ຂປລ
ຂປລ. ສາຍການບິນເອກະຊົນໃຫຍ່ທີ່ສຸດຂອງຫວຽດນາມຫວຽເຈັດ (Vietjet), ໄດ້ເລີ່ມເປີດຖ້ຽວບິນເຊື່ອມຕໍ່ນະຄອນຫລວງຂອງ ສປປ ລາວ ກັບສູນກາງດ້ານເສດຖະກິດຂອງຫວຽດນາມ ນະຄອນໂຮ່ຈີມິນ.
ຂປລ. ສາຍການບິນເອກະຊົນໃຫຍ່ທີ່ສຸດຂອງຫວຽດນາມຫວຽເຈັດ (Vietjet), ໄດ້ເລີ່ມເປີດຖ້ຽວບິນເຊື່ອມຕໍ່ນະຄອນຫລວງຂອງ ສປປ ລາວ ກັບສູນກາງດ້ານເສດຖະກິດຂອງຫວຽດນາມ ນະຄອນໂຮ່ຈີມິນ. ຄາດວ່າຈະເປັນເສັ້ນທາງທີ່ປະຢັດເວລາ ແລະ ຄ່າໃຊ້ຈ່າຍສໍາລັບການເດີນທາງລະຫວ່າງສອງປະເທດ, ພ້ອມທັງມອບໂອກາດໃນການທ່ອງທ່ຽວ, ການຄ້າຂາຍ ແລະ ການພັດທະນາເສດຖະກິດ.
ພິທີດັ່ງກ່າວຈັດຂຶ້ນທີ່ ສະໜາມບິນສາກົນ Tan Son Nhat ແລະ ສະໜາມບິນສາກົນວັດໄຕ,ເປັນກຽດເຂົ້າຮ່ວມໂດຍ ທ່ານ ສຸວັນນະແສງ ອຳໄພ ຮອງກົງສຸນໃຫຍ່ ສປປ ລາວ ປະຈຳນະຄອນ ໂຮ່ຈີ່ມິງ, ພ້ອມດ້ວຍທ່ານ ບຸນແຕງ ສີມູນ ຮອງຫົວໜ້າກົມການບິນພົນລະເຮືອນລາວ (DCAL), ທ່ານ ສັກດາ ສຸລິສັກ ຮອງຜູ້ອໍານວຍການໃຫຍ່ສະໜາມບິນລາວ (AOL), ທ່ານ ແກ້ວສຸລີ ນູຟອງສະໝຸດ ຮັກສາການຜູ້ອໍານວຍການສະໜາມບິນສາກົນວັດໄຕ, ການນໍາສາຍການບິນລາວ ແລະ Vietjet ເຂົ້າຮ່ວມ. ຖ່ຽວບິນດັ່ງກ່າວ ໃຫ້ບໍລິການ 4 ຖ້ຽວຕໍ່ອາທິດໃນວັນຈັນ, ວັນພຸດ, ວັນສຸກແລະ ວັນອາທິດ ຊຶ່ງນັກທ່ອງທ່ຽວສາມາດບິນໂດຍກົງຈາກນະຄອນຫລວງວຽງຈັນໄປນະຄອນໂຮ່ຈີມິນໃນເວລາບໍ່ຮອດ 2 ຊົ່ວໂມງ. ຖ້ຽວບິນອອກຈາກສະໜາມບິນສາກົນວັດໄຕໃນເວລາ 18:45 ໂມງ ແລະໄປຮອດສະໜາມບິນສາກົນ Tan Son Nhat ນະຄອນໂຮ່ຈີມິນໃນເວລາ 20:45 ໂມງ. ໃນຂະນະທີ່, ຖ້ຽວບິນຈາກນະຄອນໂຮ່ຈີມິນ ຫາ ນະຄອນຫລວງວຽງຈັນ ອອກເວລາ 16:00 ໂມງ ແລະ ລົງຈອດໃນເວລາ 17:45 ໂມງ (ຕາມເວລາທ້ອງຖິ່ນ).
ທ່ານ Nguyen Thanh Son, ຮອງປະທານບໍລິສັດ Vietjetໃຫ້ຮູ້ວ່າ: “ຖ້ຽວບິນໃໝ່ເຊື່ອມຕໍ່ນະຄອນ ໂຮ່ຈີມິນ ຫາ ນະຄອນຫລວງວຽງຈັນ ບໍ່ພຽງແຕ່ເຮັດໃຫ້ເວລາໃນການເດີນທາງລະຫວ່າງ ຫວຽດນາມ ແລະ ລາວ ສັ້ນລົງເທົ່ານັ້ນ, ແຕ່ຍັງໄດ້ຂະຫຍາຍການເຊື່ອມຕໍ່ທາງອາກາດຂອງ ນະຄອນຫລວງວຽງຈັນ ໄປເຖິງບັນດາຈຸດໝາຍປາຍທາງໃນພາກພື້ນ ແລະ ໃນໂລກຜ່ານເຄືອຂ່າຍການບິນສາກົນຂອງ Vietjet. ພວກເຮົາຈະສືບຕໍ່ມອບປີ້ຍົນທີ່ມີລາຄາຖືກກວ່າໃນເຮືອບິນໃໝ່, ທັນສະໄໝ ແລະ ການບໍລິການທີ່ດີເລີດຂອງພວກເຮົາ.”
ເພື່ອສະເຫລີມສະຫລອງເສັ້ນທາງໃໝ່, ແຕ່ວັນທີ 1 ຫາ 8 ມີນາ 2024, Vietjet ມອບປີ້ຍົນລາຄາພິເສດ 0 ໂດລາ (ບໍ່ລວມພາສີ ແລະ ຄ່າທໍານຽມ) ສໍາລັບເສັ້ນທາງ ນະຄອນຫລວງວຽງຈັນ-ນະຄອນໂຮ່ຈີມິນ ແລະ ໄປເຖິງຈຸດໝາຍປາຍທາງໃນອົດສະຕາລີ, ສ ເກົາຫລີ, ຍີ່ປຸ່ນ, ຮົງກົງ, ໄຕ້ຫວັນ, ອິນເດຍ ແລະ ອື່ນໆ. ນັກທ່ອງທ່ຽວສາມາດຮັບປີ້ບິນຟຣີ ໄດ້ທີ່ www.vietjetair.com ຫລື ແອັບ Vietjet Air ແລະ ວາງແຜນທ່ອງທ່ຽວໃນລະຫວ່າງວັນທີ 01 ເມສາ ຫາ 31 ຕຸລາ 2024 (ຕາມຂໍ້ກໍານົດ ແລະ ເງື່ອນໄຂ). ສອບຖາມຂໍ້ມູນເພີ່ມຕື່ມທີ່ www.vietjetair.com
KPL
