ຂປລ. ຕາມການລາຍງານ ຂອງທ່ານ ສອນປະເສີດ ດາລາວົງ ຫົວໜ້າຫ້ອງການສົ່ງເສີມ ແລະ ຄຸ້ມຄອງ ເຂດເສດຖະກິດພິເສດ ກະຊວງແຜນການ ແລະ ການລົງທຶນໃຫ້ຮູ້ວ່າ:ໃນປີ 2023 ຜ່ານມາ, ເຂດເສດຖະກິດພິເສດ ສາມາດສ້າງວຽກເຮັດງານທໍາ ໃຫ້ປະຊາຊົນ ໄດ້ທັງໝົດ 3.644 ຄົນ. ໃນນັ້ນ, ປະຊາຊົນລາວ 3.572 ຄົນ ແລະ ຕ່າງປະເທດ 72 ຄົນ. ໃນຂະນະທີ່ ທົ່ວປະເທດມີນັກລົງທຶນທັງພາຍໃນ ແລະ ຕ່າງປະເທດ ເຂົ້າມາລົງທຶນຢູ່ເຂດເສດຖະກິດພິເສດ (ຂສພ) ທັງໝົດ 178 ບໍລິສັດ, ກວມເອົາຂະແໜງ ອຸດສາຫະກໍາ 18 ບໍລິສັດ, ການຄ້າ 30 ບໍລິສັດ, ບໍລິການ 127 ບໍລິສັດ ແລະ ກະສິກໍາ 3 ບໍລິສັດ ໂດຍມີທຶນທັງໝົດ 520 ລ້ານກວ່າໂດລາ ແລະ ທຶນຈົດທະບຽນ 178 ລ້ານກວ່າໂດລາ. ນອກຈາກບໍລິສັດທີ່ເຂົ້າມາລົງທຶນແລ້ວ ຍັງມີບັນດາຫ້າງຮ້ານ ແລະ ຫົວໜ່ວຍວິສາຫະກິດຈໍານວນໜຶ່ງ ທີ່ເຂົ້າມາລົງທຶນພາຍໃນ ເຂດເສດຖະກິດພິເສດ ທັງໝົດ 2.645 ຫົວໜ່ວຍ. ໃນນັ້ນ, ບໍລິສັດລົງທຶນໄດ້ມອບພັນທະເຂົ້າ ງົບປະມານຂອງລັດໄດ້ທັງໝົດ 174 ຕື້ກວ່າກີບ.

ທ່ານ ສອນປະເສີດ ດາລາວົງ ຍັງໃຫ້ຮູ້ອີກວ່າ: ໃນປີ 2023 ຜ່ານມາ, ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ໄດ້ຄົ້ນຄວ້າຮ່າງດໍາລັດວ່າດ້ວຍການຈັດຕັ້ງແລະ ການເຄື່ອນ ໄຫວຂອງອົງການຄຸ້ມຄອງ ເຂດເສດຖະກິດພິເສດ ສາມຫລ່ຽມຄໍາ, ປັບປຸງ ຂໍ້ຕົກລົງ 60/ນຍ, ປັດຈຸບັນ ທັງສອງນິຕິກໍາ ແມ່ນໄດ້ຖືກຮັບຮອງ ແລະ ໄດ້ປະກາດໃຊ້ ໃນວັນທີ 5 ທັນວາ 2023; ໄດ້ສ້າງຮ່າງກົດໝາຍວ່າດ້ວຍ ຂສພ ຊຶ່ງສະພາແຫ່ງຊາດ ໄດ້ມີມະຕິໃຫ້ສືບຕໍ່ປັບປຸງບາງເນື້ອໃນຄືນ ໃໝ່ ແລະ  ສືບຕໍ່ແກ້ໄຂວຽກງານ 6 ກຸ່ມວຽກ ຢູ່ ຂສພ ສາມຫລ່ຽມຄໍາ ແລະ ຂສພ ບໍ່ເຕ່ນແດນງາມ.

ພ້ອມນີ້, ຍັງໄດ້ສືບຕໍ່ເຈລະຈາຂາຍຮຸ້ນ 20% ຂອງລັດຖະບານ ໃນເນື້ອທີ່ 827 ເຮັກຕາ ຂອງເຂດເສດຖະກິດພິເສດສາມຫລ່ຽມຄໍາ ໄລຍະຜ່ານມາ ຄະນະວິຊາການລົງເກັບກໍາຂໍ້ມູນ ຕາມ ຂໍ້ຕົກລົງຂອງລັດຖະມົນຕີກະຊວງ ການເງິນ ສະບັບເລກທີ 3092/ກງ ລົງວັນທີ 4 ຕຸລາ 2023 ກໍໄດ້ລາຍງານຜົນຂອງການ ລົງເຄື່ອນໄຫວວຽກງານຕົວຈິງ ໃນຄັ້ງວັນທີ 24 ພະຈິກ 2023 ທີ່ຜ່ານມາ, ໄດ້ຊຸກຍູ້ ແລະ ຕິດຕາມການຄົ້ນຄວ້າ ຫົວໜ່ວຍລາຄາຊົດເຊີຍ, ວຽກງານການຊົດເຊີຍ ແລະ ວຽກງານການຄຸ້ມຄອງ ສິ່ງແວດລ້ອມ ຢູ່ບັນດາເຂດເສດຖະກິດສະເພາະ ໂດຍສະເພາະບຶງທາດຫລວງ, ເຂດເສດຖະກິດສະເພາະລ່ອງແທ່ງ, ມະຫານາທີສີທັນດອນ, ອໍາມະຕະ ຈຸດນາເຕີຍ ແຂວງຫລວງນໍ້າທາ ແລະ ນາໝໍ້ ແຂວງອຸດົມໄຊ. ພ້ອມທັງ ສໍາເລັດການປະເມີນສັນຍາ ການພັດທະນາ ບັນດາ ເຂດເສດຖະກິດພິເສດປະຈໍາປີ 2003 ແລະ ໄດ້ຄົ້ນຄວ້າຮ່າງແຜນຍຸດທະສາດ ການພັດທະນາ ຂສພ ແຕ່ປີ 2021-2030 ຕື່ມອີກ.

ຂໍ້ມູນ-ພາບ: ໜັງສືພິມປະຊາຊົນ

KPL