ຂປລ
ເມືອງປາກລາຍ ແຂວງໄຊຍະບູລີ ແມ່ນເມືອງໜຶ່ງທີ່ຄືກັບຫລາຍໆເມືອງໃນທົ່ວປະເທດ ທີ່ນິຍົມເຮັດບຸນພະເຫວດໃນແຕ່ລະປີ, ບຸນດັ່ງກ່າວແມ່ນນິຍົມຈັດຂຶ້ນໃນ ລະຫວ່າງ ເດືອນ 3 ຫາເດືອນ 4.
*ເມືອງປາກລາຍ ແຂວງໄຊຍະບູລີ ແມ່ນເມືອງໜຶ່ງທີ່ຄືກັບຫລາຍໆເມືອງໃນທົ່ວປະເທດ ທີ່ນິຍົມເຮັດບຸນພະເຫວດໃນແຕ່ລະປີ, ບຸນດັ່ງກ່າວແມ່ນນິຍົມຈັດຂຶ້ນໃນ ລະຫວ່າງ ເດືອນ 3 ຫາເດືອນ 4. ສໍາລັບຢູ່ເມືອງປາກລາຍກໍມີການແຫ່ພະເຫວດເຊັ່ນກັນ, ແຕ່ມີອັນແປກແຕກຕ່າງກັບບ່ອນອື່ນໆກໍ່ຄື ມີຜີຕາໂຂນທີ່ປະກອບຂຶ້ນມານັ້ນເອງ. ສະນັ້ນ, ເພື່ອເປັນການດຶງດູດ ນັກທ່ອງທ່ຽວໃນໂອ ກາດປີທ່ອງທ່ຽວລາວ ອົງການປົກຄອງເມືອງປາກລາຍ ແຂວງໄຊຍະບູລີ, ໄດ້ຕົກລົງເປັນເອກະພາບກໍານົດເອົາບຸນປະເພນີຜີໂຂນ ເປັນໂອກາດເປີດປີທ່ອງທ່ຽວລາວ 2024 ຊຶ່ງຄາດວ່າຈະສາມາດດຶງ ດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ຽວໃນໄລຍະດັ່ງກ່າວໄດ້ເປັນຈໍານວນຫລາຍ.
ບຸນຜີໂຂນປີນີ້ຈະຈັດຂຶ້ນຢູ່ ບ້ານສີສະອາດຊົມພູ ຊຶ່ງຈະມີຫລາຍກິດຈະກຳຕິດພັນການທ່ອງທ່ຽວ, ສ່ອງແສງໃຫ້ເຫັນຄຸນຄ່າສໍາຄັນດ້ານປະເພນີວັດທະນາທໍາອັນຈົບງາມ ແລະ ຮັບປະກັນໄດ້ ຄວາມປອດໄພ, ສ້າງຄວາມປະທັບໃຈອັນດີໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດທີ່ໄດ້ມາຮ່ວມບຸນດັ່ງກ່າວເປັນຢ່າງດີ ອັນຈະຊ່ວຍດຶງດູດນັກທ່ອງທ່ຽວໃຫ້ເຂົ້າມາ ທ່ອງທ່ຽວຢູ່ປະເທດ ລາວເວົ້າລວມ ເວົ້າສະເພາະແມ່ນແຂວງໄຊຍະບູລີ ໃຫ້ນັບມື້ເພີ່ມຂຶ້ນ. ສ່ວນຄວາມເປັນມາຂອງຜີຕາໂຂນ ທີ່ກ່ຽວພັນກັບບຸນພະເຫວດ ນັ້ນ ກໍມີເລື່ອງເລົ່າທີ່ຂ້ອນຂ້າງເປັນປະຫວັດຍາວສົມຄວນ, ແຕ່ມີບາງຕອນຂອງເລື່ອງເລົ່າໄດ້ບອກວ່າ: ເວລາພະເຫວດສັນດອນກັບເຂົ້າສເມືອງນ້ັນ ໄດ້ມີພູດຜີປີສາດ (ທະຫານຮັກສາພະອົງ) ຕາມມາສົ່ງເຖິງບ່ອນເຖິງທີ່ຈຶ່ງໄດ້ຄຳວ່າ: ຜີຕາມຄົນໝາຍວ່າ: ຜີ ໄດ້ແຫ່ມາສົ່ງ ພະເຫວດເຖິງເມືອງ ແລະ ຫລາຍປີຕໍ່ມາຄຳວ່າ: ຜີຕາມຄົນກໍກາຍມາ ເປັນຜີໂຂນ ຫລື ຜີໂຂນໃນປັດຈຸບັນ. ສ່ວນຮູບຮ່າງຂອງຜີໂຂນ ທີ່ພວກເຮົາເຫັນຢູ່ໃນພິທີແຫ່ພະ ເຫວດໃນ ແຕ່ລະປີນັ້ນ ກໍແມ່ນຈິນຕະນາການຂອງບັນດາອາຈານ ໃນສະໄໝອາດີດຂອງເມືອງປາກລາຍ ຄິດຄົ້ນຂຶ້ນມາໃຫ້ມີລັກສະນະຮູບຮ່າງແປກຈາກຄົນເຮົາ ມີຫົວໃຫຍ່, ສານດ້ວຍໄມ້ເຮ້ຍ, ມີດັງໂມ, ລີ້ນຍາວ, ຫູຍາວ, ນຸ່ງເຄື່ອງຄ້າຍຄືຄົນເຮົາ ມີສຽງຮ້ອງອອກມາແບບເອກະລັກສະເພາະຂອງເມືອງ, ຢູ່ໃບຫູມັກຈະຂຽນເປັນພາສາລາວສະ ແດງອອກເຖິງຄວາມຮັກລະຫວ່າງບ່າວສາວ.
KPL
