ຂປລ. ໃນວັນທີ 18 ພະຈິກ 2023 ຜ່ານມາ, ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມດ້ວຍທ່ານເຈົ້າແຂວງ ຫລວງພະບາງ, ແຂວງໄຊຍະບູລີ, ແຂວງວຽງຈັນ, ບັນດາທ່ານຮອງລັດຖະມົນຕີ, ຜູ້ຕາງໜ້າກະຊວງ-ອົງການ ແລະ ພາກສ່ວນທີ່ກ່ຽວຂ້ອງ ໄດ້ເຂົ້າຮ່ວມ ທີເປີດໂຮງງານຜະລິດແປ້ງມັນຕົ້ນ ແອລເອັສ ທີ່ເມືອງນານ, ແຂວງຫລວງພະບາງ.

ໃນໂອກາດນີ້, ທ່ານ ສົມຊາຍ ດວງຈະເລີນ ປະທານບໍລິສັດ ແອລເອັສ ການຄ້າຂາອອກ-ຂາເຂົ້າຈຳກັດ ເຈົ້າຂອງໂຮງງານ ຜະລິດແປ້ງ ມັນຕົ້ນ ໄດ້ລາຍງານໃຫ້ຮູ້ວ່າ: ໂຮງງານຜະລິດແປ້ງມັນຕົ້ນ ໄດ້ເລີ່ມຕົ້ນກໍ່ສ້າງໃນເດືອນ ມິຖຸ ນາ 2022, ໃຊ້ເວລາກໍ່ສ້າງສຳເລັດ 14 ເດືອນ, ມີເນື້ອທີ່ທັງໝົດ 61 ເຮັກຕາ ໂດຍແບ່ງອອກເປັນ 3 ເຂດ ຄື: ເຂດທຳການຜະລິດ ມີໂຮງງານຜະລິດແປ້ງມັນຕົ້ນ, ໂຮງງານ ຜະລິດອາຫານສັດ ແລະ ຝຸ່ນ; ເຂດບໍາບັດນໍ້າເສຍ ແລະ ຜະ ລິດໄບໂອແກັສ ແລະ ເຂດຫ້ອງການ, ຫໍພັກພະນັກງານ-ກຳມະກອນ. ໂຮງງານມີເຄື່ອງຈັກ ທຳການຜະລິດທີ່ທັນສະໄໝ ຈຳນວນ 2 ເຄື່ອງ, ມີກຳລັງການຜະລິດ 300 ໂຕນ/ມື້/ເຄື່ອງ, ລວມສອງເຄື່ອງຜະລິດ ໄດ້ 600 ໂຕນ/ມື້. ນອກນີ້ ຍັງມີເຄື່ອງຈັກທໍາການ ຜະລິດສິ່ງເສດເຫລືອ ຂອງມັນຕົ້ນດິບ ເປັນອາຫານສັດ, ຝຸ່ນ ແລະ ໃບໂອແກັສ; ໂຮງງານມີຄວາມຕ້ອງການມັນຕົ້ນດິບ ເພື່ອທຳການຜະລິດ 2.400 ໂຕນ/ມື້; ມີພະນັກງານ-ກຳມະກອນທັງໝົດ 450 ຄົນ; ມູນຄ່າ ການລົງທຶນ ກໍ່ສ້າງໂຮງງານທັງໝົດປະມານ 500 ຕື້ກີບ. ແຜນການການຜະລິດ ແລະ ສົ່ງອອກແປ້ງມັນຕົ້ນ ໃນປີ 2023-2024 ຈໍານວນ 108.000 ໂຕນ ໂດຍມີຄວາມຕ້ອງການ ມັນຕົ້ນດິບ 432.000 ໂຕນ ຊຶ່ງມູນຄ່າການສົ່ງອອກ ແປ້ງມັນຕົ້ນຈໍານວນ ດັ່ງກ່າວ ປະມານ 378 ລ້ານຢວນ; ຕະຫລາດທີ່ຈະສົ່ງອອກຫລັກແມ່ນ ສປ ຈີນ; ມັນ ຕົ້ນດິບ ທີ່ຈະສະໜອງໃຫ້ແກ່ໂຮງງານ ຕົ້ນຕໍແມ່ນມາຈາກ ແຂວງ ຫລວງພະບາງ, ແຂວງ ໄຊຍະບູລີ ແລະ ແຂວງ ວຽງຈັນ ໂດຍສະເພາະ ມັນຕົ້ນທີ່ບໍລິສັດ ໄດ້ສົ່ງເສີມປະຊາຊົນປູກ ດ້ວຍຮູບ ການເອົາແນວພັນ ແຈກຢາຍໃຫ້ປະຊາຊົນປູກ ແລ້ວຂາຍຜົນຜະລິດມັນຕົ້ນດິບ ໃຫ້ບໍລິສັດເກັບຊື້ຄືນ ໂດຍມີສັນຍາ ຜູກພັນຊື້-ຂາຍ ມັນຕົ້ນດິບຮ່ວມກັນ ເພື່ອຮັບປະ ກັນໃຫ້ໂຮງງານມີວັດຖຸດິບ ສະໜອງໃຫ້ແກ່ ການຜະລິດພຽງພໍ. ນອກນັ້ນ ທາງໂຮງງານ ຈະໄດ້ເກັບຊື້ ທົ່ວໄປກັບ ກະ ສິກອນທີ່ບໍ່ໄດ້ເຂົ້າຮ່ວມ ໃນໂຄງການຕື່ມອີກ. ສະເພາະປີ 2023 ເນື້ອທີ່ປູກມັນຕົ້ນ ຢູ່ພາຍໃນແຂວງຫລວງພະບາງ ທີ່ບໍລິສັດໄດ້ ມີຂໍ້ຜູກພັນສັນຍາ ທັງໝົດ 5.479 ເຮັກຕາ.

ທ່ານ ສົມຊາຍ ດວງຈະເລີນ ຍັງໃຫ້ຮູ້ອີກວ່າ: ການສ້າງໂຮງງານຜະລິດ ແປ້ງມັນຕົ້ນດັ່ງກ່າວ ເພື່ອປະກອບ ສ່ວນເຂົ້າໃນ ການສົ່ງເສີມການ ຜະລິດເປັນສິນຄ້າ ຂອງປະຊາຊົນລາວ, ສ້າງມູນຄ່າເພີ່ມ, ສ້າງຜະລິດຕະພັນ ທີ່ມີຄຸນນະພາບ, ປອດໄພໄດ້ມາດຕະຖານ ແລະ ສ້າງວຽກ ເຮັດງານທຳ ໃຫ້ປະຊາຊົນ ເຮັດໃຫ້ເຂົາເຈົ້າມີລາຍຮັບ, ຫລຸດພົ້ນຄວາມທຸກຍາກ ເປັນກ້າວໆ, ຊ່ວຍນຳເອົາເງິນຕາ ຕ່າງປະເທດເຂົ້າມາ ໝູນວຽນ ຢູ່ໃນລະບົບທະນາຄານ ແລະ ນໍາເອົາເງິນກີບ ມາຈໍລະຈອນໃນການເກັບຊື້ວັດຖຸດິບ, ເງິນເດືອນພະນັກງານ ແລະ ລາຍຈ່າຍອື່ນໆ ຢູ່ພາຍໃນປະເທດໃຫ້ຫລາຍຂຶ້ນ.

ໃນໂອກາດດຽວກັນ, ທ່ານ ເຈົ້າແຂວງຫລວງພະບາງ ກໍໄດ້ມີຄຳເຫັນຕໍ່ພິທີ ໂດຍໄດ້ກ່າວບາງຕອນວ່າ:  ໂຮງງານຜະລິດ ແປ້ງມັນຕົ້ນ ແຫ່ງນີ້ ເປັນໂຮງງານແຫ່ງທໍາອິດ ຢູ່ແຂວງຫລວງພະບາງ  ແລະ ເປັນຫົວໜ່ວຍການຜະລິດທີ່ທັນສະໄໝ ເພື່ອປຸງແຕ່ງຜະລິດຕະພັນ ກະສິກໍາເປັນສິນຄ້າ ສົ່ງອອກໄປຕ່າງປະເທດ ທີ່ໄດ້ມາດຕະຖານ, ເປັນການປະກອບສ່ວນເຮັດໃຫ້ ການເຕີບໂຕເສດຖະກິດຂອງແຂວງ ເພີ່ມຂຶ້ນ, ເປັນການສ້າງລາຍຮັບ ແລະ ວຽກເຮັດງານທໍາໃຫ້ ປະຊາຊົນບັນດາເຜົ່າ ຊຶ່ງເປັນການສ້າງລາຍຮັບ ຕົວຈິງໃຫ້ແກ່ສັງຄົມ, ປະກອບສ່ວນເຂົ້າໃນ ການແກ້ໄຂຄວາມທຸກຍາກຂອງປະຊາຊົນ. ແຂວງຫລວງພະບາງ ຈະສືບຕໍ່ສົມທົບບໍລິສັດຊຸກຍູ້, ສົ່ງເສີມ ປະຊາຊົນ ບັນດາເຜົ່າ, ບ້ານ, ຄອບຄົວທີ່ມີເງື່ອນໄຂປູກມັນຕົ້ນ ຮູບແບບການມີສ່ວນຮ່ວມ ຂອງປະຊາຊົນ ເພື່ອສະໜອງວັດຖຸດິບ ໃຫ້ໂຮງງານ ພຽງພໍ ຕາມຄວາມຕ້ອງການຂອງໂຮງງານ ໂດຍຈະມີມາດຕະການປ້ອງກັນ ບໍ່ໃຫ້ບຸກລຸກຖາງປ່າ ຫລື ທຳລາຍປ່າໄມ້, ຈັດສັນທີ່ດິນ ປ່າເຫລົ່າ ໃຫ້ປະຊາຊົນປູກແບບ ບໍ່ເຄື່ອນຍ້າຍ, ບໍ່ທໍາລາຍປ່າ ຕາມທິດການພັດທະນາ ທີ່ເປັນມິດກັບສິ່ງ ແວດລ້ອມ ແລະ ຍືນຍົງ. ສະເໜີ ບໍລິສັດສືບຕໍ່ ປະສານສົມທົບກັບ ອົງການປົກຄອງທ້ອງຖິ່ນ ໃນການສ້າງເງື່ອນໄຂ ອໍານວຍຄວາມສະດວກ, ສ້າງວຽກເຮັດງານທໍາ ໃຫ້ປະຊາຊົນ ໃຫ້ນັບມື້ຫລາຍຂຶ້ນ.

ພ້ອມກັນນີ້, ທ່ານ ກິແກ້ວ ສິງນາວົງ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ກໍໄດ້ຕີລາຄາວ່າ: ການກໍ່ສ້າງໂຮງງານແຫ່ງນີ້ ເປັນການຜັນຂະຫຍາຍນະໂຍບາຍ ການຜະລິດຕິດພັນກັບການປຸງແຕ່ງ ຂອງລັດຖະບານວາງອອກ ປາກົດຜົນເປັນຈິງຫລາຍຂຶ້ນ, ພ້ອມ ນັ້ນ ກໍເປັນໂຄງການຂະໜາດໃຫຍ່ ແລະ ທັນສະໄໝ. ກະຊວງກະສິກຳ ແລະ ປ່າໄມ້ ຈະສືບຕໍ່ໃຫ້ການ ສະໜັບສະໜູນ ຂອດການ ຜະລິດວັດຖຸດິບ ເພື່ອສະໜອງເຂົ້າ ໂຮງງານໃຫ້ພຽງພໍ, ທັງອຳນວຍຄວາມສະດວກດ້ານຕ່າງໆ ໃຫ້ມີຄວາມໂລ່ງລ່ຽນ ບົນພື້ນຖານ ການເຄື່ອນໄຫວທີ່ຖືກຕ້ອງຕາມລະບຽບການ.

ຂ່າວ-ພາບ: ກົມປະຊາສຳພັນ ຫສນຍ

KPL