ຂປລ.ວິທະຍຸ ສາກົນ ຫວຽດນາມ, ວັນທີ6 ທັນວານີ້ ຢູ່ນະຄອນຫລວງ ວຽງຈັນ ຈັດວາລະ ກອງປະຊຸມ ຄົບຄະນະ ເທື່ອທີ 2 ແລະ ພິທີອັດ ກອງປະຊຸມ ສຸດຍອດ ສະພາ ແຫ່ງຊາດ 3 ປະເທດ ກຳປູເຈຍ-ລາວ-ຫວຽດນາມ (CLV) ຄັ້ງທີ 1. ກອງປະຊຸມ ຄັ້ງນີ້ ໄດ້ບັນລຸ ຜົນສຳເລັດ ຢ່າງຈົບງາມ ແລະ ຮັບຮອງເອົາ ຖະແຫລງ ການຮ່ວມ ກ່ຽວກັບ ການເພີ່ມທະວີ ບົດບາດ ຂອງລັດຖະສະພາ ໃນການຊຸກຍູ້ ການຮ່ວມມື ຮອບດ້ານ ລະຫວ່າງ 3 ປະເທດ. ຖະແຫລງ ການຮ່ວມ ໂດຍປະທານ ສະພາແຫ່ງຊາດ 3 ປະເທດ ລົງນາມ ຢືນຢັນຄືນໃໝ່ ຄຳໝັ້ນ ສັນຍາ ເປີດກວ້າງ ແລະ ເຮັດໃຫ້ ການພົວພັນ ຮ່ວມມື ແລະ ຄູ່ຮ່ວມມື ລັດຖະສະພາ ເລິກເຊິ່ງ ຂຶ້ນຕື່ມ, ແນໃສ່ ຮັກສາ ແລະ ປົກປ້ອງ ການຮ່ວມມື ຢ່າງແໜ້ນແຟ້ນ, ຕ່າງຝ່າຍ ຕ່າງມີຜົນປະໂຫຍດ ລະຫວ່າງ ສະພາແຫ່ງຊາດ 3 ປະເທດ, ຜ່ານນັ້ນ, ກໍ່ຊຸກຍູ້ ການຮ່ວມມື ໃນບັນດາ ຂົງເຂດ, ຄື: ການເມືອງ, ການປ້ອງກັນຊາດ - ປ້ອງກັນ ຄວາມສະຫງົບ, ວັດທະນະທຳ, ເສດຖະກິດ ເພື່ອການພັດທະນາ ເສດຖະກິດ-ສັງຄົມຂອງ 3 ປະເທດ ແລະ ກ່ຽວກັບ ບັນດາ ບຸລິມະສິດ ການຮ່ວມມືໃນ 3 ເສົາຄ້ຳຄື: ການເມືອງ - ການຕ່າງປະເທດ, ການປ້ອງກັນຊາດ-ປ້ອງກັນ ຄວາມສະຫງົບ ແລະ ເສດຖະກິດ - ວັດທະນະທຳ-ສັງຄົມ.ໃນວາລະ ອັດກອງປະຊຸມ ຄັ້ງນີ້, ທ່ານ ເວືອງດິ່ງເຫວະ, ປະທານ ສະພາແຫ່ງຊາດ ຫວຽດນາມ ເນັ້ນໜັກວ່າ: ໃນໂລກ ທີ່ເຕັມໄປດ້ວຍ ການຜັນແປ ແລະ ສັບສົນ ຄືໃນປະຈຸບັນ, ເລື່ອງເພີ່ມທະວີ ແລະ ປັບປຸງ ການພົວພັນ ຮ່ວມມື, ນ້ຳໃຈ ສາມັກຄີ ຍິ່ງສຳຄັນກວ່າ ເວລາໃດໝົດ ແລະ ຕ້ອງຫັນ ບັນດາ ຄຳໝັ້ນສັນຍາ ການຮ່ວມມື ໃຫ້ບັນລຸ ປະສິດທິຜົນ ຢ່າງແທດຈິງ.ຈາກນັ້ນ, ໂດຍຕາງໜ້າ ໃຫ້ສະພາແຫ່ງຊາດ ຫວຽດນາມ, ທ່ານ ເວືອງດິ່ງເຫວະ ໄດ້ມອບ-ຮັບ ໜ້າທີ່ ທີ່ສຳຄັນ ຈາກສະພາແຫ່ງຊາດ ລາວ ເປັນປະເທດ ເຈົ້າພາບ ຈັດກອງປະຊຸມ ສຸດຍອດ CLV ຄັ້ງທີ 2, ຄາດວ່າ ຈະຈັດຂຶ້ນ ໃນປີ 2025./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL