ຊາວໜຸ່ມ ແຂວງເຊກອງ ສຳເລັດກອງປະຊຸມຄົບຄະນະ ຄັ້ງທີ 5

07/06/2024 13:26
Email Print 816
ຂປລ ຂປລ. ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ກອງປະຊຸມຄົບຄະນະບໍລິຫານງານ ຊາວໜຸ່ມແຂວງເຊກອງ ຄັ້ງທີ 5 ສະໄໝທີ VI ໄຂຂຶ້ນ ແລະ ສໍາເລັດລົງ ໃນວັນທີ 5 ມິຖຸນາ 2024

 

  ຂປລ. ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ກອງປະຊຸມຄົບຄະນະບໍລິຫານງານ ຊາວໜຸ່ມແຂວງເຊກອງ ຄັ້ງທີ 5 ສະໄໝທີ VI ໄຂຂຶ້ນ ແລະ ສໍາເລັດລົງ ໃນວັນທີ 5 ມິຖຸນາ 2024 ທີ່ຫ້ອງວ່າການແຂວງເຊກອງ ໂດຍການເປັນປະທານຂອງສະຫາຍ ຕຸລາວັນ ວົງໄຊ ກໍາມະການພັກແຂວງ, ເລຂາຄະນະບໍລິຫານງານຊາວໜຸ່ມແຂວງ, ສະຫາຍ ນາງ ສີສະຫງ່າ ແກ້ວດວງດີ ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ ພ້ອມດ້ວຍຄະນະບໍລິຫານງານຊາວໜຸ່ມແຂວງ, ເລຂາຄະນະບໍລິຫານງານຊາວໜຸ່ມເມືອງ, ຊາວໜຸ່ມຮາກຖານ-ໜ່ວຍຊາວໜຸ່ມຮາກຖານ ພະແນກການ, ອົງການທຽບເທົ່າອ້ອມຂ້າງແຂວງ ເຂົ້າຮ່ວມ.
  ໃນກອງປະຊຸມ ໄດ້ຮັບຟັງການລາຍງານ
, ຄົ້ນຄວ້າປຶກສາຫາລື, ປະກອບຄໍາຄິດຄໍາເຫັນຢ່າງເລິກເຊິ່ງ, ພາວະວິໄສ ບົນຈິດໃຈຍົກສູງຄວາມຮັບຜິດຊອບ ການເມືອງ ຂອງຜູ້ແທນກອງປະຊຸມ ແລະ ຕົກລົງເປັນເອກະພາບຮັບຮອງເອົາເນື້ອໃນສຳຄັນ ເປັນຕົ້ນ ມະຕິກອງປະຊຸມຄົບຄະນະ ຄັ້ງທີ 5 ສະໄໝທີ VIII ຂອງຄະນະບໍລິຫານງານສູນກາງຊາວໜຸ່ມ; ບົດສະຫລຸບການຈັດຕັ້ງປະຕິບັດ ວຽກງານຊາວໜຸ່ມ-ເຍົາວະຊົນ ຂອງຄະນະບໍລິຫານງານຊາວໜຸ່ມແຂວງ ປະຈໍາປີ 2023 ແລະ ທິດທາງແຜນການປີ 2024; ມາດຖານວິທີການສ້າງ ແລະ ພັດທະນາຄອບຄົວຕົວແບບ ຂອງຄະນະຊາວໜຸ່ມ ແຂວງ ສະໄໝທີ VI; ຂໍ້ແຂ່ງຂັນ 4 ບຸກ ຂອງຄະນະບໍລິຫານງານສູນກາງຊາວໜຸ່ມ; ບົດແນະນຳການຈັດຕັ້ງປະຕິບັດຂໍ້ແຂ່ງຂັນ 3 ດີ 4 ຮູ້ ຂອງເຍົາວະຊົນທັນວາ ແລະ ການກະກຽມດໍາເນີນກອງປະຊຸມໃຫຍ່ 3 ຂັ້ນ. ນອກຈາກນີ້, ກອງປະຊຸມຍັງໄດ້ສະເໜີ ແລະ ຮັບຮອງເອົາກຳມະການ ຄະນະບໍລິຫານງານ ຊາວໜຸ່ມ ແຂວງເຊກອງ ສະໄໝທີ 6 ເພີ່ມຕື່ມ 4 ສະຫາຍ, ຍິງ 1 ສະຫາຍ ຄື: ສະຫາຍ ເຂດສະຫວັນ ສິດທິນ້ອຍ ເລຂາຄະນະບໍລິຫານງານຊາວໜຸ່ມ ເມືອງກະລຶມ, ສະຫາຍ ກີ້ວັນ ບຸນກາສຽນ ເລຂາຄະນະບໍລິຫານງານຊາວໜຸ່ມ ເມືອງດາກຈຶງ, ສະຫາຍ ເອກທະວີ ສຸວັນນະຫົງຄຳ ເລຂາໜ່ວຍຊາວໜຸ່ມຮາກຖານ ທະນະຄານການຄ້າຕ່າງປະເທດລາວ ສາຂາແຂວງເຊກອງ ແລະ ສະຫາຍ ນາງ ສຸນິຕາ ບຸນວິໄລ ເລຂາໜ່ວຍຊາວໜຸ່ມຮາກຖານ ແນວລາວສ້າງຊາດແຂວງ. ພ້ອມນີ້, ຍັງໄດ້ຮັບຮອງເອົາທິດທາງແຜນການ ແລະ ແຜນວຽກງານຈຸດສຸມ ໃນປີ 2024 ຊຶ່ງຈະສືບຕໍ່ສຸ່ມໃສ່ວຽກງານສຶກສາອົບຮົມການເມືອງແນວຄິດ, ກະກຽມກອງປະຊຸມໃຫຍ່ 3 ຂັ້ນຂອງຊາວໜຸ່ມ, ສືບຕໍ່ປະຕິບັດແຜນພັດທະນາຊາວໜຸ່ມ-ເຍົາວະຊົນ ປີ 2024, ແຜນຍຸດທະສາດ 2021-2030 ຕິດພັນກັບການຝຶກອົບຮົມວິຊາຊີບ ໃຫ້ສະມາຊິກຊາວໜຸ່ມ, ຊຸກຍູ້ຕິດຕາມ, ກວດກາການຈັດຕັ້ງປະຕິບັດມະຕິ ກອງປະຊຸມໃຫຍ່ ຜູ້ແທນຊາວໜຸ່ມທົ່ວແຂວງ, ຂໍ້ແຂ່ງຂັນ 4 ບຸກ, ຂໍ້ແຂ່ງຂັນ 3 ດີີ 4 ຮູ້ ຂອງເຍົາວະຊົນທັນວາ ທັງນີ້ກໍເພື່ອເຮັດໃຫ້ວຽກງານຊາວໜຸ່ມ ມີຄວາມໜັກແໜ້ນເຂັ້ມແຂງເທື່ອລະກ້າວ.
   ໂອກາດນີ້, ສະຫາຍ ນາງ ສີສະຫງ່າ ແກ້ວດວງດີ ຍັງໄດ້ມີຄຳເຫັນໂອລົມ ແລະ ຊີ້ນໍາໃຫ້ຄະນະບໍລິຫານງານຊາວໜຸ່ມແຂວງ
, ເມືອງ ແລະ ໜ່ວຍຊາວໜຸ່ມຮາກຖານ ກໍຄືສະມາຊິກຊາວໜຸ່ມທຸກສະຫາຍ ຕ້ອງເພີ່ມທະວີໃນການຄົ້ນຄວ້າ ເຊື່ອມຊຶມມະຕິ, ຄໍາສັ່ງຂອງພັກ, ລະບຽບກົດໝາຍຂອງລັດ ໂດຍສະເພາະ ມະຕິກອງປະຊຸມຄົບຄະນະ ບໍລິຫານງານຊາວໜຸ່ມແຂວງ ຄັ້ງທີ 4 ສະໄໝທີ VI ໃຫ້ເລິກເຊິ່ງ ແລະ ນໍາໄປຜັນຂະຫຍາຍຈັດຕັ້ງປະຕິບັດ ໃຫ້ເກີດດອກອອກຜົນ ແລະ ເປັນຮູບປະທໍາຕົວຈິງ ແນໃສ່ພັດທະນາວຽກງານຊາວໜຸ່ມ-ເຍົາວະຊົນ ໃຫ້ເຕີບໃຫຍ່ເຂັ້ມແຂງ ແລະ ກາຍເປັນກຳລັງແຮງສໍາຄັນ ແກ່ການພັດທະນາປະເທດຊາດ ກໍຄືແຂວງເຊກອງ.

ຂ່າວ-ພາບ: ອັດສະວິນ ແສງສີຈັນ
KPL

ຂ່າວອື່ນໆ

ads
ads

Top