ຂປລ
ບາງທັດສະນະຂອງຜູ້ປະກອບການທຸລະກິດຂົນສົ່ງສີນຄ້າ ແລະ ນັກວິເຄາະເສດຖະກິດຈາກປະເທດ ເພື່ອນບ້ານ (ໄທ) ຕໍານິ ແລະ ຕອບ ໂຕ້ຕໍ່ບາງສື່ມະໂນພາບອ້າງວ່າ “ລາວຈະຕິດກັບດັກໜີ້ຂອງຈີນ ຍ້ອນໂຄງການເສັ້ນທາງລົດໄຟ”.
*ບາງທັດສະນະຂອງຜູ້ປະກອບການທຸລະກິດຂົນສົ່ງສີນຄ້າ ແລະ ນັກວິເຄາະເສດຖະກິດຈາກປະເທດເພື່ອນບ້ານ (ໄທ) ຕໍານິ ແລະ ຕອບໂຕ້ຕໍ່ບາງສື່ມະໂນພາບອ້າງວ່າ “ລາວຈະຕິດກັບດັກໜີ້ຂອງຈີນຍ້ອນໂຄງການເສັ້ນທາງລົດໄຟ” ທັງໆທີ່ເສັ້ນທາງລົດໄຟ
ລາວ-ຈີນ ຮັບໃຊ້ຜົນປະໂຫຍດລວມທັງໃນພາກພື້ນ-ສາກົນຢ່າງແທ້ຈິງ ນັບແຕ່ເສັ້ນທາງລົດໄຟລາວ-ຈີນ ເປີດໃຫ້ບໍລິການໃນທ້າຍປີ 2021 ກໍເຫັນວ່າການບໍລິການສິນຄ້າ ແລະ ຜູ້ໂດຍສານຄຶກຄັກຈົນລົ້ນຂະບວນລົດໄຟ ທີ່ມາຈາກອາຊຽນ, ສປ ຈີນ ແລະ ພາກພື້ນອື່ນ ເຊິ່ງມັນບໍ່ພຽງຮັບໃຊ້ ສປປ ລາວ ເທົ່ານັ້ນຫາກຍັງກາຍເປັນຂະບວນລົດສາກົນ ໂດຍບໍ່ຈໍາແນກເຊື້ອຊາດເຜົ່າພັນ ແລະ ເຂດແຄວ້ນບົນພື້ນຖານຄືສົ່ງເສີມການເຊື່ອມໂຍງເຊື່ອມຈອດກັນ, ສ້າງສາຍພົວພັນມິດຕະພາບທີ່ດີ ແລະ ໃຫ້ສິ່ງອໍານວຍຄວາມສະດວກສະບາຍ ເຊິ່ງກັນແລະກັນບົນພື້ນຖານຕ່າງຝ່າຍຕ່າງມີຜົນປະໂຫຍດຮ່ວມກັນ.
ປັດຈຸບັນນ້ີເຂົ້າສູ່ລະດູການສ່ົງອອກສິນຄ້າກະສິກໍາເຊັ່ນ ປະເພດໝາກຖ່ົວລຽນ ຄາດວ່າຜູ້ປະກອບການປູກຖົ່ວລຽນຈາກໄທ, ຫວຽດນາມ ໄດ້ເລີ່ມຕົ້ນສົ່ງອອກໄປຈີນແລ້ວ ແລະ ອາດມີການສົ່ງອອກຫລາຍແສນໂຕນ ເຊິ່ງນໍາເງິນຕາເຂົ້າປະເທດຫລາຍລ້ານໂດລາ ນອກຈາກນັ້ນບຸນປະເພນີສົງການ ຫລື ບຸນປີໃຫມ່ໃນອາຊຽນລວມທັງຈີນ ຈະເຮັດໃຫ້ນັກທ່ອງທ່ຽວເດີນທາງກັບບ້ານ ແລະ ໄປທ່ອງທ່ຽວເພ່ີມຂ້ຶນຫລາຍທົບຍ້ອນຂີ່ລົດໄຟມີຄວາມສະດວກສະບາຍຫລາຍ, ບັນທຸກສິນຄ້າ-ບັນທຸກຄົນໄດ້ຫລາຍ, ປະຢັດເວລາ, ຄ່າປີ້ໂດຍສາຍຖືກກວ່າ ແລະ ມີຄວາມປອດໄພສູງ.ຕາມແຫລ່ງຂ່າວຊິນຮວາ ຂອງ ສປ ຈີນ, ເມື່ອວັນທີ 2 ເດືອນເມສາ ໄດ້ລາຍງານວ່າຍອດຜູ້ໂດຍສານຊາວໄທ ທີ່ເດີນທາງຜ່ານດ່ານລົດໄຟໂມ່ຮານ ຊຶ່ງເປັນເສັ້ນທາງລົດໄຟຈີນ-ລາວ ໄດ້ເພີ່ມຂຶ້ນ 7,5 ເທົ່າ, ຫລັງຈາກຈີນ ແລະ ໄທດຳເນີນນະໂຍບາຍຍົກເວັ້ນວິຊາເຊິ່ງກັນ ແລະ ກັນ ຕັ້ງແຕ່ວັນທີ 1 ມີນາ ປີ 2024. ໂດຍຂໍ້ມູນສະຖິຕິຂອງສະຖານີຜ່ານດ່ານ ແຂວງຢູນນານ ທາງພາກຕາເວັນຕົກສ່ຽງໃຕ້ຂອງຈີນ ໃຫ້ຮູ້ວ່າຜູ້ໂດຍສານຊາວໄທເດີນທາງຂາເຂົ້າ ໃນເດືອນມີນາລວມມີ 2.100 ເທື່ອຄົນ.
ໃນນີ້ຜ່ານດ່ານລົດໄຟ ໂມຮານ ຈຳນວນ 629 ເທື່ອຄົນ, ເພີ່ມຂື້ນ 750% ເມື່ອທຽບກັບເດືອນກຸມພາ ຜ່ານມາ.ນັບແຕ່ ຕົ້ນປີ 2024 ເປັນຕ້ົ້ນມາ ຜູ້ໂດຍສານຂາເຂົ້າຈາກປະເທດທີ 3 (ຄື: ການຍົກເວັ້ນ ຈີນ ແລະ ລາວ) ຈາກ 67 ປະເທດ ແລະ ພາກພື້ນລວມມີ 12.800 ເທື່ອຄົນ. ໃນນັ້ນຜູ້ໂດຍສານຊາວໄທ 9.400 ເທື່ອຄົນ, ກວມເອົາ 73,4% ຂອງ ຜູ້ໂດຍສານທັງໝົດ. ປັດຈຸບັນ, ຜູ້ໂດຍສານໄທເດີນທາງເຂົ້າຈີນ ເພື່ອການທ່ອງທ່ຽວ, ພັກຜ່ອນ, ທາງທຸລະກິດ ແລະ ອື່ນໆ.ເຖິງແນວໃດກໍດີ ປີ 2024 ນ້ີ ສປປ ລາວ ໄດ້ເປີດປີທ່ອງທ່ຽວ ແລະ ເປັນເຈົ້າພາບກອງປະຊຸມສຸດຍອດອາຊຽນຄາດວ່າຈະຕ້ອນຮັບນັກທ່ອງທ່ຽວຕ່າງປະເທດຢ່າງໜ້ອຍ 3 ລ້ານກວ່າຄົນ ໃນນັ້ນ ສປ ຈີນ 1 ລ້ານຄົນ.ເສັ້ນທາງລົດໄຟລາວ-ຈີນ ເລີ່ມກໍ່ສ້າງໃນປີ 2015, ສໍາເລັດ ແລະ ເປີດໃຫ້ບໍລິການໃນທ້າຍປີ 2021 ໂດຍການຮ່ວມມືກັນລະຫວ່າງ ສປປ ລາວ ລົງທຶນ 30% ແລະ ຈີນ ລົງທຶນ 70%, ມູນຄ່າເກືອບ 6 ຕື້ໂດລາ, ມີຄວາມຍາວ 400 ກວ່າກິໂລ ແມັດຈາກຊາຍແດນລາວ-ຈີນ ໃນແຂວງຫລວງນໍ້າທາ ເຖິງນະຄອນຫລວງວຽງຈັນ.ເສັ້ນທາງລົດລາວ-ຈີນ ສາມາດ ເຊື່ອມໂຍງເຊື່ອມກັບພາກພື້ນ ແລະ ສາກົນຢ່າງໜັກແໜ້ນ.
ໂດຍ: ເກີດຂວັນໃຈ ມາລີຈັນສີ
KPL
