ຂປລ. ສະຫະພັນແມ່ຍິງກະຊວງການຕ່າງປະເທດ ຈັດພິທີສະເຫລີມສະຫລອງ ແລະ ງານເທສະການອາຫານເນ່ືອງໃນໂອກາດຂ່ໍານັບຮັບຕ້ອນວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 71 ປີ (20 ກໍລະກົດ 1955-20 ກໍລະກົດ 2026) ໃນວັນທີ 14 ກໍລະ ກົດ 2026 ຢູ່ກະຊວງການຕ່າງປະເທດ, ພາຍໃຕ້ການເປັນປະທານ ຂອງ ທ່ານ ໄມທອງ ທໍາມະວົງສາ ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນໍາວຽກງານ 3 ອົງການຈັດຕັ້ງມະຫາຊົນ, ມີບັນດາພັນລະຍາການນໍາ, ພະນັກງານບໍານານເພດຍິງ, ອົງການຈັດຕັ້ງກຳມະບານ ແລະ ຊາວໜຸ່ມ, ຕະຫລອດຮອດຄະນະບໍລິຫານງານ ແລະ ສະມາຊິກສະຫະພັນແມ່ຍິງຂອງກະຊວງການຕ່າງປະເທດ, ມີຜູ້ຕາງໜ້າຈາກສູນກາງສະຫະພັນແມ່ຍິງລາວ, ສະຫະພັນແມ່ຍິງກະຊວງຂະແໜງການອ້ອມຂ້າງສູນກາງ ແລະ ບັນດາຫົວໜ່ວຍທຸລະກິດທີ່ໃຫ້ການສະໜັບສະໜູນໃນການຈັດງານເຂົ້າຮ່ວມ. ໃນພິທີ ທ່ານ ນາງ ແສງດາວັນ ວົງໄຊ ກໍາມະການຄະນະພັກ, ປະທານສະຫະພັນແມ່ຍິງກະຊວງການຕ່າງປະເທດ ໄດ້ນໍາສະເໜີໂດຍຫຍໍ້ກ່ຽວກັບປະຫວັດຄວາມເປັນມາ ແລະ ການເຕີບໃຫຍ່ຂະຫຍາຍຕົວ ຂອງການສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຕະຫລອດໄລຍະ 71 ປີ ຜ່ານມາ ກໍຄື ມູນເຊື້ອອັນດີງາມຂອງສະຫະພັນແມ່ຍິງລາວ ແລະ ແມ່ຍິງລາວບັນດາເຜົ່າ. ພ້ອມນີ້, ທ່ານ ໄມທອງ ທໍາມະວົງສາ ກໍໄດ້ໃຫ້ກຽດກ່າວເປີດພິທີຢ່າງເປັນທາງການ ແລະ ໄດ້ໃຫ້ທິດຊີ້ນໍາຕໍ່ການເຄື່ອນໄຫວວຽກງານຂອງແມ່ຍິງ ໂດຍສະເພາະຕໍ່ພະນັກງານ ເພດຍິງຂອງກະຊວງການຕ່າງປະເທດ ທີ່ຄວນສືບຕໍ່ເອົາໃຈໃສ່ຮັກສາມູນເຊື້ອອັນດີງາມຂອງແມ່ຍິງລາວ ກໍຄືການສືບຕໍ່ຈັດຕັ້ງປະຕິບັດຂໍ້ ແຂ່ງຂັນ 3 ດີ ຕິດພັນກັບຂະບວນການຮັກຊາດ ແລະ ພັດທະນາ ແລະ ໄດ້ສະແດງຄວາມຊົມເຊີຍຕໍ່ບັນດາຜົນສໍາເລັດທີ່ເອື້ອຍນ້ອງແມ່ຍິງກະຊວງການຕ່າງປະເທດ ຍາດມາໄດ້ໃນໄລຍະຜ່ານມາ. 

      ພ້ອມກັນນ້ັນ, ບັນດາຜູ້ເຂ້ົາຮ່ວມໄດ້ຢ້ຽມຢາມຮ້ານວາງສະແດງ ຂອງແຕ່ລະໜ່ວຍສະຫະພັນແມ່ຍິງກະຊວງການຕ່າງປະເທດ ທີ່ມີການຈໍາໜ່າຍສິນຄ້າ, ຜະລິດຕະພັນ, ອາຫານ ແລະ ເຄື່ອງດື່ມຫລາຍປະເພດ ຊຶ່ງສະແດງໃຫ້ເຫັນເຖິງຄຸນຄ່າຄວາມສໍາຄັນທາງດ້ານວັດທະນະທໍາຂອງລາວ ໂດຍສະເພາະແມ່ນພູມປັນຍາຂອງການປຸງແຕ່ງອາຫານລາວທີ່ເປັນເອກະລັກ, ພ້ອມທັງສ່ອງແສງໃຫ້ເຫັນເຖິງຄວາມສາມັກຄີຮັກແພງ ແລະ ການສະໜັບສະໜູນຊ່ວຍເຫລືອເຊິ່ງກັນ ແລະ ກັນຂອງເອື້ອຍນ້ອງແມ່ຍິງກະຊວງການຕ່າງປະເທດ.

      ໃນໂອກາດດັ່ງກ່າວ, ໄດ້ມີການມອບຂອງຂວັນອວຍພອນໃຫ້ແກ່ພັນລະຍາການນໍາ ແລະ ພະນັກງານບໍານານເພດຍິງຂອງກະຊວງການຕ່າງປະເທດ ເພື່ອເປັນການສະແດງຄວາມຊົມເຊີຍ, ຮູ້ບຸນຄຸນ ແລະ ລະນຶກເຖິງຄຸນງາມຄວາມດີໃນການປະກອບສ່ວນ ເຂົ້າໃນການປະຕິບັດໜ້າທີ່ວຽກງານຂອງກະຊວງການຕ່າງປະເທດຕະຫລອດໄລຍະຜ່ານມາ. ຄຽງຄູ່ກັນນີ້, ກໍໄດ້ມີການມອບໃບກຽດຕິຄຸນ ໃຫ້ແກ່ບັນດາຫົວໜ່ວຍທຸລະກິດຈໍານວນໜຶ່ງ ທີ່ໄດ້ປະກອບສ່ວນ ແລະ ໃຫ້ການສະໜັບສະໜູນໃນການຈັດງານຄັ້ງນີ້ອີກດ້ວຍ.

KPL