ຂປລ
ສປ ຈີນ ໄດ້ຍິງສົ່ງດາວທຽມ ວົງໂຄຈອນຕ່ຳ ສຳລັບ ອິນເຕີເນັດ ກຸ່ມທີ 29 ດ້ວຍຈະຫລວດ ສົ່ງຍານ CZ-12. ດາວທຽມ ໄດ້ເຂົ້າສູ່ວົງໂຄຈອນ ທີ່ກຳນົດໄວ້ ຢ່າງສະດວກ ເຮັດໃຫ້ພາລະກິດການຍິງສົ່ງຄັ້ງນີ້ ປະສົບຜົນ ສຳເລັດ ຢ່າງຈົບງາມ.
ຂປລ.ວິທະຍຸ ໂທລະພາບສູນກາງຈີນ,ວັນທີ 9 ພະຈິກນີ້, ຢູ່ສະໜາມຍິງສົ່ງການບິນອະວະກາດ ທາງການຄ້າໄຫຫລຳ,ສປ ຈີນ ໄດ້ຍິງສົ່ງດາວທຽມ ວົງໂຄຈອນຕ່ຳ ສຳລັບ ອິນເຕີເນັດ ກຸ່ມທີ 29 ດ້ວຍຈະຫລວດ ສົ່ງຍານ CZ-12. ດາວທຽມ ໄດ້ເຂົ້າສູ່ວົງໂຄຈອນ ທີ່ກຳນົດໄວ້ ຢ່າງສະດວກ ເຮັດໃຫ້ພາລະກິດການຍິງສົ່ງຄັ້ງນີ້ ປະສົບຜົນ ສຳເລັດ ຢ່າງຈົບງາມ. ດາວທຽມດັ່ງກ່າວ ໄດ້ຮັບຄວາມຮັບຜິດຊອບລວມ ໃນການຄົ້ນຄວ້າ ແລະ ຜະລິດໂດຍ ສະຖາບັນ ເລກທີ 5 ຂອງກຸ່ມບໍລິສັດ ວິທະຍາສາດ ເຕັກໂນໂລຊີການບິນ ອະວະກາດຈີນ. ຈະຫລວດສົ່ງຍານ CZ-12 ໄດ້ຮັບຄວາມຮັບຜິດຊອບລວມ ໃນການຄົ້ນຄວ້າ ແລະ ການຜະລິດ ໂດຍບໍລິສັດຈະຫລວດ ທາງການຄ້າທີ່ຂຶ້ນກັບກຸ່ມບໍລິສັດວິທະຍາສາດເຕັກໂນໂລຊີ ການບິນອະວະກາດຈີນ, ຄົ້ນຄວ້າ ແລະ ຜະລິດໂດຍສະຖາບັນເລກທີ 8, ມີຄວາມຍາວ ປະມານ 62 ແມັດ, ແມ່ນຈະຫລວດ ສົ່ງຍານລຳທຳອິດຂອງ ສປ ຈີນ ທີ່ມີເສັ້ນຜ່ານສູນກາງຂັ້ນ 4 ແມັດ ແລະ ແບບແກນດຽວ. ນີ້ແມ່ນການປະຕິບັດພາລະກິດ ຍິງສົ່ງຄັ້ງທີ 676 ຂອງຈະຫລວດສົ່ງຍານລະບົບ CZ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
