ຂປລ
ຂປລ. ທະນາຄານແຫ່ງ ສປປ ລາວ (ທຫລ) ຈັດສໍາມະນາພາຍໃຕ້ຫົວຂໍ້: “ສ້າງຄວາມເຂັ້ມແຂງວຽກງານຄຸ້ມຄອງອິນເຕີເນັດແຫ່ງຊາດ ແລະ ວຽກງານຂ່າວສານ ທຫລ” ໂດຍການເປັນປະທານຮ່ວມຂອງ ທ່ານ ນາງ ຂັນແກ້ວ ຫລ້າມະນີເງົາ ຮອງຜູ້ວ່າການ ທຫລ
ຂປລ. ທະນາຄານແຫ່ງ ສປປ ລາວ (ທຫລ) ຈັດສໍາມະນາພາຍໃຕ້ຫົວຂໍ້: “ສ້າງຄວາມເຂັ້ມແຂງວຽກງານຄຸ້ມຄອງອິນເຕີເນັດແຫ່ງຊາດ ແລະ ວຽກງານຂ່າວສານ ທຫລ” ໂດຍການເປັນປະທານຮ່ວມຂອງ ທ່ານ ນາງ ຂັນແກ້ວ ຫລ້າມະນີເງົາ ຮອງຜູ້ວ່າການ ທຫລ, ຫົວໜ້າຄະນະຮັບຜິດຊອບວຽກຂ່າວ ສານ, ຕິດຕາມ, ຕອບໂຕ້ຂ່າວ ແລະ ທ່ານ ແກ້ວວີສຸກ ໂສລະພົນ ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ຮອງປະທານຄະນະກໍາມະການຄຸ້ມຄອງອິນເຕີເນັດແຫ່ງຊາດ ໂດຍມີບັນດາຄະ ນະກົມ-ຄະນະສາຂາ ທຫລ ປະຈໍາພາກ ແລະ ຄະນະພະແນກກ່ຽວຂ້ອງ ເຂົ້າຮ່ວມ. ກອງປະຊຸມຄັ້ງນີ້, ຈັດຂຶ້ນເພື່ອສ້າງຄວາມຮັບຮູ້-ເຂົ້າໃຈ ໃຫ້ສໍາມະນາກອນ ໃນການຈັດຕັ້ງເຄື່ອນໄຫວ ວຽກງານຕິດຕາມ ແລະ ຕອບໂຕ້ຂ່າວ ໃຫ້ທັນສະພາບການ ເຊິ່ງສຳມະນາກອນ ໄດ້ຮຽນຮູ້ ວິທີການຕ່າງໆ ເປັນຕົ້ນ, ການປະຕິບັດວຽກງານການຄຸ້ມຄອງ ຂອງຄະນະກໍາມະການຄຸ້ມຄອງອິນເຕີເນັດແຫ່ງຊາດ; ການຄຸ້ມຄອງຂໍ້ມູນຂ່າວສານ ຜ່ານອິນເຕີເນັດ; ການກະກຽມເນື້ອໃນຂ່າວ, ຂັ້ນຕອນໃນການຖະແຫລງຂ່າວ; ການໂຄສະນານໍາພາຫາງສຽງສັງຄົມ ຜ່ານສື່ມວນຊົນ; ການຄົ້ນຫາຂໍ້ມູນ, ແກ້ໄຂບັນຫາທາງສື່ສັງຄົມອອນລາຍ ແລະ ອາດຊະຍາກຳທາງລະບົບໂທລະຄົມ (Cyber crime). ໂອກາດດັ່ງກ່າວ, ທ່ານປະທານກອງປະຊຸມ ໄດ້ເນັ້ນໃຫ້ສຳມະນາກອນ ທີ່ເຂົ້າຮ່ວມສຸມທຸກຄວາມພະຍາຍາມ, ຕັ້ງໃຈສຶກສາ, ຮ່ຳຮຽນ ຍາດເອົາຄວາມຮູ້ດ້ານຕ່າງໆ ຈາກວິທະຍາກອນ ເພື່ອນຳໄປໝູນໃຊ້ ເຂົ້າໃນໜ້າທີ່ວຽກງານຂອງຕົນຮັບຜິດຊອບ ກໍຄື ໜ້າທີ່, ວິຊາສະເພາະ ຂອງຕົນ ໃຫ້ເກີດດອກອອກຜົນ, ປະສົບຜົນສຳເລັດ ຕາມລະດັບຄາດໝາຍ ທີ່ວາງໄວ້ ກໍຄື ເຮັດໃຫ້ວຽກງານ ພາຍໃນ ທຫລ ດຳເນີນໄປຢ່າງໂລ່ງລ່ຽນ, ວ່ອງໄວ, ຖືກຕ້ອງຕາມ ແນວທາງນະໂຍບາຍ ຂອງພັກ, ລັດ ວາງອອກ.
ຂໍ້ມູນ-ພາບ: ທຫລ
KPL
