸກໃໝ່ແລ້ວ, ຂໍ້ຂັດແຍ້ງຕົ້ນຕໍຂອງສັງຄົມຈີນໄດ້ມີການປ່ຽນແປງ, ຄວາມຕ້ອງການຂອງປະຊາຊົນທີ່ຢາກມີຊີວິດການເປັນຢູ່ທີ່ດີງາມໃນຍຸກໃໝ່ຍິ່ງກວ້າງຂວາງກວ່າເກົ່າ ແລະ ມີຄວາມຮຽກຮ້ອງສູງກວ່າເກົ່າເຊິ່ງບໍ່ພຽງແຕ່ຕ້ອງການມີຊີວິດດ້ານວັດຖຸແລະວັດທະນະທຳທີ່ມີລະດັບສູງກວ່າເກົ່າເທົ່ານັ້ນ, ຍັງຕ້ອງການໃຫ້ປະຊາທິປະໄຕ, ການປົກຄອງຕາມກົດໝາຍ, ຄວາມຍຸຕິທຳ, ຄວາມເປັນທຳ, ຄວາມປອດໄພ, ສິ່ງແວດລ້ອມ ແລະ ດ້ານອື່ນໆ ໄດ້ຮັບການປັບປຸງໃຫ້ມີລະດັບສູງຂຶ້ນແລະສົມບູນຂຶ້ນຢ່າງບໍ່ຢຸດຢັ້ງ.
ປະຊາຊົນມີຄວາມຮຽກຮ້ອງ, ການປະຕິຮູບຂອງລັດຖະບານກໍຕ້ອງມີການຕອບຮັບ. ເພື່ອໃຫ້ການກຳນົດນະໂຍບາຍ ດ້ານການປະຕິຮູບໄປຕາມຫລັກວິທະຍາສາດ, ສິ່ງທີ່ສຳຄັນຢ່າງໜຶ່ງກໍຄື: ຕ້ອງຮັບຟັງຄວາມເຫັນ ແລະ ຂໍ້ສະເໜີຂອງປະຊາຊົນຢ່າງກວ້າງຂວາງ. ໃນຫລາຍປີມານີ້, ທ່ານ ສີຈິ້ນຜິງ ເພິ່ນໄດ້ລົງໄປສຳ ຫລວດຄົ້ນຄວ້າ ຢູ່ທ່ອງຖິ່ນຕ່າງໆຫລາຍຄັ້ງ ເຊັ່ນ: ຕົວເມືອງ, ຊົນນະບົດ, ໂຮງຮຽນ, ວິສາຫະກິດ, ອົງການຄົ້ນຄວ້າວິທະຍາສາດແລະ ເຂດອະນຸລັກສິ່ງແວດລ້ອມນິເວດ ເປັນຕົ້ນ ເພື່ອຮັບຟັງສຽງໃນໃຈ ຂອງປະຊາຊົນກ່ອນກຳນົດນະໂຍບາຍ ແລະ ວາງແຜນການ.
ຕົວຢ່າງວ່າ: ເພື່ອຮ່າງຂໍ້ສະເໜີວ່າດ້ວຍການສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 14, ລະຫວ່າງເດືອນກໍລະກົດຫາເດືອນກັນຍາປີ 2020, ທ່ານ ສີຈິ້ນຜິງ ໄດ້ໂອ້ລົມສົນທະນາກັບເລຂາໜ່ວຍພັກບ້ານ, ຄູສອນເຂດຊົນນະບົດ, ພະນັກງານຫລຸດຜ່ອນຄວາມທຸກຍາກ, ແຮງງານຊົນນະບົດເຄື່ອນຍ້າຍ, ຄອບຄົວຜູ້ປູກພືດ ພັນທັນຍາຫານຢ່າງຫຼວງຫຼາຍ, ຜູ້ຂັບລົດບັນທຸກສິນຄ້າ, ອ້າຍບ່າວສົ່ງເຄື່ອງດ່ວນ, ເຈົ້າຂອງຮ້ານອາຫານ, ຜູ້ເຮັດວຽກກົດໝາຍ ແລະ ອື່ນໆ, ເພິ່ນຍັງໄດ້ເປັນປະທານກອງປະຊຸມ ສົນທະນາກັບຜູ້ແທນຂັ້ນຮາກຖານ7ຄັ້ງ.
ອີກຕົວຢ່າງໜຶ່ງຄື: ລະຫວ່າງເດືອນເມສາຫາເດືອນພຶດສະພາປີ 2022, ພັກກອມມູນິດຈີນ ໄດ້ຈັດກິດຈະກຳຂໍຄຳຄິດຄຳເຫັນຜ່ານທາງອິນເຕີເນັດ ກ່ຽວກັບວຽກງານກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ 20 ຂອງພັກກອມມູນິດຈີນ, ນີ້ເປັນເທື່ອທຳອິດໃນປະຫວັດສາດ ຂອງພັກກອມມູນິດຈີນ ທີ່ຂໍຄຳຄິດຄຳ ເຫັນຢ່າງເປີດເຜີຍຕໍ່ທົ່ວພັກ ແລະ ທົ່ວສັງຄົມກ່ຽວກັບກອງປະຊຸມໃຫຍ່ ຜູ້ແທນທົ່ວປະເທດຂອງພັກ. ໃນກິດຈະກຳຄັ້ງນີ້, ຍອດຈຳນວນການເຂົ້າອ່ານໜ້າເພຈ ຂໍຄວາມເຫັນຜ່ານເວທີຕ່າງໆໄດ້ບັນລຸເຖິງ 660 ລ້ານເທື່ອ ໂດຍໄດ້ເກັບກຳຄຳຄິດຄຳເຫັນ ແລະ ຄຳສະເໜີປະເພດຕ່າງໆຫລາຍກວ່າ 8.542.000 ຂໍ້, ໃນນີ້, ຜູ້ ຄອມເມັ້ນທີ່ໃຊ້ຊື່ແທ້ກວມຫລາຍກວ່າ 97%.
ໃນ 10 ກວ່າປີມານີ້, ພາຍໃຕ້ການນຳພາຂອງ ທ່ານປະທານ ສີຈິ້ນຜິງ, ຈີນໄດ້ດຳເນີນການປະຕິຮູບ ໃນຂົງເຂດຕາງໆຢ່າງຕໍ່ເນື່ອງ ເຊິ່ງລວມທັງການປິ່ນປົວພະຍາດ, ການສຶກສາ, ການອະນຸລັກສິ່ງແວດລ້ອມ, ການປະກັນສັງຄົມ ແລະ ອື່ນໆ ເຊິ່ງຈຸດສຸມທີ່ປະຊາຊົນ ໃຫ້ຄວາມສົນໃຈຫລາຍທີ່ສຸດ ທັງເປັນຂອດຍາກທີ່ສຸດໃນການປະຕິຮູບເປັນໄລຍາຍາວນານໄດ້ປັບປຸງໃຫ້ດີຂຶ້ນ.
ປັດຈຸບັນ, ການປະຕິຮູບໄດ້ມາສູ່ປະຫວັດສາດສຳຄັນອີກຄັ້ງໃໝ່. ກອງປະຊຸມຄົບຄະນ ະຄັ້ງທີ 3 ຂອງຄະນະກຳມະການສູນກາງພັກກອມມູນິດຈີນ ສະໄໝທີ XX ທີ່ຫາກໍສິ້ນສຸດລົງໃນເມື່ອບໍ່ດົນມານີ້ ໄດ້ສະເໜີໃຫ້ຍຶດໝັ້ນ ລົງເລິກການປະຕິຮູບ ຢ່າງຮອບດ້ານຕື່ມອີກ ຖືເອົາປະຊາຊົນເປັນໃຈກາງ, ຮັກສາທາດແທ້ ແລະ ປະດິດສ້າງ, ຍຶດໝັ້ນຖືເອົາການກໍ່ສ້າງ ດ້ານລະບຽບການເປັນຫລັກ, ຍຶດໝັ້ນການປົກຄອງປະເທດ ຕາມກົດໝາຍຢ່າງຮອບດ້ານ ແລະ ຍຶດໝັ້ນແນວຄິດຄວາມເປັນລະບົບ ເຊິ່ງໄດ້ເຕົ້າໂຮມສະຕິປັນຍາ ແລະ ບົດຮຽນອັນລ້ຳຄ່າຂອງຈີນ ແລະ ຈະເພີ່ມແຮງຂັບເຄື່ອນໃໝ່ ໃຫ້ແກ່ການປະຕິຮູບຂອງຈີນ, ການປະຕິຮູບທີ່ຖືເອົາປະຊາຊົນເປັນໃຈກາງ ແລະ ອາໄສປະຊາຊົນຢ່າງແໜ້ນແຟ້ນ ກໍຈະບຸກເບີກອະນາຍົດທີ່ກວ້າງຂວາງ ໃຫ້ແກ່ຄວາມທັນສະໄໝແບບຈີນ.
KPL
