ຂປລ. ລາວ-ອິຕາລີ ໄດ້ຮ່ວມກັນ ຈັດວາງສະແດງສິນຄ້າ ລາວ-ອິຕາລີ ເອັກໂປ ປະຈໍາປີ 2023 ໃນ ວັນທີ 16 ມີນາ 2023 ໂດຍຕັ້ງເປົ້າ ໝາຍສູ້ຊົນສ້າງມູນຄ່າ ການສົ່ງອອກ-ນໍາເຂົ້າ ສິນຄ້າສອງຝ່າຍໃຫ້ ບັນລຸຢ່າງໜ້ອຍ 150 ລ້ານໂດລາ ຂຶ້ນໄປ ຂະນະທີ່ສິນຄ້າທີ່ ສປປ ລາວ ສົ່ງອອກໄປປະເທດອິຕາລີ ນັ້ນສ່ວນ ໃຫຍ່ແມ່ນກາເຟ, ເຄື່ອງນຸ່ງຫົ່ມ, ເກີບ ແລະ ອື່ນໆ.

ງານວາງສະແດງສິນຄ້າ ລາວ-ອິຕາລີ ເອັກໂປ ຈະດໍາເນີນເປັນເວລາ 3 ວັນ ນັບແຕ່ວັນທີ 16-18 ມີນາ 2023 ທີ່ຫໍປະຊຸມແຫ່ງຊາດ ຫລັກ 6 , ໂດຍໃຫ້ກຽດເຂົ້າຮ່ວມ ຂອງທ່ານ ມະໂນທອງ ວົງໄຊ ຮອງລັດ ຖະມົນຕີກະຊວງອຸດສາຫະກໍາ, ທ່ານ ໂອລີ ເວຍໂຣ ຣຸດສະໂກນີ (Oliviero Rusconi) ຫົວໜ້າກົງສູນ ກິດຕິມະສັກປະເທດ ອິຕາລີ ປະຈຳ ສປປ ລາວ,  ສະມາຄົມທຸລະກິດຂອງ ສປປ ລາວ, ພາກທຸລະກິດ ຂອງອິຕາລີ, ຜູ້ ປະກອບການພາກລັດ-ເອກະຊົນ ເຂົ້າຮ່ວມຫລາຍກວ່າ 200 ຄົນ. ງານວາງສະແດງສິນຄ້າຄັ້ງນີ້ ມີຫ້ອງສະແດງທັງໝົດ 84 ຫ້ອງ ໃນນັ້ນມີຫ້ອງວາງສະແດງສິນຄ້າ ຈາກປະເທດອິຕາລີ 74 ຫ້ອງ, ມີຈໍານວນ 54 ບໍລິສັດຈາກອິຕາລີ ແລະ ທີ່ເຫລືອແມ່ນຜູ້ປະກອບການລາວ ແລະ ປະເທດອື່ນໆ ເຂົ້າຮ່ວມເຊັ່ນກັນ. ສ່ວນສິນຄ້າຈາກປະເທດອິຕາລີ ນໍາເອົາມາສະແດງປະກອບມີຄື: ເຟີນີ ເຈີ້, ເຕັກ ໂນໂລຊີ, ແຜ່ນແພ, ອາຫານ, ເຊລາມິກ, ເຄື່ອງດື່ມປະເພດວາຍ, ຜະລິດຕະພັນແກ້ວ, ເຄື່ອງກົນຈັກ ແລະ ອື່ນໆ, ສ່ວນ ສປປ ລາວມີ 9 ຫົວໜ່ວຍທຸລະກິດ ປະກອບມີຫລາຍຂະແໜງການ ຄື: ກາເຟ, ຊາ, ຫັດຖະກໍາ, ເຟີນີເຈີ້ ແລະ ອື່ນໆ.

ທ່ານ ໄຊສົມເພັດ ນໍລະສິງ ຫົວ ໜ້າກົມສົ່ງເສີມການຄ້າກ່າວໃນພິທີເປີດງານ ວາງສະແດງສິນຄ້າ ລາວ-ອິຕາລີ ເອັກໂປ 2023 ນີ້ວ່າ: ເກືອບ 3 ປີທີ່ພວກເຮົາ ບໍ່ໄດ້ຈັດການເຄື່ອນໄຫວ ຫລື ກິດຈະກໍາວາງສະ ແດງສິນຄ້າ ເພື່ອແນະນໍາສິນຄ້າພາຍໃນ ໃຫ້ຕ່າງປະເທດຮັບຮູ້ ແລະ ເຫັນເປັນທີ່ປະຈັກຕາ ເນື່ອງຈາກການແພ່ລະບາດພະຍາດໂຄວິດ ນັບແຕ່ ທ້າຍປີ 2019 ເປັນຕົ້ນມາ ແຕ່ມາ ຮອດທ້າຍປີ 2022 ລັດ ຖະບານ ໄດ້ປະກາດເປີດປະເທດຢ່າງທາງການນັ້ນ ຖືວ່າເປັນໂອກາດດີ ແລະ ເປັນສິ່ງທ້າທາຍຕໍ່ຜູ້ປະກອບການສອງຝ່າຍ, ຜູ້ຊື້ຜູ້ຂາຍ, ນັກລົງທຶນ, ນັກທ່ອງທ່ຽວ, ການສົ່ງອອກ-ນໍາ ເຂົ້າເພື່ອຍົກລະດັບເຮັດ ໃຫ້ການພົວພັນ ຮ່ວມມືສອງປະເທດ ຍິ່ງມີຄວາມແໜ້ນແຟ້ນຂຶ້ນກວ່າເກົ່າ.

ທ່ານຫົວໜ້າກົມສົ່ງເສີມການຄ້າ ຍັງກ່າວຕື່ມອີກວ່າ: ຄວາມຈິງການ ພົວພັນຂອງ ສອງປະເທດ ລາວ-ອິຕາລີ ໄດ້ມີມາແຕ່ດົນນານແລ້ວ, ໂດຍສະເພາະການພົວພັນຮ່ວມມື ດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ, ສາທາລະນະສຸກ, ການສຶກສາ ແລະ ດ້ານອື່ນໆ ກໍໄດ້ຂະຫຍາຍຕົວ ໄປພ້ອມໆກັນ. ສໍາລັບ 5 ປີທີ່ຜ່ານມາ (2018 - 2022) ມູນຄ່າການຄ້າລະຫວ່າງ ສອງຝ່າຍສາມາດບັນລຸ ໄດ້ຫລາຍກ່ວາ 113 ລ້ານໂດລາສະຫະລັດ ໃນນັ້ນ ການສົ່ງອອກກວມເອົາ 65%,  ໃນນັ້ນ ສປປ ລາວ ສົ່ງອອກ ສິນຄ້າໄປປະເທດອິຕາລີ ບັນລຸ 74 ລ້ານກ່ວາໂດລາສະຫະລັດ ໂດຍສ່ວນໃຫຍ່ແມ່ນເຄື່ອງນຸ່ງ ຫົ່ມ, ເກີບ, ກາເຟ  ແລະ ອື່ນໆ.
 ຂ່າວ+ພາບ: ເກີດຂວັນໃຈ

KPL