ຂປລ.ຕາມ​ຂ່າວ​ຈາກ ຣອຍ​ເຕີ,ວັນ​ທີ23​ມີນາ​ນີ້, ສະຫະ ​ປະຊາ​ຊາດ ຫລື ສປຊ (UN)ກ່າວ​ເຕືອນ​ວ່າ: ປະລິມານ ນ້ຳ​ທົ່ວ​ໂລກ ພວມ​ຫລຸດ​ລົງ ຫລັງ​ຈາກ ​ການ​ບໍລິ​ໂພ​ກ ຫລາຍ​ເກີ​ນ​ໄປ  ​ແລະ ການ​ໃຊ້​ນ້ຳ ​ແບບ​ບໍ່​ໝັ້ນຄົງ ລວມທັງ ​ການລະ​ເຫ​ີຍອາຍ ຂອງ​ນ້ຳ ຍ້ອນ​ຄວາມ​ຮ້ອນ​ ຂອງ​ໂລກ ​ເພີ່ມ​ຂຶ້ນ. ພາຍຫລັງ​ສປຊ ເປັນ​ເຈົ້າພາບ ​ຈັດ​ກອງ​ປະຊຸມ ​ຄັ້ງ​ທຳ​ອິດ​ ກ່ຽວ​ກັບ​ ຄວາມ​ໝັ້ນຄົງ​ ທາງ​ນ້ຳ ​ໃນ​ຮອບ​ເກືອບ​ ເຄິ່ງສະຕະວັດ ຜ່ານ​ມາ ​ເພື່ອສົ່ງ​ສັນຍານ​ເຕືອນ ​ໃຫ້​ລັດຖະບານ ​ຂອງ​ປະ​ເທດ​ຕ່າງໆ​ ໃນ​ການ​ຄຸ້ມ​ຄອງ​ນ້ຳ​ແມ່ນ​ໜຶ່ງ ໃນຊັບພະຍາກອນ ຮ່ວມກັນ ຂອງມະນຸດ ເຮັດໃຫ້ດີ ຫລາຍ​ຂຶ້ນ ກວ່າ​ເກົ່າ ​ເນື່ອງ​ຈາກ 1 ​ໃນ 4ຂອງ​ປະຊາກອນ​ໂລກ ​ເອື້ອຍ​ອີງ​ໃສ່ ​ນ້ຳ​ດື່ມ ບໍ່​ປອດ​ໄພ ສ່ວນ​ຈຳນວນ​ ອີກ​ເຄິ່ງໜຶ່ງ ຂາດ​ສຸຂະ​ອານາ​ໄມ ຂັ້ນພື້ນຖານ ຂອງ​ນ້ຳ.​ ​ໃນ​ຂະນະ​ດຽວ​ກັນ ​ເກືອບ 3​ໃນ4​ ຂອງ​ໄພພິບັດ ຕ່າງໆ ທົ່ວ​ໂລກ ​ເກີດ​ຂຶ້ນ ​ຜ່ານ​ມາ ​ທັງ​ໝົດ ສ່ວນ​ໃຫຍ່​ ກ່ຽວຂ້ອງ ​ກັບນ້ຳ.​ໃນ​ໂອກາດ​ນີ້ ທ່າ​ນ ນາງ ລິນ​ດາ ​ໂທ​ມັດສ-ກຣີນຟີ​ລ(Linda Thomas-Greenfield)ເອກ​ອັກ ​ຄະ​ລັດ​ຖະ​ທູດ ສ.​ອາ​ເມ​ລິ​ກາ​ ປະ​ຈຳ​ ສປຊ ​ກ່າວ​ວ່າ: ສ.ອາ​ເມ​ລິ​ກາ ​ຈະ​ລົງ​ທຶນ 49 ຕື້​ໂດ​ລາ ສະຫະລັດ ​ໃນ​ດ້ານ​ນ້ຳ ແລະ ສຸ​ຂະ​ອາ​ນາ​ໄມ ​ຢູ່​ພາຍ​ໃນ ແລະ ທົ່ວ​ໂລກ.ເງິນຈຳນວນນີ້ ຈະຊ່ວຍສ້າງ ວຽກເຮັດ ງານທຳ, ສະກັດກັ້ນ ການຂັດແຍ້ງ, ປົກປ້ອງ ສຸຂະພາບ ຂອງປະຊາຊົນ, ຫລຸດຜ່ອນ ຄວາມສ່ຽງ ຂອງຄວາມອຶດຢາກ ແລະ ຄວາມອຶດຫິວ.ລວມທັງ ຊ່ວຍເຫລືອ ໃນການຕອບໂຕ້ຕ້ານ​ການ​ ປ່ຽນ​ແປງ ​ຂອງ​ດິນ​ຟ້າ ​ອາ​ກາດ​ແລະ ໄພພິບັດ ທາງທໍາມະຊາດ./.

 (ບັນນາທິການຂ່າວ: ຕ່າງປະເທດ), ຮຽບຮຽງຂ່າວໂດຍ: ສະໄຫວ ລາດປາກດີ

KPL