ຂປລ
ໂດຍປະຕິບັດຕາມທິດທາງໃນການປັບປຸງກໍ່ສ້າງ ກຳລັງປະກອບອາວຸດ ໃຫ້ມີຄວາມເຂັ້ມແຂງໜັກແໜ້ນ ກາຍເປັນກອງທັບປະຕິວັດມີລະບຽບແຜນທັນສະໄໝ, ບໍ່ວ່າກົມກອງກຳລັງຫລວງ-ກຳລັງທ້ອງຖິ່ນໃນກຳລັງປະກອບອາວຸດກອງທັບປະຊາຊົນລາວ ເວລາໃດກໍ່ຖືສຳຄັນຕໍ່ວຽກງານປັບປຸງກໍ່ສ້າງກົມກອງຕິດພັນກັບການສ້າງເສດຖະກິດ ແກ້ໄຂຊີວິດການເປັນຢູ່ຂອງພະນັກງານ-ນັກຮົບໃຫ້ດີຂ້ຶນເທື່ອລະກ້າວ.
*ໂດຍປະຕິບັດຕາມທິດທາງໃນການປັບປຸງກໍ່ສ້າງ ກຳລັງປະກອບອາວຸດ ໃຫ້ມີຄວາມເຂັ້ມແຂງໜັກແໜ້ນ ກາຍເປັນກອງທັບປະຕິວັດມີລະບຽບແຜນທັນສະໄໝ, ບໍ່ວ່າກົມກອງກຳລັງຫລວງ-ກຳລັງທ້ອງຖິ່ນໃນກຳລັງປະກອບອາວຸດກອງທັບປະຊາຊົນລາວ ເວລາໃດກໍ່ຖືສຳຄັນຕໍ່ວຽກງານປັບປຸງກໍ່ສ້າງກົມກອງຕິດພັນກັບການສ້າງເສດຖະກິດ ແກ້ໄຂຊີວິດການເປັນຢູ່ຂອງພະນັກງານ-ນັກຮົບໃຫ້ດີຂ້ຶນເທື່ອລະກ້າວ, ໃນນີ້, ເວົ້າສະເພາະສູນຝຶກກອງພົນທີ 5 ກໍ່ແມ່ນກົມກອງໜຶ່ງທີ່ມີໜ້າທີ່ໃນການປົກປັກຮັກສາ ແລະ ສ້າງສາພັດທະນາປະເທດ ທັງເປັນບ່ອນຝຶກຝົນຫລໍ່ຫລອມພະນັກງານ-ນັກຮົບຮຸ່ນສືບທອດໃຫ້ແກ່ກອງທັບ.
ສະຫາຍ ພັນໂທ ໜອນຄຳ ພີມມະສອນ ຮອງຫົວໜ້າການເມືອງສູນຝຶກກອງພົນທີ 5 ໃຫ້ຮູ້ວ່າ: ເພື່ອຕອບສະໜອງກັບຄວາມຮຽກຮ້ອງຕ້ອງການໃນສະເພາະໜ້າ ແລະ ຍາວນານ ໃຫ້ທັນກັບສະພາບການໃນໄລຍະໃໝ່ກໍ່ຄື: ໄລຍະແຫ່ງການປົກປັກຮັກສາ ແລະ ສ້າງສາພັດທະນາປະ ເທດຊາດ ສ້າງໃຫ້ກຳລັງປະກອບອາວຸດ ກາຍເປັນກອງທັບປະຕິວັດມີແບບແຜນທັນສະໄໝ. ໃນນີ້ສູນຝຶກພວກເຮົາກໍ່ໄດ້ເອົາໃຈໃສ່ປະຕິບັດທຸກມະຕິຄຳສັ່ງຂອງຂັ້ນເທິງຢ່າງເຂັ້ມງວດ ໂດຍຈັດຕັ້ງຜັນຂະຫຍາຍມະຕິວ່າດ້ວຍ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດ, ມະຕິຂອງກອງປະຊຸມໃຫຍ່ ຄັ້ງ VI ຂອງອົງຄະນະພັກກອງພົນທີ 5 ຕິດພັນກັບການປະຕິບັດມະຕິ ຂອງກອງປະຊຸມໃຫ່ຍຂ້ັນຂອງຕົນວາງອອກໃຫ້ກາຍເປັນຮູບປະທຳຕົວຈິງ, ໄປພ້ອມໆກັບການກໍ່ສ້າງພະນັກງານ-ນັກຮົບ ໃຫ້ມີຄຸນທາດການເມືອງ ຄຸນສົມບັດສິນທຳປະຕິວັດ ໂດຍຖືເອົາການສຶກສາອົບຮົມ ການເມືອງແນວຄິດເປັນກົກສ້າງໃຫ້ເຂົາເຈົ້າ ມີຄວາມຈົ່ງຮັກພັກດຕໍ່ປະເທດຊາດປະກອບສ່ວນຢ່າງຕັ້ງໜ້າ ເຂົ້າໃນຂະບວນການດ້ານຕ່າງໆຂອງກົມກອງ ເຮັດໃຫ້ຂະບວນການພາຍໃນສູນຝຶກມີບັນຍາກາດຟົດຟື້ນ.
ຕິດພັນກັບຂະບວນການດັ່ງກ່າວ ຍັງໄດ້ຊຸກຍູ້ຊີ້ນຳຜູ້ຮັບຜິດຊອບວຽກງານພະລາທິການສຸມໃສ່ວຽກງານການສ້າງເສດຖະກິດ ເພື່ອແກ້ໄຂຊີວິດການເປັນຢູ່ຂອງພະນັກງານ-ນັກຮົບ ແລະ ສ້າງລາຍຮັບເຂົ້າໃນການພັດທະນາກົມກອງ ໃຫ້ມີໂສມໜ້າໃໝ່. ສະຫາຍ ພັນໂທ ໂກະ ໂພທິສານ ຫົວໜ້າພະລາທິການສູນຝຶກກອງ ພົນທີ 5 ໃຫ້ຮູ້ຕື່ມວ່າ: ວຽກງານສ້າງເສດຖະກິດ ແກ້ໄຂຊີວິດການເປັນຢູ່ໄດ້ເຊີດຊູຈິດໃຈທີ່ວ່າ: ເພິ່ງຕົນເອງກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໃນນີ້ການປູກ ໄດ້ເລັ່ງໃສ່ການປູກມັນຕົ້ນໃນເນື້ອທີ່ 4,5 ເຮັກຕາ ເກັບກູ້ໄດ້ຈຳນວນ 22.066 ກິໂລ ເປັນເງິນ 25.400.000 ກີບ, ປູກພືດຜັກຊະນິດຕ່າງໆເກັບກູ້ໄດ້ 28.200 ກິໂລ, ລ້ຽງໝູ ຈຳນວນ 4 ໂຕ ໄລ່ເປັນເງິນ 5.630.000 ກີບ, ແບ້ 5 ໂຕ ເປັນເງິນ 4.325.000 ກີບ, ລ້ຽງສັດປີກ ( ເປັດ,ໄກ່) ຈຳນວນ 180 ກວ່າໂຕ ເປັນເງິນ 11.500.000 ກີບ, ນອກນັ້ນຍັງໄດ້ຊອກແຫລ່ງລາຍຮັບຈາກການບໍລິການອື່ນໆ ເປັນເງິນ 87.960.000 ກີບ.
ສັງລວມໃນປີຜ່ານມາແລ້ວ ກົມກອງສາມາດສ້າງລາຍຮັບໄດ້ຈາກແຫລ່ງຕ່າງໆທັງໝົດ 134.815.000 ກີບ, ແຫລ່ງລາຍຮັບຈຳນວນດັ່ງກ່າວຕົ້ນຕໍແມ່ນໄດ້ໝູນໃຊ້ເຂົ້າໃນການປັບປຸງກໍ່ສ້າງພື້ນຖານໂຄງລ່າງຂອງກົມກອງ ໃຫ້ເປັນລະບົບລະບຽບແໜ້ນໜາຖາວອນ ເປັນກອງວັດທະນະທຳຕາມທິດນຳຂອງຂັ້ນເທິງ, ເຊັ່ນ: ກໍ່ສ້າງເຮືອນພັກປ້ອງກັນ 1 ຫລັງ, ກໍ່ສ້າງກຳລັງດ້ານໜ້າປະຕູໂຂງ, ເຮັດປ້າຍໂຄສະນາຄຳຂວັນປຸກລະດົມພາຍໃນກົມກອງ, ເທເປຕົງທາງເຂົ້າປະຕູໂຂງ ແລະ ເທເປຕົງຕໍ່ໜ້າຫ້ອງການ, ເຮັດໂຕະ, ຕັ່ງເຂົ້າໃສ່ສະໂມສອນຫ້ອງຮຽນ ແລະ ກໍ່ໜານດອກໄມ້ທາງເຂົ້າປະຕູໂຂງໃຫຍ່ ແລະ ອື່ນໆ, ຕໍ່ຜົນງານດັ່ງກ່າວກົມກອງ ຈິ່ງສາມາດຮັບຮອງເປັນກອງວັດທະນະທຳ 3 ສະໄໝ ຕິດຕໍ່ກັນ.
ບົດໂດຍ: ແສງອາທິດ ສີດາໄລ
ພາບ: ບຸນລົມ ສີພັນດົງ
KPL
