*ນະຄອນຈໍາປາສັກ ຕັ້ງເປົ້າດຶງດູດນັກທ່ອງທ່ຽວໃຫ້ໄດ້ຢ່າງໜ້ອຍ 5-6 ແສນຄົນພາຍປີ 2024 ນີ້ ໂດຍເຊື່ອວ່າແຫລ່ງທ່ອງທ່ຽວເຂດເມືອງປາກຊ່ອງ, ເມືອງໂຂງ, ເມືອງຈໍາປາສັກ ຈະເປັນຈຸດເດັ່ນສ້າງຄວາມຄຶກຄື້ນໃຫ້ນັກທ່ອງທ່ຽວ ພາຍໃນ ແລະ ຕ່າງປະເທດ. ມ້ືນ້ີພວກເຮົາມາຮູ້ຈັກ 7 ແຫລ່ງທ່ອງທ່ຽວຍອດນິຍົມພາຍໃນນະຄອນຈໍາປາສັກຄື: ມໍລະດົກໂລກຜາສາດຫີນວັດພູ, ດິນແດນພູໄຟເກົ່າ (ເມືອງປາກຊ່ອງ), ຫລີ່ຜີ ຄອນພະເພງ, ຫົວລົດໄຟເກົ່າສະໄໝຝຣັ່ງ (ບ້ານຄອນ-ດອນເດດ), ຕາດຂະມືດ, ດ່ານສິນໄຊ ດົງຫລວງ, ຕາດຟານ ຕາດເຍືອງ ແລະ ອ່ືນໆ ເຊ່ິງໄດ້ກາຍເປັນຈຸດໝາຍປາຍທາງການທ່ອງທ່ຽວທີ່ມີຊື່ສຽງໂດ່ງດັງຮອງຈາກເມືອງມໍລະດົກໂລກຫລວງພະບາງ.

    ຫລ້າສຸດ ໃນວັນທີ 2 ກໍລະກົດ 2024 ນີ້ ນະຄອນຈໍາປະສັກ ໄດ້ຈັດກິດຈະກໍາຂີ່ລົດຖີບເພື່ອສົ່ງເສີມການທ່ອງທ່ຽວໂດຍເຂົ້າຮ່ວມຂອງ ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ, ທ່ານ ສະນັ່ນ ສີພາພົມມະຈັນ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ພ້ອມຄະນະນໍາຂອງແຂວງ, ມີ ທ່ານ ວັນນະໄຊ ຊາດຕະກຸນ ຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວແຂວງ, ທ່ານ ນາງ ຄໍາພູ ລິດທິສັກ ເຈົ້າເມືອງໆໂຂງ, ມີຂະແໜງການຂອງແຂວງ, ຫ້ອງການຂອງເມືອງ ແລະ ມວນຊົນເຂົ້າຮ່ວມ.

   ກິດຈະກຳຂີ່ລົດຖີບເພື່ອສົ່ງເສີມການທ່ອງທ່ຽວເລີ່ມຕົ້ນຈາກດອນເດດ ຂີ່ອ້ອມຮອບໄປຫາດອນຄອນ. ຈາກນັ້ນທ່ານ ເຈົ້າແຂວງຈໍາປາສັກ, ພ້ອມດ້ວຍຄະນະນໍາຂອງແຂວງ, ຄະນະນໍາຂອງເມືອງໂຂງ ໄດ້ສືບຕໍ່ຂີ່ລົດໄຟຟ້າທ່ຽວຊົມຈຸດທ່ອງທ່ຽວອ້ອມຮອບດອນເດດ ແລະ ດອນຄອນ, ໂດຍໃນໄລຍະໄດ້ທ່ຽວຊົມ, ຖ່າຍຮູບເປັນທ່ີລະນຶກຕາມສະຖານທີ່ທ່ອງທ່ຽວ ເຊັ່ນ: ທ່າກໍາປັ່ນ, ຫົວລົດໄຟ້ເກົ່າ, ຊົມທິວທັດທໍາມະຊາດອ້ອມດອນ, ຊົມນໍ້າຕົກຕາດ ສົມພະມິດ ໂດຍຢູ່ທີ່ນໍ້າຕົກຕາດສົມພະມິດ ມີບໍລິການຂີ່ສະລິງ, ຍ່າງຂົວອູ່ຜ່ານ ໜ້າຜານໍ້າຕົກຕາດທີ່ມີຄວາມສູງ. ໃນໂອກາດມາສະຖານທີ່ແຫລ່ງ ທ່ອງທ່ຽວນໍ້າຕົກຕາດສົມພະມິດ ທ່ານ ເຈົ້າແຂວງຈໍາປາສັກ, ໄດ້ນໍາ ພາການນໍາຂອງແຂວງ ເຂ້ົາຮ່ວມ ກິດຈະກຳຍ່າງຜ່ານຂົວອູ່ ຈໍານວນ 5 ເສັ້ນ, ທ່ີມີຄວາມທາທ້າຍດ້ານຄວາມສູງຂອງໜ້າຜາ, ແຕ່ມີຄວາມຮັບປະກັນເລື່ອງຄວາມປອດໄພ.

ໂດຍ: ເກີດຂວັນໃຈ ມາລີຈັນສີ

KPL