ຂປລ. ກອງປະຊຸມ ພາກພື້ນອາຊີຕາເວັ້ນອອກສ່ຽງໃຕ້ ກ່ຽວກັບການຮັບປະກັນ ການເຂົ້າເຖິງຄຸນນະພາບຂອງການດູແລ ແລະ ການສຶກສາເດັກກ່ອນໄວຮຽນ ຈັດຂຶ້ນໃນວັນທີ 14 ພຶດສະພາ 2024 ທີ່ນະຄອນຫລວງວຽງຈັນ ໂດຍການເປັນປະທານຂອງ ທ່ານ ນາງ ສີພາພອນ ມະນີວົງ ຫົວໜ້າກົມການສຶກສາກ່ອນໄວຮຽນ ກະຊວງສຶກສາທິການ ແລະ ກິລາ ແຫ່ງ ສປປ ລາວ, ທ່ານ ໂຣເຈີ ຢັບ ຈາວ ຜູ້ຊ່ວຍຜູ້ອໍານວຍການ, ຫົວໜ້າພະແນກການສຶກສາ, ຊາວໜຸ່ມ ແລະ ກິລາ, ກອງເລຂາອາຊຽນ, ມີບັນດາຫົວໜ້າຄະນະຜູ້ແທນ ປະເທດສະມາຊິກອາຊຽນ ແລະ ຕີມໍແລັດສະເຕ, ຜູ້ຕາງໜ້າຄູ່ຮ່ວມພັດທະນາ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ນາງ ສີພາພອນ ມະນີວົງ ໄດ້ໃຫ້ຮູ້ວ່າ: ກອງປະຊຸມໃນຄັ້ງນີ້, ເປັນກອງປະຊຸມລະດັບວິຊາການຂອງອາຊຽນ ເພື່ອກະກຽມກອງປະຊຸມ ລັດຖະມົນຕີສຶກສາອາຊຽນ ກ່ຽວກັບວຽກງານການດູແລ ແລະ ສຶກສາກ່ອນໄວຮຽນ, ພ້ອມນີ້ ຍັງເປັນເວທີ ທີ່ຈະຊ່ວຍ ໃຫ້ພວກເຮົາປັບປຸງ ແລະ ຮຽນຮູ້ຈາກປະສົບການຂອງກັນ ແລະ ກັນກ່ຽວກັບການດູແລ ແລະ ການສຶກສາເດັກກ່ອນໄວຮຽນ ເພື່ອເຮັດວຽກງານການພັດທະນາ ທີ່ດີກວ່າຂອງເດັກນ້ອຍ ເຊັ່ນດຽວກັນກັບການບັນລຸ ແຜນພັດທະນາເສດຖະກິດ-ສັງຄົມ (SDG 4.2) ໃນປີ 2030. ພ້ອມນີ້, ກອງປະຊຸມ ຍັງໄດ້ຜັນຂະຫຍາຍ ຖະແຫລງການຂອງສາກົນ ກ່ຽວກັບການດູແລ ແລະ ສຶກສາກ່ອນໄວຮຽນ ທີ່ປະກາດໃນປີ 2022 ແລະ ສືບຕໍ່ຜັນຂະຫຍາຍຖະແຫລງການ ຂອງລັດຖະມົນຕີອາຊຽນ ກ່ຽວກັບການດູແລ ແລະ ສຶກສາກ່ອນໄວຮຽນ ຢູ່ໃນອາຊຽນ ທີ່ໄດ້ປະຊຸມກັນໃນປີ 2023 ຜ່ານມາ.

ກອງປະຊຸມຄັ້ງນີ້, ຍັງເປັນການເຕົ້າໂຮມເອົາບັນດາວິຊາການ, ຜູ້ຊ່ຽວຊານ, ຄູ່ຮ່ວມພັດທະນາ ແລະ ພາກ ສ່ວນຕ່າງໆ ທີ່ເຮັດວຽກກ່ຽວກັບ ການສຶກສາກ່ອນໄວຮຽນ ໂດຍສະເພາະແມ່ນ ລະດັບຜູ້ອໍານວຍການໂຮງຮຽນລ້ຽງເດັກອະນຸບານ, ບັນດາພາກສ່ວນ ກ່ຽວຂ້ອງ, ຄູ່ຮ່ວມພັດທະນາ ໂດຍສະເພາະແມ່ນ ບັນດາອົງການທີ່ໃຫ້ການສະໜັບສະໜູນ ຊ່ວຍເຫລືອເບິ່ງແຍງໂຄງການເດັກກ່ອນໄວຮຽນ.

ຫົວຂໍ້ ທີ່ມາປຶກສາຫາຫລື ແລະ ແລກປ່ຽນໃນຄັ້ງນີ້ ປະກອບມີ: ເສີມຂະຫຍາຍການຫັນປ່ຽນ ຈາກການສຶກສາກ່ອນໄວຮຽນ ໄປສູ່ຊັ້ນປະຖົມສຶກສາ; ຄູສອນ/ຜູ້ດູແລເດັກ ແລະ ພໍ່ແມ່ຜູ້ປົກຄອງ; ການເງິນຂອງການດູແລ ແລະ ການສຶກສາເດັກກ່ອນໄວຮຽນ; ການດູແລ ແລະ ການສຶກສາເດັກກ່ອນໄວຮຽນ ແລະ ການປຽ່ນແປງຂອງດິນຟ້າ.

ຂ່າວ-ພາບ: ສົມຫວັງ

KPL