ຂປລ
ຂປລ. ແຫລ່ງຂ່າວຈາກ ແຂວງສະຫວັນນະເຂດ ໃຫ້ຮູ້ວ່າ: ແຂວງສະຫວັນນະເຂດ ເປີດປີທ່ອງທ່ຽວລາວ 2024 ທີ່ຕິດພັນກັບງານສະຫວັນສຸກສັນຫັນສາ ພາຍໃຕ້ຄໍາຂວັນທີ່ວ່າ: “ທ່ອງທ່ຽວລາວ-ທ່ອງທ່ຽວ ແຂວງສະຫວັນນະເຂດ ປອດໄພ, ມ່ວນຊື່ນ-ຊື່ນໃຈ ໃນວັດທະນະທຳ, ທຳມະຊາດ ແລະ ປະຫວັດສາດ” ໃນຕອນແລງວັນທີ 10 ມີນາ 2024 ທີ່ເທສະບານຕົວເມືອງເກົ່າ ນະຄອນໄກສອນພົມວິຫານ
ຂປລ. ແຫລ່ງຂ່າວຈາກ ແຂວງສະຫວັນນະເຂດ ໃຫ້ຮູ້ວ່າ: ແຂວງສະຫວັນນະເຂດ ເປີດປີທ່ອງທ່ຽວລາວ 2024 ທີ່ຕິດພັນກັບງານສະຫວັນສຸກສັນຫັນສາ ພາຍໃຕ້ຄໍາຂວັນທີ່ວ່າ: “ທ່ອງທ່ຽວລາວ-ທ່ອງທ່ຽວ ແຂວງສະຫວັນນະເຂດ ປອດໄພ, ມ່ວນຊື່ນ-ຊື່ນໃຈ ໃນວັດທະນະທຳ, ທຳມະຊາດ ແລະ ປະຫວັດສາດ” ໃນຕອນແລງວັນທີ 10 ມີນາ 2024 ທີ່ເທສະບານຕົວເມືອງເກົ່າ ນະຄອນໄກສອນພົມວິຫານ ໂດຍເປັນກຽດເຂົ້າຮ່ວມຂອງ ທ່ານ ບຸນທອງ ຈິດມະນີ ຮອງປະທານປະເທດ, ທ່ານ ບຸນໂຈມ ອຸບົນປະເສີດ ເຈົ້າແຂວງ ສະຫວັນນະເຂດ, ພ້ອມດ້ວຍການນໍາພັກ-ລັດຈາກສູນກາງ ແລະ ມວນຊົນພາຍໃນແຂວງສະຫວັນນະເຂດ ເຂົ້າຮ່ວມ.
ງານດັ່ງກ່າວ, ແມ່ນຈັດຂຶ້ນແຕ່ວັນທີ 10-17 ມີນາ 2024 ໂດຍມີກິດຈະກໍາທີ່ສໍາຄັນຄື: ງານຕະຫລາດນັດວາງສະແດງຈໍາໜ່າຍສິນຄ້າ ແລະ ເທສະການອາຫານ, ການໃສ່ບາດພະສົງ 108 ອົງຢູ່ແຄມນໍ້າຂອງໃນແຕ່ລະເຊົ້າ, ຊົມການສະແດງສິລະປະ ແລະ ວັດທະນະທໍາ ຈາກພາກສ່ວນຕ່າງໆ ໃນແຕ່ລະຄໍ່າຄືນ, ການປະກວດຟ້ອນກອງຕຸ້ມ-ກອງຫາງພື້ນບ້ານ, ແຂ່ງຂັນການເປົ່າແຄນ, ການສະແດງ ລົງຄວ່າງເຂັນຝ້າຍ ວິຖີຊີວິດຂອງຊົນເຜົ່າຜູ້ໄທ, ແຂ່ງຂັນອາຫານພື້ນບ້ານ ເປັນຕົ້ນ ປີ້ງໄກ່ແຊບເຊໂນ, ຕໍາໝາກຮຸ່ງ-ໝາກຖົ່ວ ແລະ ອາຫານອື່ນໆ, ຖະໜົນຄົນຍ່າງຂອງພີ່ນ້ອງສະມາຄົມຊາວຫວຽດນາມ ແລະ ສະມາຄົມຊາວຈີນ ເພື່ອຈໍາໜ່າຍ-ບໍລິການອາຫານ ທີ່ເປັນເອກະລັກສະເພາະຕົວ ຂອງຊາວຫວຽດກຽວ ແລະ ຊາວຈີນ. ນອກຈາກນັ້ນ, ຍັງຈະມີການຈັດສໍາມະນາໃນຫົວຂໍ້ “ການພັດທະນາ ການທ່ອງທ່ຽວຂອງແຂວງ”, ສໍາມະນາໃນຫົວຂໍ້ “ຜ້າຝ້າຍງາມແທ້ເຮີ້ຍ”, ກິດຈະກໍາຫລິ້ນເກມ ຝຶກທັກສະສໍາລັບເດັກນ້ອຍ, ກິດຈະກໍາງານວາງສະແດງ “ພາຫະນະເກົ່າຍ້ອນຍຸກ”ຂອງທິມງານລົດເກົ່າ, ການສະແດງ “ເຈັດສະກີໃນແມ່ນໍ້າຂອງ”, ການວາງສະແດງຮູບແຕ້ມ ຂອງກຸ່ມສິລະປິນແຕ້ມຮູບ ທີ່ມີຊື່ສຽງພາຍໃນ ແລະ ຕ່າງປະເທດ, ມີການເດີນແບບການກຸສົນ, ການນຸ່ງເຄື່ອງຍ້ອນຍຸກ ທົດສະວັດທີ 70-80 ແລະ ປະມູນເຄື່ອງໃຊ້ສອຍ, ຟ້ອນລໍາວົງສາມັກຄີມ່ວນຊື່ນ ແລະ ອື່ນໆ.
ໃນໂອກາດກ່າວ, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ໄດ້ຮຽກຮ້ອງມາຍັງທຸກພາກສ່ວນຈົ່ງຮ່ວມແຮງຮ່ວມໃຈກັນ ເປັນເຈົ້າພາບທີ່ດີຮັບແຂກບ້ານ-ແຂກເມືອງ ດ້ວຍຄວາມຍິ້ມແຍ້ມແຈ່ມໃສ, ໂອບເອື້ອອາລີ, ມີນ້ຳໃຈໄມຕີຈິດມິດຕະພາບ, ມີນ້ຳໃຈນອບນ້ອມຕາມປະເພນີອັນດີງາມ ຂອງແຂວງສະຫວັນນະເຂດ ເຮັດໃຫ້ນັກທ່ອງທ່ຽວຮູ້ສຶກອົບອຸ່ນ ມີຄວາມສຸກກາຍສະບາຍໃຈ, ມີຄວາມປອດໄພ, ມີຄວາມຮູ້ສຶກຄືກັບຢູ່ບ້ານຢູ່ເຮືອນຂອງຕົນເອງ, ສ້າງຄວາມປະທັບໃຈ ມາທ່ຽວແລ້ວຢາກມາທ່ຽວອີກ ເພື່ອເຮັດໃຫ້ແຂວງສະຫວັນນະເຂດ ພັດທະນາຢ່າງຍືນຍົ.
ປັດຈຸບັນ, ທົ່ວແຂວງສະຫວັນນະເຂດ ມີແຫລ່ງທ່ອງທ່ຽວທັງໝົດ 116 ແຫ່ງ. ໃນນັ້ນ, ແຫລ່ງທ່ອງທ່ຽວທໍາມະຊາດ 74 ແຫ່ງ, ປະຫວັດສາດ 13 ແຫ່ງ ແລະ ແຫລ່ງທ່ອງທ່ຽວທາງດ້ານວັດທະນະທໍາ 29 ແຫ່ງ, ມີຫົວໜ່ວຍທຸລະກິດໂຮງ ແຮມ 47 ແຫ່ງ, ເຮືອນພັກ 167 ແຫ່ງ, ຣີສອດ 2 ແຫ່ງ, ຮ້ານອາຫານ ແລະ ຮ້ານກິນດື່ມ 258 ແຫ່ງ, ພັດຕະຄານ 4 ແຫ່ງ ແລະ ມີບໍລິສັດທ່ອງທ່ຽວ 12 ແຫ່ງ.
KPL