ຂປລ
ມື້ນີ້ ຄໍລໍາສົ່ງເສີມທຸລະກິດ ຂໍປ່ຽນບັນຍາກາດຈາກຮ້ານອາຫານໃນນະຄອນຫລວງວຽງຈັນ ມາຢ້ຽມຢາມຮ້ານອາຫານ ທາງພາກເໜືອຂອງປະເທດລາວ ນັ້ນກໍຄືແຂວງອຸດົມໄຊ ເຊິ່ງມື້ນີ້ຮ້ານອາຫານທີ່ເຮົານໍາມາສະເໜີ ມີຊື່ວ່າຫາດສອງຄອນ ເຊິ່ງເປັນໜຶ່ງໃນສະຖານທີ່ທ່ອງທ່ຽວ ຂອງເມືອງປາກແບງ ແຂວງອຸດົມໄຊ.
*ມື້ນີ້ ຄໍລໍາສົ່ງເສີມທຸລະກິດ ຂໍປ່ຽນບັນຍາກາດຈາກຮ້ານອາຫານໃນນະຄອນຫລວງວຽງຈັນ ມາຢ້ຽມຢາມຮ້ານອາຫານ ທາງພາກເໜືອຂອງປະເທດລາວ ນັ້ນກໍຄືແຂວງອຸດົມໄຊ ເຊິ່ງມື້ນີ້ຮ້ານອາຫານທີ່ເຮົານໍາມາສະເໜີ ມີຊື່ວ່າຫາດສອງຄອນ ເຊິ່ງເປັນໜຶ່ງໃນສະຖານທີ່ທ່ອງທ່ຽວ ຂອງເມືອງປາກແບງ ແຂວງອຸດົມໄຊ ທີ່ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ ເນື່ອງຈາກວ່າ ສະຖານທີ່ຕັ້ງແມ່ນຢູ່ກ້ອງເຂື່ອນນໍ້າແບງ ຈຶ່ງເຮັດໃຫ້ບັນຍາກາດດີທີ່ອ້ອມຮອບໄປດ້ວຍພູຜາປ່າໄມ້ບວກກັບຕູບແຄມນໍ້າ ໄວ້ຄອຍບໍລິການລູກຄ້າ ໂດຍສະເພາະແມ່ນບຸນປີໃໝ່ລາວທີ່ໃກ້ຈະມາເຖິງນີ້.
ທ່ານ ນາງ ສີອຳພອນ ມະຫາວົງສະໜັ່ນ ນັກທຸລະກິດການບໍລິການຫາດສອງຄອນ ເວົ້າວ່າ: ຈຸດເລີ່ມຕົ້ນທີ່ໄດ້ມາເຮັດບໍລິການຫາດສອງຄອນແຫ່ງນີ້ ຍ້ອນເລັງເຫັນເຖິງທ່າແຮງດ້ານການທ່ອງທ່ຽວຢູ່ກ້ອງເຂື່ອນນໍ້າແບງ ເພື່ອໃຫ້ເປັນສະຖານທີ່ທ່ອງທ່ຽວ ຜັກຜ່ອນຂອງນັກທ່ອງທ່ຽວ ເນື່ອງຈາກວ່າເມືອງປາກແບງ ແຂວງອຸດົມໄຊ ແມ່ນເມືອງໜຶ່ງທີ່ຖືເອົາວຽກງານການບໍລິການ-ການທ່ອງທ່ຽວ ເປັນວຽກງານສຳຄັນ ໃນການຈັດເກັບລາຍຮັບເພື່ອສ້າງຄວາມເຂັ້ມແຂງໃຫ້ແກ່ການພັດທະນາເສດຖະກິດ-ສັງຄົມ ຂອງເມືອງ. ເມື່ອເວົ້າເຖິງ ການຕອບສະໜອງການບໍລິການ-ການທ່ອງທ່ຽວ ໃຫ້ມີຄວາມເຂັ້ມແຂງຢູ່ເມືອງປາກແບງ ສະຖານທີ່ບໍລິການ-ການທ່ອງທ່ຽວຫາດສອງຄອນ ກໍ່ເປັນສະຖານທີ່ທ່ອງທ່ຽວທາງທຳມະຊາດອີກແຫ່ງໜຶ່ງຂອງເມືອງປາກແບງຕັ້ງຢູ່ຫ່າງຈາກເທສະບານເມືອງ ປະມານ 2 ກິໂລແມັດ, ສະຖານທີ່ແຫ່ງນີ້ ຕັ້ງຢູ່ແຄມທາງມີ: ຮ້ານອາຫານ, ຕູບ, ເຕັ້ນ, ໂຕະ, ຕັ່ງ ຕັ້ງລຽບຕາມຝັ່ງນ້ຳແບງຈຶ່ງໄດ້ບັນຍາກາດທີ່ຄັກ ແລະ ທີ່ສວຍງາມ ໂດຍສະເພາະແມ່ນຍາມແລງຈະມີນັກທ່ອງທ່ຽວທະຍອຍກັນມານັ່ງຜ່ອນຄາຍແບບແຄັມປິ້ງຢູ່ແຄມນ້ຳເຢັນໆ ແນມເຫັນທໍາມະຊາດອ້ອມຂ້າງຍິ່ງເຮັດໃຫ້ລົດຊາດອາຫານແຊບຂຶ້ນຕື່ມ.
ສໍາລັບທຸລະກິດ ການບໍລິການຫາດສອງຄອນ ເລີ່ມເປີດບໍລິການມາແຕ່ປີ 2021 ລົງທຶນເບື້ອງຕົ້ນ 50 ລ້ານກວ່າກີບ ເມື່ອສັງເກດເຫັນແຂກຄົນເຂົ້າມາໃຊ້ບໍລິການຫລາຍຂຶ້ນ ຈຶ່ງເລີ່ມຂະຫຍາຍອອກຕາມຄວາມອາດສາມາດ ມາເຖິງປັດຈຸບັນສາມາດສ້າງລາຍຮັບຫລັງຫັກຄ່າໃຊ້ຈ່າຍໄດ້ເຖິງ 100 ລ້ານກີບຕໍ່ປີ. ສໍາລັບຈຸດເດັ່ນຂອງຫາດສອງຄອນທີ່ດຶງດູດນັກທ່ອງທ່ຽວແມ່ນອາກາດດີ, ທິວທັດທຳມະຊາດທີ່ສວຍງາມ, ມີການບໍລິການອາຫານຕາມສັ່ງຫລາຍປະເພດ ເປັນຕົ້ນແມ່ນປານ້ຳຂອງ ເຊິ່ງມີຫລາກຫລາຍລາຍການ ເຊັ່ນ: ລາບ, ກ້ອຍ, ລວກ ແລະ ປາລາດພິກ, ມີອາຫານທະເລທີ່ສົດໃໝ່, ອາຫານພື້ນເມືອງຫລາກຫລາຍປະເພດ ເປັນຕົ້ນແມ່ນຕົ້ມໄກ່ລາດ ທີ່ເປັນສູດດັ່ງເດີມສະເພາະຂອງຮ້ານ ແລະ ຍັງມີປະເພດຕຳແຊບ, ຕຳຕ່ອນ, ຕຳລວມທະເລ, ຕຳໝາກຮຸ່ງ ແລະ ອີກຫລາຍກວ່າ 20 ລາຍການອາຫານ ພ້ອມດ້ວຍເຄື່ອງດື່ມອີກຫລາກຫລາຍປະເພດ ໄວ້ຄອຍບໍລິການທ່ານ. ເອົາເປັນວ່າທ່ານໃດທີ່ໄດ້ໄປຢຽມຢາມແຂວງອຸດົມໄຊ ບໍ່ຮູ້ຈະໄປຫລີ້ນໃສກໍຢ້ຽມຍາມກິນອາຫານແຊບໆ ຢູ່ຫາດສອງຄອນ ຮັບຮອງວ່າບໍ່ຜິດຫວັງແນ່ນອນ ສໍາລັບທ່ານໃດໄປແລ້ວບໍ່ຮູ້ບ່ອນ ກໍສາມາດຕິດຕໍ່ສອບຖາມໄດ້ທີ່ເບີໂທ 020 5680 8333.
ທ່ານ ນາງ ສີອຳພອນ ເວົ້າຕື່ມວ່າ: ສໍາລັບບຸນປີໃໝ່ລາວທີ່ມາເຖິງນີ້ ຫາດສອຄອນກໍກຽມພ້ອມດ້ານເຄື່ອງສຽງ ແລະ ບໍລິການອື່ນໆ ພິເສດປີນີ້ ແມ່ນຈ້າງລິເກມາສ້າງຄວາມປະທັບໃຈໃຫ້ມວນຊົນທີ່ມາທ່ຽວຫາດສອງຄອນ.
ໂດຍ: ລູກສາວຫລ້າ
KPL
