ຂປລ. ​ເມື່ອ​ບໍ່​ດົນ​ມາ​ນີ້, ກົມປູກຝັງ, ກະຊວງກະສິກຳ ແລະ ປ່າໄມ້ ຈັດພິທີສະເຫລີມສະຫລອງວັນຊາສາກົນຢູ່ລາວ ແນໃສ່ເສີມຂະຫຍາຍຊື່ສຽງຂອງຊາລາວ ທີ່ເປັນສິນຄ້າຄຸນນະພາບ ແລະ ສ້າງພາບພົດອັນເຂັ້ມແຂງຂອງຊາໃນລາວ, ພ້ອມທັງຊຸກຍູ້ໃຫ້ມີການແຂ່ງຂັນທີ່ເປັນມິດ ແລະ ການຮັບຮູ້ໃນຊຸມຊົນຊາທ້ອງຖິ່ນ ​ໂດຍໄດ້ເຕົ້າໂຮມເອົາກະສິກອນ ຜູ້ຜະລິດ, ຜູ້ຊ່ຽວຊານໃນຂະແໜງ, ຜູ້ບໍລິໂພກ, ແລະ ພາກສ່ວນທີ່ກ່ຽວຂ້ອງຈາກທົ່ວປະເທດ ມາ​ເຂົ້າ​ຮ່ວມ. ທັງນີ້, ກໍເພື່ອເປັນການຮັບຮູ້ເຖິງຄວາມສຳຄັນຂອງຊາ ໃນຊີວິດປະຈຳວັນຂອງປະຊາຊົນລາວ ແລະ ທ່າແຮງໃນການຫລຸດຜ່ອນຄວາມທຸກຍາກ ແລະ ສ້າງໂອກາດທາງດ້ານເສດຖະກິດໃນປະເທດ.

ໃນ​ພິທີ, ທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ກ່າວວ່າ: ເຖິງວ່າຂະແໜງຊາລາວເຮົາ ມີເງື່ອນໄຂການເຕີບໂຕທີ່ສະດວກ ແລະ ມີຄວາມໃກ້ຊິດຕິດແທດຂອງຕະຫລາດ ໃນຈີນກໍຕາມ, ແຕ່ເພື່ອບັນລຸເປົ້າໝາຍຢ່າງເຕັມທີ່, ຂະແໜງການຊາ ຍັງປະສົບກັບສິ່ງທ້າທາຍຫລາຍຢ່າງ ໂດຍສະເພາະ, ກະສິກອນຍັງມີຄວາມຮູ້ ແລະ ຄວາມສາມາດກ່ຽວກັບການປຸງແຕ່ງຊາທີ່ຈຳກັດ ແລະ ເຂົາເຈົ້າບໍ່ໄດ້ຮັບການສົ່ງເສີມພຽງພໍເພື່ອສົ່ງອອກຊາ ​ເຊິ່ງການຈັດງານຄັ້ງນີ້, ແມ່ນເນັ້ນໃສ່​ເຕົ້າ​​ໂຮມ​ເອົາບັນດາຜູ້ມີບົບບາດໃນລະບົບຕ່ອງໂສ້ຄຸນຄ່າຊາ  ເພື່ອສົ່ງເສີມພາບພົດທີ່​ດີ ແລະ ການຂາຍຊາລາວ. ພ້ອມ​ນີ້, ທ່ານ​ຍັງ​ສະ​ແດງ​ຄວາມ​ຫວັງ​ວ່າ: ງານຄັ້ງນີ້ ຈະຊ່ວຍສົ່ງເສີມວັດທະນະທຳຂອງຊາລາວ ແລະ ຄຸນນະພາບຂອງຊາໃນທົ່ວປະເທດ ໂດຍສະເພາະຂອງຊາລາວ ທີ່ມັກຈະຜະລິດຢູ່ໃນລະບົບນິເວດປ່າ ໄມ້ ໂດຍກະສິກອນລາຍຍ່ອຍ ຄວນຕ້ອງໄດ້ຮັບການອະນຸລັກ ແລະ ​ໃຫ້​ມີ​ການຂະຫຍາຍຕົວ.

ທ່ານນາງ ຊີບແລງ ຊົວຣ໌ (Siv-Leng CHHUOR) ເອກອັກຄະລັດຖະທູດຝຣັ່ງ ປະຈຳລາວ ໄດ້ກ່າວວ່າ: ພວກເຮົາມີຄວາມເຊື່ອໝັ້ນວ່າ ງານສົ່ງເສີມການດື່ມຊາ ນີ້ຈະປະສົບຜົນສຳເລັດ ແລະ ຫວັງວ່າ ວັນຊາສາກົນ ຈະໄດ້ຮັບການຈົດທະບຽນເປັນໜຶ່ງ ໃນບັນດາເຫດການສຳຄັນປະຈຳປີຂອງບັນ ດາວຽກງານໂຄສະນາພາຍໃນ ແລະ ສາກົນຂອງ ສປປ ລາວ.

ຜູ້ຜະລິດ ແລະ ສົ່ງອອກຊາຈາກທົ່ວປະເທດລາວ ແມ່ນຮ່ວມສະເຫລີມສະຫລອງວັນສໍາຄັນນີ້ ໂດຍມີຜູ້ຜະລິດ ແລະ ບັນດາບໍລິສັດຈາກແຂວງບໍ່ແກ້ວ, ໄຊຍະບູລີ, ຜົ້ງສາລີ, ຈຳປາສັກ ​ແລະ ​ແຂວງຫົວພັນ ໄດ້ວາງສະແດງຜະລິດຕະພັນຂອງຕົນ ເຊິ່ງສະແດງເຖິງຄວາມຫລາກຫລາຍ ແລະ ເອກະລັກຂອງເຂດແດນການປູກຊາຂອງເຂົາເຈົ້າ.

KPL