ຂປລ. ໃນລະຫວ່າງ ວັນທີ 20-22 ພຶດສະພາ 2024 ນີ້, ທ່ານ ໂພໄຊ ໄຂຄຳພິທູນ ຮອງລັດຖະມົນຕີ ກະຊວງການຕ່າງປະເທດ ໄດ້ນຳພາຄະນະທູຕານຸທູດ ຈາກ 7 ປະເທດ ຄື: ບູນກາລີ, ອິນເດຍ, ຍີ່ປຸ່ນ, ສ ເກົາຫລີ, ຕວັກກີ, ສສ ຫວຽດນາມ ແລະ ຊຳບີ ເຊິ່ງເປັນສະມາຊິກຄະນະກຳມະ ການມໍຣະດົກໂລກ (World Heritage Committee) ຂອງອົງການ ອຸຍແນັສໂກ ປະຈຳຢູ່ ປາຣີ, ທີ່ເດີນທາງມາຈາກປະເທດຝຣັ່ງ, ບູນກາລີ ແລະ ນະຄອນຫລວງວຽງຈັນ ເພື່ອຢ້ຽມຢາມ ແລະ ເຮັດວຽກ ຢູ່ ນະຄອນຫລວງພະບາງ ເມືອງມໍລະດົກໂລກ ແລະ ເຂດໂຄງການກໍ່ສ້າງເຂື່ອນໄຟຟ້າ.

ຈຸດປະສົງ ຂອງການຢ້ຽມຢາມ ແລະ ເຮັດວຽກໃນຄັ້ງນີ້, ເພື່ອແລກປ່ຽນຂໍ້ມູນ ແລະ ບົດຮຽນອັນດີ ຈາກບັນດາປະເທດສະມາຊິກ ຄະນະກຳມະການມໍຣະດົກໂລກ ໃນການຄຸ້ມຄອງສະຖານ ທີ່ມໍລະດົກໂລກຂອງຕົນ ໂດຍສະເພາະການຄຸ້ມຄອງເມືອງ ມໍລະດົກໂລກ ຫລວງພະບາງ ຂອງ ສປປ ລາວ, ທັງເປັນການເພີ່ມຄວາມຮັບຮູ້ ແລະ ເຂົ້າໃຈ ຫລາຍຂຶ້ນກວ່າເກົ່າ ກ່ຽວກັບສະພາບຄວາມເປັນຈິງ ແລະ ຄວາມຮຽກຮ້ອງຕ້ອງການຂອງ ໂຄງການພັດທະນາພື້ນຖານໂຄງລ່າງໃນແຂວງຫລວງພະບາງ ແນໃສ່ຮັດ ແໜ້ນການຮ່ວມມື ລະຫວ່າງ ບັນດາປະເທດສະມາຊິກ ອົງການອຸຍແນັສໂກ ທັງໃນຂອບຫລາຍຝ່າຍ ແລະ ສອງຝ່າຍ ໃນອະນາຄົດ.

ໃນວັນທີ 20 ພຶດສະພາ 2024, ຄະນະຜູ້ແທນ ໄດ້ຢ້ຽມຊົມຫໍພິພິທະພັນແຫ່ງຊາດ ຫລວງພະບາງ ແລະ ຕົວເມືອງມໍລະດົກໂລກ ຫລວງພະບາງ. ຈາກນັ້ນ, ໃນວັນທີ 21 ພຶດພະພາ 2024, ຄະນະຜູ້ແທນທັງໝົດ ໄດ້ເຂົ້າຮ່ວມ ກອງປະຊຸມສຳມະນາ ວ່າດ້ວຍ ການຄຸ້ມຄອງເມືອງມໍລະດົກໂລກຫລວງພະບາງ, ພາຍໃຕ້ການເປັນປະທານຮ່ວມຂອງ ທ່ານ ພະຂັນໄຊ ສີຄັນໄຊ ຫົວໜ້າກົມມໍລະດົກ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແລະ ທ່ານ ຄຳອິນ ຄິດຈະເດດ ເອກອັກຄະລັດຖະທູດ ແລະ ຫົວໜ້າຫ້ອງການຜູ້ຕາງໜ້າຖາວອນ ແຫ່ງ ສປປ ລາວ ປະຈຳ ອົງການອຸຍແນັສໂກ ທີ່ ນະ ຄອນຫລວງປາຣີ ປະເທດຝຣັ່ງ ໂດຍມີຫົວໜ້າຫ້ອງວ່າການແຂວງ ແລະ  ພະແນກການທີ່ກ່ຽວຂ້ອງພາຍໃນແຂວງຫລວງພະບາງ ເຂົ້າຮ່ວມ.

ໂອກາດນີ້, ທ່ານ ໂພໄຊ ໄຂຄຳພິທູນ ໄດ້ເນັ້ນວ່າ: ລັດຖະບານ ແຫ່ງ ສປປ ລາວ ເວລາໃດ ກໍມີຄວາມເອົາໃຈໃສ່ ແລະ ໃຫ້ຄວາມສຳຄັນ ໃນການຄຸ້ມຄອງ, ປົກປັກຮັກສາ ແລະ ບູລະນະສະຖານທີ່ທາງປະຫວັດສາດ, ທາງວັດທະນະທຳ ແລະ ທາງທຳມະຊາດ ກໍຄື ຮີດຄອງປະເພນີອັນດີງາມຂອງປະເທດຕົນ ໃຫ້ມີຄວາມຍືນຍົງ ແລະ ຄົງຕົວ ເປັນຊັບສົມບັດຂອງຊາດ, ເປັນມໍລະດົກໃຫ້ແກ່ ລູກຫລານ ກໍຄື ປະຊາຊົນລາວບັນດາເຜົ່າ ແລະ ມວນມະນຸດ. ຕະຫລອດໄລຍະເວລາ 29 ປີ ທີ່ຜ່ານມາ ວຽກງານການຄຸ້ມຄອງ ມໍລະດົກໂລກຫລວງພະບາງ ໄດ້ເຕີບໃຫຍ່ຂະຫຍາຍຕົວຂຶ້ນເທື່ອລະກ້າວ, ສະຖານະເມືອງມໍຣະດົກໂລກ ພາຍໃຕ້ສົນທິສັນຍາມໍລະດົກໂລກ ຂອງອົງການອຸຍແນັສໂກ ໄດ້ປະກອບສ່ວນສຳຄັນເປັນຢ່າງຍິ່ງ ໃນການປັບປຸງຊີວີດການເປັນຢູ່ ຂອງປະຊາຊົນ ຫລວງພະບາງ ກໍຄື ການພັດທະ ນາເສດຖະກິດ-ສັງຄົມ ຂອງແຂວງ ແລະ ຂອງປະເທດ ນັບມື້ນັບດີຂຶ້ນ ເປັນກ້າວໆມາ.

ໂອກາດດັ່ງກ່າວ, ທ່ານ ຮອງລັດຖະມົນຕີ ໂພໄຊ ໄຂຄໍາພິທູນ ໄດ້ນຳພາຄະນະຜູ້ແທນດັ່ງກ່າວ, ລົງຢ້ຽມຢາມ ເຂື່ອນໄຟຟ້າໄຊຍະບູລີ ແລະ ໂຄງການກໍ່ສ້າງເຂື່ອນໄຟຟ້າຫລວງພະບາງ ທີ່ກຳລັງຢູ່ໃນຂັ້ນຕອນການກໍ່ສ້າງ. ຕະຫລອດໄລຍະການເຄື່ອນໄຫວໃນຄັ້ງນີ້, ຄະນະຜູ້ແທນຕ່າງໆ ໄດ້ໃຫ້ຄວາມສົນໃຈຫລາຍ ໃນການປະກອບຄຳຄິດຄຳເຫັນ ແລະ ແລກປ່ຽນບົດຮຽນປະສົບການ ພ້ອມທັງໄດ້ສອບຖາມພາກລັດ ແລະ ຜູ້ພັດທະນາໂຄງການຢ່າງກົງໄປກົງມາ ແລະ ສ້າງສັນກ່ຽວກັບຂໍ້ມູນຕ່າງໆ ທີ່ຕິດພັນກັບໂຄງການ ກໍ່ສ້າງເຂື່ອນຫລວງພະບາງ ແລະ ການຄຸ້ມຄອງເມືອງມໍລະດົກໂລກຫລວງພະບາງ.

ຂ່າວ-ພາບ: ກຕທ

KPL