ຂປລ
ພິທີລົງນາມແຜນການຮ່ວມມື ລະຫວ່າງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມໃນໄລຍະປີ 2026-2028 ຈັດຂຶ້ນໃນວັນທີ 15 ກໍລະກົດ 2026,
ຂປລ. ຕາງໜ້າຝ່າຍລາວລົງນາມໂດຍ ສະຫາຍ ນາງ ລີວົງ ລາວລີ ກຳມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ສະຫາຍ ຫງວຽນ ຮຸຍ ຕຽນ ກຳມະການສູນກາງພັກກອມມູນິດຫວຽດນາມ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ. ການລົງນາມແຜນການຮ່ວມມື ລະຫວ່າງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ໃນໄລຍະ ປີ 2026-2028 ປະກອບມີຫລາຍ ກິດຈະກໍາ ເປັນຕົ້ນການຈັດກອງປະຊຸມພົບປະເພື່ອແລກປ່ຽນບົດຮຽນກ່ຽວກັບວຽກງານຄ້າຍຄຸມຂັງ-ດັດສ້າງ ແລະ ການຕິດຕາມກວດກາການປະຕິບັດຄໍາຕັດສິນຂອງສານໃນຄະດີອາຍາ; ຄະນະຜູ້ແທນຂັ້ນສູງອົງການໄອຍະການປະຊາຊົນສູງສຸດ ແຫ່ງ ສປປ ລາວ ໄປຢ້ຽມຢາມ ແລະ ເຮັດວຽກເປັນທາງການຢູ່ ສສ ຫວຽດນາມ ໃນປີ 2027; ຄະນະຜູ້ແທນມະຫາວິທະຍາໄລ ໄອຍະການສາຂານະຄອນໂຮ່ຈີ່ມິງ ສສ ຫວຽດນາມ ມາຢ້ຽມຢາມ ແລະ ເຮັດວຽກເປັນທາງການຢູ່ ສປປ ລາວ; ການແລກປ່ຽນບົດຮຽນກ່ຽວກັບວຽກງານຕິດຕາມກວດກາໃນການແກ້ໄຂຄະດີແພ່ງ ແລະ ການແລກປ່ຽນປະສົບການການກວດກາວຽກງານ ການປະຕິບັດກົດໝາຍຕິດພັນກັບການສະກັດກັ້ນ ແລະ ຕ້ານການສໍ້ລາດບັງຫລວງ ລວມທັງຂະບວນການຕິດຕາມ, ຢຶດ ແລະ ຢຶດຊັບສິນແຫລ່ງກຳເນີດການສ້ໍລາດບັງຫລວງຈາກຕ່າງປະເທດ.
KPL
