ຂປລ
ຂປລ. ໃນໂອກາດ ລົງເຄື່ອນໄຫວວຽກງານຢູ່ ເມືອງຄຳເກີດ ແຂວງບໍລິຄຳໄຊ, ວັນທີ 22 ມີນາ 2023 ນີ້ ທ່ານ ທອງລຸນ ສີສຸລິດ ປະທານປະເທດ ໄດ້ລົງຢ້ຽມຢາມພື້ນການຜະລິດປະຊາຊົນບ້ານນາຫາດ ເມືອງຄຳເກີດ ໂດຍມີ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ພ້ອມດ້ວຍການນຳຂັ້ນເມືອງຮ່ວມພາທາງ
ຂປລ. ໃນໂອກາດ ລົງເຄື່ອນໄຫວວຽກງານຢູ່ ເມືອງຄຳເກີດ ແຂວງບໍລິຄຳໄຊ, ວັນທີ 22 ມີນາ 2023 ນີ້ ທ່ານ ທອງລຸນ ສີສຸລິດ ປະທານປະເທດ ໄດ້ລົງຢ້ຽມຢາມພື້ນການຜະລິດປະຊາຊົນບ້ານນາຫາດ ເມືອງຄຳເກີດ ໂດຍມີ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ພ້ອມດ້ວຍການນຳຂັ້ນເມືອງຮ່ວມພາທາງ, ມີອຳນາດການປົກຄອງຂັ້ນບ້ານ, ປະຊາຊົນບັນດາເຜົ່າບ້ານນາຫາດ ຮັບຕ້ອນເປັນຂະບວນຟົດ ຟື້ນ.
ການລົງຢ້ຽມຢາມຄັ້ງນີ້, ທ່ານ ສົມພົນເພັງ ລາດສະສົມບັດ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຄຳເກີດ ໄດ້ລາຍງານສະພາບໂດຍລວມ ກ່ຽວກັບການປູກຜັກເປັນສິນຄ້າ, ບ້ານນາຫາດ ຂຶ້ນກັບເຂດໜອງອໍ້-ນາແປ, ປະຊາຊົນຢຶດຖືອາຊີບປູກຝັງ-ລ້ຽງສັດເປັນຕົ້ນຕໍ ໂດຍອີງໃສ່ຈຸດເດັ່ນດິນ, ນໍ້າ ລວມທັງສະພາບອາກາດເໝາະສົມ ຄະນະນໍາຂອງເມືອງ ກໍຄື ຫ້ອງການກະສິກຳ ແລະ ປ່າໄມ້ເມືອງສຸມໃສ່ລົງຊຸກຍູ້-ສົ່ງເສີມ, ຊອກຫາແຫລ່ງທຶນຮອນເຂົ້າມາພັດທະນາ ປີ 2001-2002 ສະເໜີໂຄງການປັບປຸງຊີວິດການເປັນຢູ່ຂອງປະຊາຊົນ ລົງມາຊຸກຍູ້-ສົ່ງເສີມ ແລະ ປະເມີນຄວາມເປັນໄປໄດ້ ໃນການປູກຜັກສະອາດ ຕາມເຕັກນິກຂອງນັກວິຊາການ; ປີ 2004, ມີ 15 ຄອບຄົວ ໄລຍະນັ້ນການປູກຜັກສ່ວນຫລາຍແມ່ນປູກໃນໄລຍະລະດູແລ້ງເດືອນ 11-3 ຂອງທຸກໆປີ ເຊິ່ງເຫັນວ່າ ມີທ່າອ່ຽງລາຍຮັບດີຂຶ້ນເທື່ອລະກ້ວາ, ເປັນຕົວແບບໃຫ້ແກ່ຄອບຄົວອື່ນໆ, ປີ 2019 ຫ້ອງການກະສິກຳ ແລະ ປ່າໄມ້ເມືອງຄໍາເກີດ, ຈຶ່ງໄດ້ຂຽນແຜນ ຂໍງົບປະມານນຳພະແນກ ກະສິກຳ ແລະ ປ່າໄມ້ 104 ລ້ານກວ່າກີບ ເພື່ອສ້າງເຮືອນຮົ່ມປູກໄລຍະລະດູຝົນ, ຊື້ຜ້າຢາງເຮັດເຮືອນຮົ່ມ 10 ກໍ້, ເຄື່ອງຈັກພວນດິນໃຫ້ 2 ເຄື່ອງ ແລະ ມອບແນວພັນພືດຜັກປະເພດຕ່າງໆ ໃຫ້ຈໍານວນໜຶ່ງ; ປີ 2020-2021 ໄດ້ຮັບທຶນງົບປະມານ ຈາກໂຄງການແຜນງານລາວ 030, ທຶນຊ່ວຍເຫລືອຈາກລັດຖະບານແຫ່ງ ຣາຊະອານາຈັກລຸກຊຳບວກ ເຂົ້າມາຊຸກຍູ້-ສົ່ງເສີມເປັນເງິນ 348 ລ້ານກວ່າກີບ, ສ້າງຫ້ອງການກຸ່ມຊາວສວນ 1 ຫລັງ, ຊື້ເຄື່ອງຕົ້ມນໍ້າຄວັນໄມ້ 1 ເຄື່ອງ, ເຄື່ອງບົດຝູ່ນ 1 ເຄື່ອງ, ຈັດຝຶກອົບຮົມໃຫ້ກຸ່ມປູກຜັກຮູ້ເຕັກນິກການປູກ ແລະ ຂັ້ນຕອນການຜະລິດປູກຜັກອິນຊີ ເຊິ່ງມີ ເຄື່ອງບົດຝຸ່ນ 1 ເຄື່ອງ; ປີ 2020 ໄດ້ນໍາພາກຸ່ມປູກຜັກໄປຖອດຖອນບົດຮຽນຢູ່ແຂວງຊຽງຂວາງ 1 ຄັ້ງ ນະຄອນຫລວງວຽງຈັນ 2 ຄັ້ງ, ປີ 2020-2021 ໄດ້ຫັນປ່ຽນ ຈາກການປູກຜັກສະອາດ, ມາເປັນການປູກຜັກອິນຊີ, ມີສະມາຊິກທັງໝົດ 15 ຄອບຄົວ, ມີເຮືອນຮົ່ມ 21 ຫລັງ, ແຕ່ງຕັ້ງຄະນະບໍລິຫານກຸ່ມປູກຜັກອິນຊີ 7 ທ່ານ ແລະ ໄດ້ແບ່ງເປັນ 4 ຈຸ, ສ່ວນ 25 ຄອບຄົວແມ່ນຍັງປູກຜັກສະອາດ ໄລຍະ 5 ປີຜ່ານມາສະເລ່ຍລາຍຮັບທັງໝົດ 2,4 ຕື້ກວ່າກີບ. ຜົນໄດ້ຮັບກໍາໄລທັງໝົດ 1 ຕື້ກວ່າກີບ, ປະຈຸບັນກຸ່ມປູກຜັກອິນຊີ ບ້ານນາຫາດ ໄດ້ຮັບໃບຢັ້ງຢືນມາດຕະຖານກະສິກຳອິນຊີລາວ ຈາກກົມປູກຝັງ, ກະຊວງກະສິກຳ ແລະ ປ່າໄມ້, ສາມາດປູກຜັກອີນຊີໄດ້ທັງ 2 ລະດູການ, ສາມາດຕອບສະໜອງໃຫ້ແກ່ທ່ອງຕະຫລາດພາຍໃນເມືອງ ແລະ ສົ່ງອອກຕ່າງແຂວງ.
ໂອກາດນີ້, ທ່ານ ທອງລູນ ສີສຸລິດ ໄດ້ຍ້ອງຍໍຊົມເຊີຍຜົນງານການນໍາພາ-ຊີ້ນຳ ອຳນາດການປົກ ກຄອງແຂວງບໍລິຄຳໄຊ ທຸກຂັ້ນ, ພ້ອມທັງໄດ້ຮຽກຮ້ອງໃຫ້ປະຊາຊົນພາຍໃນບ້ານ ຈົ່ງເພີ່ມທະວີຄວາມສາມັກຄີປອງດອງ ຊ່ວຍເຫລືອເຊິ່ງກັນ ແລະ ກັນ, ເອົາໃຈໃສ່ຫ້າວຫັນຕໍ່ການຜະລິດ, ຜະລິດໃຫ້ຫລາຍກາຍເປັນສິນຄ້າ, ພາຄອບຄົວຫລຸດພົ້ນອອກຈາກຄວາມທຸກຍາກ. ພ້ອມທັງມອບເງິນຈຳນວນໜຶ່ງເພື່ອໝູນໃຊ້ນຳໃຊ້ເຂົ້າການຜະລິດ ຕື່ມອີກ.
ໂອກາດທີ່ທ່ານ ປະທານປະເທດ ມາເຄື່ອນໄຫວຢູ່ເມືອງຄຳເກີດ ໃນຄັ້ງນີ້, ທ່ານ ກອງແກ້ວ ໄຊສົງຄາມ ຕາງໜ້າໃຫ້ຄະນະບໍລິຫານງານພັກແຂວງ, ສະພາປະຊາຊົນແຂວງ, ພະນັກງານນັກຮົບ,ປະຊາ ຊົນຊົນບັນດາເຜົ່າຊາວແຂວງບໍລິຄຳໄຊ ໄດ້ນຳເອົາກະຕ່າດອກໄມ້ ເຂົ້າອວຍພອນທ່ານປະທານປະເທດ ເນື່ອງໃນໂອກາດ ວັນສ້າງຕັ້ງພັກປະຊາຊົນ ປະຕິວັດລາວ 22 ມີນາ ຄົບຮອບ 68 ປີ.
ຂ່າວ-ພາບ: ສາຍສະໝອນ
KPL