ຂປລ. ພິທີລົງນາມ ສປປ ລາວ ເຂົ້າຮ່ວມເປັນສະມາຊິກຂອງ ສະຫະພັນອາຫານໃນໂຮງຮຽນ (School Meals Coalition) ຈັດຂຶ້ນໃນວັນທີ 4 ກັນຍາ 2024 ທີ່ນະຄອນຫລວງວຽງຈັນ ເຊິ່່ງການເຂົ້າຮ່ວມສະຫະພັນດັ່ງກ່າວ, ​ແມ່ນແນໃສ່ເສີມສ້າງ ຄວາມເຂັ້ມແຂງດ້ານໂພຊະນາການ, ການສຶກສາ ແລະ ສະຫວັດດີການຂອງເດັກ ໂດຍຜ່ານແຜນງານອາຫານ ໃນໂຮງຮຽນແບບຄົບວົງຈອນ ເຊິ່ງເປັນບາດກ້າວສຳຄັນ ທີ່ສະທ້ອນໃຫ້ເຫັນຄວາມມຸ່ງໝັ້ນຂອງ ລັດຖະບານລາວຢ່າງຕໍ່ເນື່ອງ ໃນການປັບປຸງດ້ານສຸຂະພາບ ແລະ ການສຶກສາຂອງເດັກນ້ອຍ ໃນຂອບເຂດທົ່ວປະເທດ.

ການເຂົ້າຮ່ວມເປັນສະມາຊິກ ສະຫະພັນອາຫານໃນໂຮງຮຽນຂອງ ສປປ ລາວ ຖືເປັນຂີດໝາຍສຳຄັນ ຂອງປະເທດ ໃນການປັບປຸງການບັນລຸເປົ້າໝາຍ ດ້ານການສຶກສາ ໂດຍຜ່ານຜົນການຮຽນທີ່ເພີ່ມຂຶ້ນ, ພ້ອມດຽວກັບການຫລຸດຜ່ອນຄວາມສ່ຽງ ຕໍ່ກັບການຂາດສານອາຫານ ຂອງເດັກນ້ອຍ, ຫລາຍກວ່າ 33% ຂອງເດັກນ້ອຍໃນ ສປປ ລາວ ຍັງປະສົບກັບບັນຫາການຂາດສານ ອາຫານແບບຊໍາເຮື້ອ ສົ່ງຜົນກະທົບຕໍ່ການພັດທະນາ ທາງດ້ານສະຕິປັນຍາ ແລະ ຜົນການຮຽນຂອງເຂົາເຈົ້າ. ປັດຈຸບັນ ແຜນງານສົ່ງເສີມອາຫານທ່ຽງໃນໂຮງຮຽນ ກວມເອົາປະມານ 25% ຂອງໂຮງຮຽນປະຖົມ ທັງໝົດໃນທົ່ວປະເທດ. ໃນນັ້ນ, ມີເດັກນ້ອຍປະມານ 250.000 ຄົນ ໄດ້ຮັບຜົນປະໂຫຍດຈາກວຽກງານດັ່ງກ່າວ.

ໃນຖານະທີ່ເປັນສະມາຊິກໃໝ່ ຂອງສະຫະພັນອາຫານໃນໂຮງຮຽນ, ສປປ ລາວ ຈະສຸມໃສ່ການສົ່ງເສີມ ແລະ ການຂະຫຍາຍແຜນງານ ສົ່ງເສີມອາຫານທ່ຽງໃນໂຮງຮຽນ ດ້ວຍການຮ່ວມມືກັບບັນດາຄູ່ຮ່ວມ ພັດທະນາທັງພາຍໃນ ແລະ ຕ່າງປະເທດ ເພື່ອປັບປຸງ ແລະ ພັດທະນາແຜນງານ ໃຫ້ມີຄວາມຍືນຍົງ ແລະ ຕອບສະໜອງຄວາມຕ້ອງການດ້ານສານອາຫານຂອງນັກຮຽນ, ພ້ອມກັນນັ້ນ, ກໍຈະສົ່ງເສີມການສະໜັບສະໜູນ ການຜະລິດກະສິກຳ ແລະ ເສດຖະກິດທ້ອງຖິ່ນ ອີກດ້ວຍ.

ທ່ານ  ພຸດ ສິມມາລາວົງ  ລັດຖະມົນຕີກະຊວງສຶກສາ ແລະ ກິລາ ໄດ້ມີ​ຄໍາ​ເຫັນວ່າ: ການເຂົ້າຮ່ວມເປັນສະມາຊິກຂອ ງສະຫະພັນອາຫານໃນໂຮງຮຽນ ແມ່ນບາດກ້າວສຳຄັນ ຕໍ່ກັບຍຸດທະສາດແຫ່ງຊາດ ຂອງປະເທດ ໃນການປັບປຸງສຸຂະພາບ ແລະ ການສຶກສາຂອງເດັກ; ການໃຫ້ອາຫານທີ່ມີ ໂພຊະນາການໃນໂຮງຮຽນ ແມ່ນມີຄວາມຈໍາເປັນ ບໍ່ພຽງແຕ່ເຮັດໃຫ້ນັກຮຽນ ມີສຸຂະພາບແຂງແຮງເທົ່ານັ້ນ, ແຕ່ຍັງເຮັດໃຫ້ເຂົາເຈົ້າ ບັນລຸຜົນສໍາເລັດດ້ານການຮຽນຮູ້ ແລະ ກາຍເປັນຊັບພະຍາກອນມະນຸດ ທີ່ມີຄຸນນະພາບ, ປະກອບສ່ວນເຂົ້າໃນ ການພັດທະນາປະເທດຊາດ. ສປປ ລາວ ມີແຜນພັດທະນາແຫ່ງຊາດ ດ້ານໂພຊະນາການໃນໂຮງຮຽນ ນັບຕັ້ງແຕ່ປີ 2000 ຮ່ວມກັບຄູ່ຮ່ວມງານເຊັ່ນ: ອົງການອາຫານໂລກ (WFP), ອົງການບັນເທົາທຸກກາໂຕລິກ (CRS) ແລະ ທະນາຄານໂລກ ເຊິ່ງໄດ້ຮັບການສະໜັບສະໜູນຈາກ ຜູ້ໃຫ້ທຶນຫລາຍປະເທດດ້ວຍກັນ. ແຜນງານສົ່ງເສີມວຽກງານ ອາຫານທ່ຽງໃນໂຮງຮຽນ ໄດ້ດຳ ເນີນການຈັດຕັ້ງປະຕິບັດ ຢ່າງເປັນທາງການໃນປີ 2010 ໃນເຂດພື້ນທີ່ບູລິມະສິດຂອງລັດຖະບານ ໂດຍສະເພາະ ໃນຂົງເຂດທີ່ມີຄວາມສ່ຽງຕໍ່ດ້ານສະບຽງອາຫານ ແລະ ການຂາດສານອາຫານສູງ. ການເຂົ້າຮ່ວມ​ເປັນສະ​ມາ​ຊິກ​ຂອງສະຫະພັນດັ່ງກ່າວ, ຍັງໄດ້ສ້າງໂອກາດໃຫ້ ສປປ ລາວ ໃນການເຂົ້າຮ່ວມການສົນທະນາ ໃນລະດັບສາກົນ, ແລກປ່ຽນປະສົບການ ແລະ ຮຽນຮູ້ຈາກຜົນສຳເລັດ ຂອງບັນດາປະເທດທີ່ເປັນສະມາຊິກ ໂດຍລວມແລ້ວ, ຈະຊ່ວຍໃຫ້ ສປປ ລາວ ສາມາດບັນລຸບັນດາເປົ້າໝາຍ ການພັດທະນາ ໃນລະດັບຊາດ ແລະ ສາກົນ ຕາມກຳນົດເວລາທີ່ເໝາະສົມ ແລະ ປະກອບສ່ວນເຂົ້າໃນການພັດທະນາສັງຄົມ ໃຫ້ມີຄວາມເຂັ້ມແຂງ, ມີການສຶກສາ ແລະ ມີຄວາມຈະເລີນຮຸ່ງເຮືອງຫລາຍຂຶ້ນ.

ໂອກາດດຽວກັນ, ທ່ານ ນາງ ຊີວແລັງ ຊູອອກ ເອກອັກຄະລັດຖະທູດຝຣັ່ງ ປະຈຳ ສປປ ລາວ ກໍໄດ້​ເນັ້ນ​​ວ່າ: ລັດຖະບານຝຣັ່ງ ມີຄວາມ​ດີ​ໃຈຢ່າງຍິ່ງ​ທີ່ ສປປ ລາວ ​ເຂົ້າ​ເປັນ​ສະມາຊິກ​​ສະຫະພັນອາ ຫານໃນໂຮງຮຽນ ​ເພາະວ່າ​ລັດຖະບານຝຣັ່ງ ໄດ້ມີສ່ວນຮ່ວມໃນ ການສະໜັບສະໜູນ ເຂົ້າ​ເປັນ​ສະມາ ຊິກ. ສປປ ລາວ ແມ່ນໜຶ່ງໃນບັນດາປະເທດບຸລິມະສິດ ຂອງລັດຖະບານຝຣັ່ງ ໃນການປັບປຸງວຽກງານ ດ້ານໂພຊະນາການ ເນື່ອງຈາກລັດຖະບານລາວ ໄດ້ຖືເອົາວຽກອາຫານທ່ຽງ ໃນໂຮງຮຽນເປັນວຽກບຸລິມະສິດອັນໜຶ່ງ ເພື່ອສ້າງເງື່ອນໄຂໃຫ້ແກ່ ການພັດທະນາປະເທດ ແລະ ປະຊາຊົນ. ​ດັ່ງນັ້ນ, ລັດຖະບານ ຝຣັ່ງ ຈຶ່ງ​ໄດ້​ໃຫ້ການ​ສະໜັບສະໜູນ​​ ການປັບປຸງຕໍ່ກັບ​ບັນຫາ​​ຄວາມ ບໍ່​ໝັ້ນຄົງ​ດ້ານ​ສະບຽງ​ອາຫານ ​ແລະ ການຂາດ​ສານ​ອາຫານ​ ໃນ​ ສປປ ລາວ ​ໂດຍ​ຜ່ານ​ອົງການ​ອາຫານ​ໂລກ​ ນັບ​ແຕ່​ປີ 2019 ​ເປັນ​ຕົ້ນ​ມາ, ດ້ວຍ​ການ​ປະກອບສ່ວນ ​ເປັນງົບປະມານ 3,3 ລ້ານ​ເອີ​ໂຣ.

ຂ່າວ: ກິດຕາ

KPL