*ຕາດກວາງຊີ ເປັນນໍ້າຕົກຕາດທີ່ນັກທ່ອງທ່ຽວພາຍໃນ ແລະ ຕ່າງປະເທດນິຍົມໄປສຳພັດແຕ່ລະມື້ຢ່າງບໍ່ຂາດສາຍ ເມື່ອໄດ້ໄປແຂວງ ຫລວງພະບາງ ເພື່ອໄປພັກຜ່ອນຢ່ອນອາລົມ, ຫລິ້ນນໍ້າ, ສຳພັດມົນສະເໜ່ຄວາມງົດງາມຂອງນ້ຳຕົກຕາດ, ທິວທັດທໍາມະຊາດອັນສວຍສົດງົດງາມທີ່ທຳມະຊາດສ້າງໄວ້.  ນ້ຳຕົກຕາດກວາງຊີ ເປັນແຫລ່ງທ່ອງທ່ຽວທີ່ມີຊື່ສຽງທາງທຳມະຊາດ ທັງແມ່ນຈຸດໝາຍປາຍທາງຂອງນັກທ່ອງທ່ຽວພາຍໃນ ແລະ ຕ່າງປະເທດເມື່ອມາຮອດມາເຖິງແຂວງຫລວງພະບາງແລ້ວ ຕ້ອງມາທ່ຽວຊົມພັກຜ່ອນໃຫ້ໄດ້ ເຊິ່ງມີໄລຍະທາງຫ່າງຈາກເທສະບານເມືອງຫລວງພະບາງ ປະມານກວ່າ 30 ກິໂລແມັດ ໂດຍໃຊ້ເວລາເດີນທາງຈາກຕົວເມືອງໄປຫາຕາດປະມານ 1 ຊົ່ວໂມງ ດ້ວຍລົດທີ່ມີເສັ້ນທາງເຂົ້າເຖິງສະດວກສະບາຍ.

     ສຳລັບຕາດກວາງຊີ ກໍ່ມີປະຫວັດຄວາມເປັນມາ ໂດຍການເລົ່າຂານຂອງຜູ້ເຖົ້າກັນວ່າ: ໃນເມື່ອກ່ອນໄດ້ມີພະລືສີອົງໜຶ່ງ ໄດ້ໃຊ້ໄມ້ເທົ້າຊີເຂົ້າໃນດິນເພື່ອໃຫ້ເກີດມີນ້ຳອອກມາໃຊ້. ສະນັ້ນ, ຈຶ່ງເກີດຫ້ວຍຊີແຫ່ງນີ້ຂຶ້ນມາ ເມື່ອກະແສນ້ຳໄຫລອອກມາຕົກໃສ່ຜາຫີນສູງນີ້ ຈຶ່ງເກີດມີຕາດ ແລະ ໄດ້ມີຄົນເຫັນກວາງຄໍາໂຕໜຶ່ງອາໄສຢູ່ກ້ອງລືບຫີນຊັ້ນກາງຂອງນ້ຳຕົກ ເຊິ່ງລືບຫີນຊ້ັນດ່ັງກ່າວ ແມ່ນໄດ້ງອກຍືດຍາວອອກມາ ເຮັດໃຫ້ນ້ຳທີ່ໂຕນຢູ່ໃນຊັ້ນລືບຫີນນີ້ມີສຽງດັງກ້ອງກັງວານໄປທົ່ວບໍລິເວນ. ແຕ່ຕ່ໍມາຊ້ັນຫີນງອກນັ້ນ ກໍໄດ້ຫັກພັງລົງ ເຖິງຢ່າງໃດກໍຕາມນ້ຳຕົກຕາດກວາງຊີ ແຫ່ງນີ້ ກໍຍັງມີຄວາມງາມຍັງເປັນທີ່ດຶງດູດໃຫ້ນັກທ່ອງທ່ຽວນິຍົມກັນເຂົ້າມາທ່ຽວຊົມຢ່າງບໍ່ຂາດສາຍໃນແຕ່ລະມື, ແຕ່ລະເດືອນ.

     ຕາດກວາງຊີ  ແມ່ນໄດ້ມາຈາກ “ຕາດ” ແມ່ນນ້ຳຕົກ, “ກວາງ” ແມ່ນກວາງຄໍາ ແລະ “ຊີ” ແມ່ນພະລືສີໃຊ້ໄມ້ເທົ້າຊີດິນ ເພື່ອໃຫ້ເກີດນ້ຳໄຫລອອກມາດັ່ງທີ່ພວກເຮົາເຫັນຄວາມສວຍງາມໃນປັດຈຸບັນນີ້. ສາຍນ້ຳຊີທີ່ໄຫລລົງມາຫາຕາດນັ້ນ ແມ່ນໄຫລອອກມາຈາກຫ້ວຍຕີນພູທີ່ມີຄວາມໃສເຢັນສະອາດໄກຈາກຫົວຕາດປະມານ 4 ກິໂລແມັດ ມີນ້ຳຫລາຍສາຍ ແລະ ຫລາຍແງ່ໄຫລໂຮມເຂົ້າກັນ ແລະ ມີຫລາຍວັງນ້ຳ ອັນປະກອບໄປດ້ວຍທິວທັດທໍາມະຊາດທີ່ສວຍສົດງົດງາມທີ່ສຸດ, ຕາດກວາງຊີມີຄວາມສູງ 71 ແມັດ, ກວ້າງສຸດ 35 ແມັດ, ປະກອບດ້ວຍ 6 ຊັ້ນ ແລະ ສູງຈາກລະດັບໜ້ານ້ຳທະເລ ປະມານ 460-560 ແມັດ, ໃນໄລຍະທີ່ຜ່ານມາຕາດນີ້ເຄີຍຫັກ ແລະ ຍຸບຕົວລົງ 2 ຄັ້ງຄື: ກ່ອນນີ້ 70 ປີ ແລະ ຄັ້ງວັນ ທີ 04/12/2011 ຜ່ານມາ.

    ສະເພາະລະດູຝົນຕາດກວາງຊີ ຈະມີນ້ຳໂຕນຫລາຍທີ່ສຸດ ແຕ່ລະດູແລ້ງຄືລະຫວ່າງເດືອນມັງກອນ ຫາ ເດືອນພຶດສາພາ ປະລິມານນ້ຳຝົນຈະໜ້ອຍລົງ. ອຸທິຍານປ່າໄມ້ແຫ່ງນີ້ ລັດຖະບານໄດ້ປະກາດໃຫ້ເປັນແຫລ່ງທ່ອງທ່ຽວໃນປີ 1987 ເປັນຕົ້ນມາ, ເຊິ່ງໃນເມື່ອກ່ອນມີຫລາຍບ້ານທີ່ຢູ່ອາໄສຢູ່ເທິງສາຍນ້ຳຊີແຫ່ງນີ້, ເນື່ອງຈາກວ່າລັດຖະບານເຫັນໄດ້ຄວາມຈໍາເປັນ ເພື່ອການອະນຸລັກຫ້ວຍນ້ຳແຫ່ງນີ້ ໃຫ້ມີຄວາມອຸດົມສົມບູນ ຈຶ່ງມີຄວາມຈໍາເປັນຕ້ອງໄດ້ຍ້າຍຖິ່ນຖານປະຊາຊົນລົງໄປຢູ່ເຂດໃຕ້ບ້ານ ໂດຍສະເພາະແມ່ນບ້ານທ່າແປ້ນ, ໂນນສະຫວາດ, ບ້ານນາອວນ ແລະ ບັນດາບ້ານຕ່າງໆຢູ່ໃກ້ຄຽງ.

   ນອກຈາກນັ້ນ, ຕາດກວາງຊີ ຍັງເປັນນ້ຳຕົກທີ່ສວຍງາມ ເໝາະສົມເປັນສະຖານທີ່ທ່ອງທ່ຽວທາງທໍາມະຊາດລະດັບຊາດ ເໝາະສົມໃຫ້ເປັນເຂດທ່ີປະກອບດ້ວຍພືດພັນນາໆຊະນິດທີ່ຫລາກຫລາຍອັນປຽບທຽບໄດ້ຍາກ, ຍັງເປັນສະຖານທີ່ຄົ້ນຄວ້າວິໄຈພືດພັນນາໆຊະນິດ ເພື່ອໃຫ້ສົມດຸນກັບທໍາມະຊາດ ແລະ ເພື່ອຄວາມຍືນຍົງຂອງມວນມະນຸດກໍຄືຊີວະນາໆພັນຢູ່ໃນທຳມະຊາດແຫ່ງຊາດນີ້. 

ໂດຍ: ຢ່າຕົ່ງ

KPL