ຂປລ
ໃນໂອກາດລາຍງານສະພາບການບໍລິຫານ ແລະ ສິ່ງທ້າທາຍຫລາຍດ້ານຕໍ່ການພັດທະນາເສດຖະກິດ-ສັງຄົມ ຂອງແຂວງສະຫວັນນະເຂດ ຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ແຂວງ ຊຸດທີ II ຈັດຂຶ້ນຢູ່ຫໍວັດທະນະທຳ ໄກສອນ ພົມວິຫານ ເມື່ອບໍ່ດົນມານີ້.
*ໃນໂອກາດລາຍງານສະພາບການບໍລິຫານ ແລະ ສິ່ງທ້າທາຍຫລາຍດ້ານຕໍ່ການພັດທະນາເສດຖະກິດ-ສັງຄົມ ຂອງແຂວງສະຫວັນນະເຂດ ຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ແຂວງ ຊຸດທີ II ຈັດຂຶ້ນຢູ່ຫໍວັດທະນະທຳ ໄກສອນ ພົມວິຫານ ເມື່ອບໍ່ດົນມານີ້ ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ໄດ້ຍົກໃຫ້ເຫັນວ່າ: ໃນໄລຍະ 6 ເດືອນຕົ້ນປີ 2024 ເຖິງວ່າການພັດທະນາເສດຖະກິດ-ສັງຄົມຂອງແຂວງໄດ້ຮັບຜົນສໍາເລັດຫລາຍດ້ານແຕ່ຍັງມີຫລາຍຂໍ້ຄົງຄ້າງ ແລະ ສິ່ງທ້າທາຍທີ່ຕ້ອງສືບຕໍ່ແກ້ໄຂໃຫ້ດີຂຶ້ນເປັນຕົ້ນ ແມ່ນຄວາມເປັນເຈົ້າການຂອງບັນດາພະແນກການ, ບັນດາເມືອງໃນການສຸມໃສ່ຈັດຕັ້ງປະຕິບັດບັນດາມະຕິສະໄໝສາມັນເທື່ອທີ 6 ຂອງສະພາປະຊາຊົນແຂວງຊຸດທີ II ແລະ ແກ້ໄຂບັນຫາເສດຖະກິດຕາມ ວາລະແຫ່ງຊາດຍັງຊັກຊ້າ ແລະ ບໍ່ທັນເປັນເຈົ້າການ ເປັນຕົ້ນ: ບັນຫາກະຕຸ້ນເສດຖະກິດພາຍໃນ, ຄວາມເປັນແບບຢ່າງໃນການຫັນສັງຄົມບໍລິໂພກໄປສູ່ສັງຄົມການຜະລິດບໍ່ທັນສູງ ໂດຍສະເພາະແມ່ນສົ່ງເສີມຜະລິດຕະພັນພາຍໃນ ຊຸກຍູ້ໃຫ້ປະຊາຊົນຊົມໃຊ້ ສິນຄ້າພາຍໃນ, ເພາະສ່ວນຫລາຍແມ່ນຍັງນິຍົມໃຊ້ສິນຄ້າຈາກພາຍນອກ, ແຕ່ລະເມືອງຍັງບໍ່ທັນມີສິນຄ້າຂອງຕົນເອງທີ່ເປັນລາຍຮັບຖາວອນ ເພື່ອເປັນທ່າແຮງສາມາດສ້າງເປັນເມືອງກຸ້ມຕົນເອງ ແລະ ການຂຸດຄົ້ນແຫລ່ງລາຍຮັບບົ່ມຊ້ອນບໍ່ທັນແຂງແຮງ ເກີດ ມີຊ່ອງວ່າງ.
ຄຽງຄູ່ກັນນີ້ ການປະຕິບັດວິໄນແຜນການ-ການເງິນ ບໍ່ທັນເຄັ່ງຄັດເທົ່າທີ່ຄວນ, ການລົງຕິດຕາມຊຸກຍູ້ກຸ່ມການຜະລິດຍັງບໍ່ທັນເລິກເຊິ່ງ, ການລົງເລິກດ້ານວິຊາການ(ການປູກ, ການລ້ຽງ) ແລະ ການເຂົ້າເຖິງຕະຫລາດຍັງຈຳກັດ ແລະ ຍັງປະປ່ອຍໃຫ້ ປະຊາຊົນເຮັດຕາມຄວາມເຄີຍຊິນ, ການນໍາພາຈັດຕັ້ງການຜະລິດ ໃນຫລາຍຮູບແບບບໍ່ທັນເປັນລະບົບ, ປະຊາຊົນຜະລິດເອງຕາມຄ່ານິຍົມ, ການແກ້ໄຂສະພາບປະກົດການຫຍໍ້ທໍ້ລຽບຕາມຊາຍແດນ ຍັງບໍ່ທັນໄດ້ດີ, ການແກ້ໄຂປະກົດການຫຍໍ້ທໍ້ໃນກົມກອງກໍ່ຄື ໃນສັງຄົມມີບາງບັນຫາບໍ່ທັນເປັນເອກະພາບ, ການແກ້ໄຂຊັກຊ້າແກ່ຍາວ ເຮັດໃຫ້ປະກົດການຫຍໍ້ທໍ້ບາງດ້ານ ຍັງບໍ່ໄດ້ຮັບການແກ້ໄຂ ໂດຍສະເພາະແມ່ນບັນຫາຂີ້ລັກງັດແງະ, ບັນຫາການມົ້ວສຸມສິ່ງເສບຕິດ ແລະ ບັນຫາອຸບັດເຫດ.
ນອກຈາກນີ້, ການຈັດຕັ້ງປະຕິບັດງົບປະມານຂອງລັດ ສໍາລັບໂຄງການລົງທຶນຂອງ ແຂວງສະໜອງໃສ່ໃນການພັດທະນາໂຄງລ່າງມີຈຳກັດ, ໜີ້ສິນຄຸມເຄືອແກ່ຍາວ, ບາງໂຄງການ ຄ້າງຊຳລະມາເກືອບ 20 ປີ, ບາງໂຄງການເຊັນສັນຍາແລ້ວ ແຕ່ 10 ປີ ຄືນຫລັງ ແຕ່ບໍ່ລົງມືເຮັດ ແລະ ໃນເມື່ອກ່ອນແມ່ນປະຕິບັດໂດຍອີງຕາມກົດໝາຍການລົງທຶນສະບັບເກົ່າ ເຊິ່ງແຂວງສາມາດພິຈາລະນາໂຄງການມູນຄ່າ 5 ຕື້ກີບລົງມາ ຈຶ່ງເຮັດໃຫ້ການສະເໜີເຂົ້າແຜນແມ່ນບໍ່ໝົດຕາມສັນຍາ, ສ່ວນສູງກວ່ານັ້ນ ແມ່ນສູນກາງ ເປັນຜູ້ຄຸ້ມຄອງ ໃນປັດຈຸບັນ ການຈັດຕັ້ງປະຕິບັດແມ່ນຍັງບໍ່ສໍາເລັດ, ໄລຍະຜ່ານມາ ແຂວງມີຫລາຍບໍລິສັດເຂົ້າມາສໍາປະທານເນື້ອທີ່ດິນ, ເຊົ່າທີ່ດິນລັດ, ແຮ່ທາດຕ່າງໆ ແຕ່ບໍ່ມີການພັດທະນາ, ເປັນການຈັບຈອງດິນມາຫລາຍສິບປີ ເຊິ່ງເປັນສິ່ງທ່ວງດຶງໃນການ ພັດທະນາແຂວງ ແລະ ອື່ນໆ.
ແຫລ່ງຂໍ້ມູນຈາກ: ແຂວງສະຫວັນນະເຂດ.
KPL
