ຂປລ
ຂປລ. ພິທີສອບເສັງ ຈົບຊັ້ນ ມ7 ໃນຂອບເຂດທົ່ວປະເທດ ໄດ້ຈັດຂຶ້ນຢ່າງເປັນທາງການ ໃນລະຫວ່າງວັນທີ 19-21 ມິຖຸນາ 2024 ນີ້, ສະເພາະຢູ່ ນະຄອນຫລວງວຽງຈັນ (ນວ) ໄດ້ຈັດພິທີເປີດຫົວບົດສອບເສັງ ຢູ່ ໂຮງຮຽນ ມສ ວຽງຈັນ ເມືອງຈັນທະບູລີ
![](https://kpl.gov.la/Media/Upload/News/Thumb/2024/06/19/25.jpg)
ຂປລ. ພິທີສອບເສັງ ຈົບຊັ້ນ ມ7 ໃນຂອບເຂດທົ່ວປະເທດ ໄດ້ຈັດຂຶ້ນຢ່າງເປັນທາງການ ໃນລະຫວ່າງວັນທີ 19-21 ມິຖຸນາ 2024 ນີ້, ສະເພາະຢູ່ ນະຄອນຫລວງວຽງຈັນ (ນວ) ໄດ້ຈັດພິທີເປີດຫົວບົດສອບເສັງ ຢູ່ ໂຮງຮຽນ ມສ ວຽງຈັນ ເມືອງຈັນທະບູລີ ໂດຍມີ ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ ໂດຍມີນັກສອບເສັງທັງໝົດ 9.427 ຄົນ, ຍິງ 4.863 ຄົນ. ໃນຂະນະທີ່ ການສອບເສັງຈົບຊັ້ນ ມ4 ໄດ້ສຳເລັດແລ້ວ ໃນລະຫວ່າງວັນທີ 11-13 ມິຖຸນາ 2024 ຜ່ານມານີ້.
![](https://kpl.gov.la/Media/Upload/News/Thumb/2024/06/19/22.jpg)
ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນ ລາຍງານໃຫ້ຮູ້ວ່າ: ການສອບເສັງ ຈົບຊັ້ນ ມ7 ຢູ່ນະຄອນຫລວງວຽງຈັນ ມີນັກສອບເສັງທັງໝົດ 9.427 ຄົນ, ຍິງ 4.863 ຄົນ, ມີຫ້ອງສອບເສັງ 455 ຫ້ອງ, ສະເລ່ຍຫ້ອງລະ 22-23 ຄົນ, ແຕ່ລະຫ້ອງນັ່ງໂຕະລະ 1 ຄົນ, ມີກໍາມະການຍາມຫ້ອງເສັງ ທັງໝົດ 1.231 ຄົນ ປະຈຳຢູ່ແຕ່ລະສູນສອບເສັງ ເຊິ່ງຈັດເປັນ 22 ສູນສອບເສັງ. ໃນນັ້ນ, ເມືອງ ຈັນທະບູລີ ຈັດເປັນ 2 ສູນສອບເສັງ, ເມືອງ ສີໂຄດຕະບອງ 3 ສູນສອບເສັງ, ເມືອງ ໄຊເສດຖາ 3 ສູນສອບເສັງ, ເມືອງສີສັດຕະນາກ 2 ສູນສອບເສັງ, ເມືອງນາຊາຍທອງ 2 ສູນສອບເສັງ, ເມືອງໄຊທານີ 6 ສູນສອບເສັງ, ເມືອງ ຫາດຊາຍຟອງ 1 ສູນສອບເສັງ, ເມືອງ ສັງທອງ 1 ສູນສອບເສັງ ແລະ ເມືອງ ປາກງື່ມ ມີ 2 ສູນສອບເສັງ.
![](https://kpl.gov.la/Media/Upload/News/Thumb/2024/06/19/24.jpg)
ສຳລັບ ການກວດບົດສອບເສັງຂອງນ້ອງນັກຮຽນ ແມ່ນນຳໃຊ້ເຄື່ອງຈັກ ກໍຄື ລະບົບຄອມພິວເຕີ ເຂົ້້າໃນການກວດບົດສອບເສັງ ແນໃສ່ເຮັດໃຫ້ຜົນການສອບເສັງ ຂອງນ້ອງນັກຮຽນ ຖືກຕ້ອງ, ໂປ່ງໃສ, ວ່ອງໄວ ໄດ້ທັງປະລິມານ ແລະ ຄຸນນະພາບ.
![](https://kpl.gov.la/Media/Upload/News/Thumb/2024/06/19/26.jpg)
ປັດຈຸບັນ ໂຮງຮຽນມັດທະຍົມສຶກສາ ທົ່ວນະຄອນຫລວງວຽງຈັນ ມີທັງໝົດ 197 ແຫ່ງ. ໃນນັ້ນ, ມີໂຮງຮຽນເອກະຊົນ 90 ແຫ່ງ, ໂຮງຮຽນລັດມີ 106 ແຫ່ງ, ໂຮງຮຽນທີ່ມີຊັ້ນ ມ4 ມີ 175 ແຫ່ງ, ເພີ່ມຂຶ້ນ 4 ແຫ່ງ, ຈຳນວນນັກຮຽນ ມ4 ມີທັງໝົດ 12.391 ຄົນ, ຍິງ 6.294 ຄົນ ແລະ ໂຮງຮຽນທີ່ມີຊັ້ນ ມ7 ມີ 114 ແຫ່ງ, ເພີ່ມຂຶ້ນ 6 ແຫ່ງ, ໃນນັ້ນ, ມີນັກຮຽນທັງໝົດ 9.427 ຄົນ, ຍິງ 4.863 ຄົນ.
ຂ່າວ-ພາບ: ທະນູທອງ
KPL