ຂປລ
ຂປລ. ຄົນເຮົາຢາກມີສຸຂະພາບແຂງແຮງ, ສິ່ງສຳຄັນແມ່ນຢູ່ກັບການຮັກສາປະຈຳວັນ ແລະ ຍຶດໝັ້ນການອອກກຳລັງກາຍຢ່າງຕໍ່ເນື່ອງ, ແຕ່ບໍ່ແມ່ນການປິ່ນປົວຫລັງເຈັບປ່ວຍ.
ຂປລ. ຄົນເຮົາຢາກມີສຸຂະພາບແຂງແຮງ, ສິ່ງສຳຄັນແມ່ນຢູ່ກັບການຮັກສາປະຈຳວັນ ແລະ ຍຶດໝັ້ນການອອກກຳລັງກາຍຢ່າງຕໍ່ເນື່ອງ, ແຕ່ບໍ່ແມ່ນການປິ່ນປົວຫລັງເຈັບປ່ວຍ. ສຳລັບພັກກອມມູນິດຈີນ ທີ່ກຳອຳນາດມາເປັນເວລາຍາວນານ, ການຄຸ້ມຄອງພັກຢ່າງເຂັ້ມງວດຮອບດ້ານ ແມ່ນ “ການອອກກຳລັງກາຍຂອງພັກການເມືອງ” ທີ່ເປັນປົກກະຕິ, ມັນບໍ່ແມ່ນການປັບປຸງເປັນໄລຍະ, ແຕ່ເປັນການຝຶກຝົນຫລໍ່ຫລອມໂດຍຕົນເອງ ແລະ ການປະຕິວັດໂດຍຕົນເອງ ໃນໄລຍະຍາວສຳລັບພັກທີ່ມີອາຍຸຮ້ອຍກວ່າປີ ເພື່ອຮັກສາຄວາມເຂັ້ມແຂງຂອງຕົນ.
ທ່ານອາດຈະຄິດວ່າ “ການຄຸ້ມຄອງພັກຢ່າງເຂັ້ມງວດຮອບດ້ານ” ແມ່ນນິຍາມທາງການເມືອງທີ່ເຂົ້າໃຈຍາກ, ແຕ່ຄວາມຈິງແລ້ວແກນກາງຂອງມັນລຽບງ່າຍທີ່ສຸດ. ເໝືອນກັບການອອກກຳລັງກາຍຂອງມະນຸດ ທີ່ເປັນການບຳລຸງຮັກສາທຸກດ້ານ ຊຶ່ງໄດ້ກວມເຖິງການຮັດແໜ້ນພື້ນຖານ, ການຮັກສາຫຸ່ນ, ການຂັບສານພິດ ແລະ ການເສີມສ້າງກະດູກໃຫ້ເຂັ້ມແຂງ, ການຄຸ້ມຄອງພັກ ຢ່າງເຂັ້ມງວດຮອບດ້ານ ກໍເໝືອນກັບ “ການຄຸ້ມຄອງສຸຂະພາບ” ຢ່າງຮອບດ້ານຕໍ່ຖັນແຖວທົ່ວພັກ. ການຝຶກຝົນຫລໍ່ຫລອມ ດ້ານແນວຄິດແມ່ນ “ການຮັດແໜ້ນພື້ນຖານຂອງອຸດົມການ”, ເພີ່ມຄວາມໝັ້ນໃຈ ທາງດ້ານຈິດໃຈ ແລະ ປ້ອງກັນການບັ່ນທອນຈິດໃຈ; ການປັບປຸງແບບແຜນ ແລະ ເຂັ້ມງວດລະບຽບວິໄນແມ່ນ “ປັບປຸງທ່າທາງ”, ປັບປຸງແກ້ໄຂແບບແຜນທີ່ບໍ່ດີ ແລະ ດັດແກ້ການປະພຶດຕ່າງໆທີ່ຜິດເຂວ; ການຕ້ານການສໍ້ລາດບັງຫລວງ ເປັນ “ການຂັບສານພິດ ແລະ ປາບພະຍາດ”, ກຳຈັດພະຍາດຊຳເຮື້ອ ແລະ ຄວາມສ່ຽງທີ່ແຝງຊ້ອມພາຍໃນຖັນແຖວ; ການກໍ່ສ້າງລະບຽບການ ເປັນການ “ຫັດກາຍບໍລິຫານໃຫ້ສຸຂະພາບແຂງແຮງ”, ເພື່ອເສີມສ້າງພື້ນຖານກົນໄກໄລຍະຍາວ ໃຫ້ໝັ້ນແກ່ນ, ເຮັດໃຫ້ການຄຸ້ມຄອງພັກ ແລະ ການບໍລິຫານພັກ ມີລະບຽບການທີ່ເປັນຫລັກອ້າງອີງ ແລະ ມີປະສິດທິຜົນເປັນປະຈຳໃນໄລຍະຍາວ.
ສະຕິປັນຍາແຫ່ງການບໍລິຫານໂດຍຕົນເອງດັ່ງກ່າວ ໄດ້ຝັງຮາກເລິກຢູ່ໃນວັດທະນະທຳ ອັນເປັນມູນເຊື້ອທີ່ດີງາມຂອງຈີນ. ນັບແຕ່ບູຮານນະການເປັນຕົ້ນມາ, ຈີນໄດ້ສົ່ງເສີມ “ການຝຶກຝົນຫລໍ່ຫລອມຕົນເອງ ແລະ ສຳຫລວດຕົນເອງ, ມີຄວາມເຂັ້ມງວດຕໍ່ຕົນເອງ”, ຄົນຈີນໃນສະໄໝບູຮານ ໄດ້ເອົາໃຈໃສ່ສະແຫວງຫາເປົ້າໝາຍ “ການສຳຫລວດກວດກາຕົນເອງ ຫລາຍເທື່ອໃນທຸກມື້” ແລະ “ຝຶກຝົນຫລໍ່ຫລອມຕົນເອງ ໃຫ້ມີຄຸນສົມບັດກ່ອນແລ້ວ ຈຶ່ງສາມາດບໍລິຫານປະເທດ”, ປະຕິບັດຕາມຫລັກການຄົບຄ້າສະມາຄົມ ແລະ ການບໍລິຫານປະເທດແບບ “ປັບປຸງກໍ່ສ້າງຕົນເອງໃຫ້ສຸດຈະລິດ ກ່ອນຈະຮຽກຮ້ອງຜູ້ອື່ນມາຮຽນເອົາແບບຢ່າງນຳ” ຢ່າງສະເໝີຕົ້ນສະເໝີປາຍ. ຄົນຈີນບູຮານເຫັນວ່າ: ຜູ້ກຳອຳນາດມີພຽງແຕ່ເຂັ້ມງວດຕໍ່ຕົນເອງ ແລະ ຮັກສາຄວາມປອດໃສຂາວສະອາດ ຂອງຕົນເທົ່ານັ້ນ, ຈຶ່ງຈະສາມາດເຮັດໃຫ້ປະຊາຊົນເຊື່ອຖື ແລະ ສ້າງພາລະກິດໃຫ້ຈະເລີນຮຸ່ງເຮືອງ, ນຳພາປະເທດໄປສູ່ຄວາມສະຫງົບ ໝັ້ນຄົງຖາວອນ. ການຄຸ້ມຄອງພັກຢ່າງເຂັ້ມງວດຮອບດ້ານ ກໍແມ່ນການສືບທອດ ແລະ ປະດິດສ້າງແບບທັນສະໄໝ ຕໍ່ສະຕິປັນຍາດັ້ງເດີມຂອງຈີນ ແຫ່ງການຝຶກຝົນຫລໍ່ຫລອມຕົນເອງ ໃຫ້ມີຄຸນສົມບັດ ແລະ ການບໍລິຫານປະເທດ, ໂດຍຫັນແນວຄິດການເຂັ້ມງວດຕໍ່ຕົນເອງ ແລະ ການສຳຫລວດຕົນເອງທີ່ສືບທອດມາເປັນເວລາພັນປີ ໃຫ້ເປັນລະບຽບການຢ່າງເປັນລະບົບ ແລະ ພຶດຕິກຳໄລຍະຍາວຂອງການຄຸ້ມຄອງພັກການເມືອງໃນຍຸກປັດຈຸບັນ.
ຍ້ອນຫຍັງພັກກອມມູນິດຈີນ ຈຶ່ງຍຶດໝັ້ນການຄຸ້ມຄອງພັກຢ່າງເຂັ້ມງວດຮອບດ້ານ ຢ່າງສະເໝີຕົ້ນສະເໝີປາຍ? ຄຳຕອບຢູ່ໃນຕັກກະແຫ່ງການບໍລິຫານປະເທດ. ຂໍກຸນແຈສຳຄັນ ໃນການບໍລິຫານປະເທດ ໃຫຍ່ແມ່ນຂຶ້ນກັບພັກກຳອຳນາດ. ພັກໃຫຍ່ທີ່ມີສະມາຊິກຫລາຍກວ່າ 100 ລ້ານຄົນ ແລະ ນຳພາປະຊາຊົນ 1 ຕື້ 400 ລ້ານຄົນ ເພື່ອການພັດທະນານັ້ນ, ຄວາມບໍລິສຸດ ແລະ ຄວາມກ້າວໜ້າຂອງຖັນແຖວໄດ້ຕັດສິນຊີ້ຂາດໂດຍກົງ ຕໍ່ຄຸນນະພາບຂອງການພັດທະນາປະເທດຊາດ, ຜົນສຳເລັດຂອງການຄຸ້ມຄອງສັງຄົມ ແລະ ຄວາມຜາສຸກຂອງປະຊາຊົນ. ການກຳອຳນາດເປັນໄລຍະຍາວ ເປັນການທົດສອບຍິ່ງເປັນສິ່ງທ້າທາຍ, ພັກກຳອຳນາດໄລຍະຍາວສ່ວນຫລາຍໃນໂລກ ລ້ວນແຕ່ໄດ້ຜະເຊີນກັບບັນຫາຮ່ວມກັນຄື: ຄວາມຂີ້ຄ້ານມັກງ່າຍແບບອາຍາສິດ, ອຳນາດຖືກຜັນແປເປັນເຄື່ອງມື ໃນການສະແຫວງຫາຜົນປະໂຫຍດສ່ວນຕົວ ແລະ ການຫ່າງເຫີນຈາກປະຊາຊົນ, ງ່າຍທີ່ຈະຕົກເຂົ້າສູ່ “ວັດທະຈັກປະຫວັດສາດ” ທີ່ຈາກຄວາມຈະເລີນຮຸ່ງເຮືອງສູ່ຄວາມຊຸດໂຊມ. ການຄຸ້ມຄອງພັກຢ່າງເຂັ້ມງວດຮອບດ້ານ ກໍແມ່ນຄຳຕອບແກນກາງຂອງພັກກອມມູນິດຈີນ ໃນການແກ້ໄຂບັນຫາຫຍຸ້ງຍາກ ແຫ່ງຍຸກສະໄໝ. ນັບແຕ່ທ່ານ ສີຈິ້ນຜິງ ເລຂາທິການໃຫຍ່ ຄະນະກຳມະການສູນກາງພັກກອມມູນິດຈີນ ສະເໜີແນວຄິດດັ່ງກ່າວຢ່າງເປັນທາງການ ໃນປີ 2014, ຮອດປີ 2022 ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 20 ຂອງພັກກອມມູນິດຈີນ ໄດ້ບູລະນະລະບົບຄຸ້ມຄອງພັກ ຢ່າງເຂັ້ມງວດຮອບດ້ານໃຫ້ສົມບູນຂຶ້ນ, ຕະຫລອດຮອດກອງປະຊຸມຄົບຄະນະ ຄັ້ງທີ 5 ຂອງຄະນະກຳມະການສູນກາງພັກກອມມູນິດ ຈີນສະໄໝທີ 20 ທີ່ຈະຈັດຂຶ້ນໃນໄວໆນີ້ ເພື່ອວາງແຜນຊຸກຍູ້ການຄຸ້ມຄອງພັກ ຢ່າງເຂັ້ມງວດຮອບດ້ານຢ່າງຕໍ່ເນື່ອງ, ທັງນີ້ໄດ້ພິສູດໃຫ້ເຫັນຢ່າງຈະແຈ້ງວ່າ: ການຄຸ້ມຄອງ ແລະ ການບໍລິຫານພັກຢ່າງເຂັ້ມງວດ ເວລາໃດກໍບໍ່ແມ່ນມາດຕະຖານ ຫລື ວິທີການຊົ່ວຄາວເທົ່ານັ້ນ, ຫາກແມ່ນຍຸດທະສາດໄລຍະຍາວໃນການປົກປ້ອງຄວາມທັນສະໄໝແບບຈີນ.
ການປະຕິວັດໂດຍຕົນເອງຄືຄວາມກ້າຫານທີ່ຫາຍາກທີ່ສຸດ ທັງເປັນພະລັງຊີວິດທີ່ຍືນຍົງທີ່ສຸດ. ມັນແຕກຕ່າງກັນກັບການແກ້ໄຂບັນຫາ ຫລັງມີບັນຫາເກີດຂຶ້ນ, ພັກກອມມູນິດຈີນ ເປັນເຈົ້າການສ້າງຄວາມເຂັ້ມແຂງດ້ວຍ “ການອອກກຳລັງກາຍ ເພື່ອຍົກສູງຄຸນນະພາບຮ່າງກາຍ” ຢ່າງເປັນປົກກະຕິ, ເປັນເຈົ້າການກວດຄົ້ນຫາບັນຫາດ້ວຍຕົນເອງ, ດັດແກ້ການປະພຶດທີ່ຜິດເຂວ, ສ້າງຄວາມບໍລິສຸດຂອງຖັນແຖວພະນັກງານສະມາຊິກພັກ ແລະ ຮັກສາຄວາມມີຊີວິດຊີວາ ແລະ ຄວາມເຂັ້ມແຂງຂອງພັກຢ່າງສະເໝີຕົ້ນສະເໝີປາຍ.
ເມື່ອເບິ່ງໃນທົ່ວໂລກແລ້ວ, ການທີ່ເຮັດແນວໃດເພື່ອຍຶດໝັ້ນຮັກສາອຸດົມການແຕ່ຫົວທີ, ຫລີກລ່ຽງຄວາມສ່ຽງ ທີ່ຈະເກີດການສໍ້ລາດບັງຫລວງ ແລະ ຄວາມປະໝາດ ໃນການກຳອຳນາດຢ່າງຍາວນານນັ້ນ ເປັນຫົວຂໍ້ຮ່ວມຂອງພັກກຳອຳນາດບັນດາປະເທດ. ດ້ວຍການຄວບຄຸມຕົນເອງ ແລະ ການປະຕິວັດໂດຍຕົນເອງຢ່າງຕໍ່ເນື່ອງ, ພັກກອມມູນິດຈີນ ໄດ້ບຸກເບີກເສັ້ນທາງໃໝ່ ແຫ່ງການບໍລິຫານພັກ ໃຫຍ່ຂອງປະເທດໃຫຍ່.
ເວົ້າເຖິງທີ່ສຸດແລ້ວ, ເນື້ອໃນແກນກາງຂອງການຄຸ້ມຄອງພັກຢ່າງເຂັ້ມງວດຮອບດ້ານກໍຄື ເຂັ້ມງວດຕໍ່ຕົນເອງທີ່ຕ້ອງດຳເນີນຕະຫລອດໄປ ແລະ ປົກປ້ອງອຸດົມການແຕ່ຫົວທີ ໃນການກຳອຳນາດ. ພັກອາຍຸຮ້ອຍກວ່າປີ ບໍ່ໄດ້ອາໄສຂໍ້ໄດ້ປຽບທີ່ມີຢູ່ແລ້ວ ເພື່ອຮັກສາພາລະກິດຂອງຕົນ, ແຕ່ແມ່ນອີງໃສ່ການປະຕິວັດໂດຍຕົນເອງ ຢ່າງຕໍ່ເນື່ອງເພື່ອສ້າງພາລະກິດອັນໃໝ່. ຮູບແບບການບໍລິຫານໂດຍຕົນເອງ ທີ່ກຳເນີດຈາກວັດທະນະທຳດັ້ງເດີມ, ຕິດແທດກັບການພັດທະນາຂອງຍຸກສະໄໝ ແລະ ອີງໃສ່ສະພາບຕົວຈິງດ້ານການບໍລິຫານໂດຍຕົນເອງ ແບບນີ້ບໍ່ພຽງແຕ່ໄດ້ຮັດແໜ້ນພື້ນຖານ ການບໍລິຫານປະເທດຂອງຈີນເທົ່ານັ້ນ ຍັງໄດ້ສະໜອງແຜນການແກ້ໄຂຂອງຈີນ ທີ່ຕິດແທດຕົວຈິງ ແລະ ສາມາດປະຕິບັດໄດ້ໃຫ້ແກ່ການຄຸ້ມຄອງພັກການເມືອງໃນທົ່ວໂລກນຳອີກ.
KPL
