ຂປລ. ຕາມການລາຍງານ ຂອງບໍລິສັດທາງລົດໄຟລາວ-ຈີນ ໃຫ້ຮູ້ວ່າ: ໃນວັນທີ 15 ມີນານີ້, ທາງລົດໄຟ ລາວ-ຈີນ ຈະເປີດນຳໃຊ້ລະບົບຂາຍປີ້ອອນລາຍ(LCR Ticket) ຢ່າງເປັນທາງການ, ເຊິ່ງຈະເປັນ​ການ​ຍົກລະ​ດັບບາດກ້າວ​ໃນການ​ໃຫ້​ຂໍ້​ມູນ​ຂ່າວ​ສານ​ຂອງ​ການ​ຂົນ​ສົ່ງ​​ໂດຍ​ສານ​ທາງ​ລົດ​ໄຟ​ລາວ-ຈີນ, ເຮັດໃຫ້ການເດີນທາງຂອງຜູ້ ໂດຍສານໃຫ້ສະດວກສະບາຍ ແລະ ມີປະສິດທິພາບຍິ່ງຂຶ້ນ ອັນເປັນ​ຂີດ​ໝາຍວ່າ ທາງລົດໄຟລາວ-ຈີນ ໄດ້ກ້າວເຂົ້າສູ່ຍຸກແຫ່ງການຂາຍປີ້ອອນລາຍຢ່າງເປັນທາງການ.
    ຜູ້ຮັບຜິດຊອບຂອງບໍລິສັດທາງລົດໄຟລາວ-ຈີນ ໄດ້ໃຫ້ຮູ້ວ່າ: ນັບແຕ່ເປີດດຳເນີນການທາງລົດໄຟລາວຈີນ ໃນວັນທີ 3 ທັນວາ 2021 ເປັນຕົ້ນມາ, ບໍລິສັດທາງລົດໄຟລາວ-ຈີນ ບໍ່ຢຸດທີ່ຈະພັດທະນາການບໍລິການ, ດຳເນີນ ການແລ່ນລົດໄຟ EMU “ຂະບວນລ້ານຊ້າງ” ແລະ ລົດໄຟທຳມະດາ ດ້ວຍຄວາມປອດໄພ ແລະ ມີຄຸນນະພາບ, ໃນມໍ່ໆມານີ້ຈຳ​ນວນ​ຂົນສົ່ງຜູ້​ໂດຍ​ສານ​ສູງ​ສຸດ​ຕໍ່​ມື້​​ກໍໄດ້​ທະລຸເຖິງ 10.000 ເທື່ອຄົນ ສະແດງໃຫ້ເຫັນເຖິງປະລິມານ ການຂົນສົ່ງຜູ້ໂດຍສານທີ່ເພີ່ມຂຶ້ນຢ່າງບໍ່ຢຸດຢັ້ງ. ປັດຈຸ​ບັນ, ​ຊ່ອງທາງການຊື້ປີ້​ຂອງຜູ້​ໂດຍສານ​ແມ່ນສາມາດ​ຊື້ຢູ່​ປ່ອງ ບໍລິການຂາຍປີ້ທີ່ສະຖານີ ແລະ ​ຈຸດຂາຍປີ້ລົດໄຟໃນເມືອງ. ສະນັ້ນ,  ເພື່ອຍົກລະດັບປະສົບການການຊື້ປີ້ຂອງຜູ້ ໂດຍສານຕື່ມອີກ ບໍລິສັດ​ທາງ​ລົດ​ໄຟ​ລາວ-ຈີນ​ ໄດ້​ມອບໃຫ້ບໍລິສັດ CARS ທີ່ຂຶ້ນກັບກຸ່ມລັດວິສາຫະກິດລົດໄຟ ແຫ່ງຊາດຈີນ (China Railway) ​​ພັດທະນາ​ລະບົບ APP ​ຊື້​ປີ້ອອນລາຍໃຫ້ແກ່ທາງລົດໄຟລາວ-ຈີນ. ຜ່ານການ ພັດທະນາລະບົບ, ທົດສອບການປະຕິບັດການ, ປະເມີນຄວາມປອດໄພ, ຝຶກອົບຮົມພະນັກງານ, ປັດຈຸບັນ, ລະບົບໄດ້ບັນລຸເງື່ອນໄຂພ້ອມທີ່ຈະໃຊ້ງານໄດ້ແລ້ວ.
   ລາຍງານຍັງໄດ້ໃຫ້ຮູ້ວ່າ: ລະບົບ​ APP ຊື້ປີ້ອອນລາຍທາງລົດໄຟ​ ​ແມ່ນ​ອີງ​ໃສ່​ເຕັກ​ໂນ​ໂລ​ຊີ​ທີ່​ກ້າວໜ້າ ​ແລະ ຂັ້ນສູງຂອງ​ລະບົບ​ລົດ​ໄຟ​ຈີນ, ໃນການອອກແບບປະສົມປະສານກັບລັກສະນະວັດທະນະທຳ, ກົດໝາຍ ແລະ ລະ ບຽບການຂອງລາວ, ຄຳນຶງເຖິງຕົວເລືອກທີ່ຫລາກຫລາຍ ເພື່ອຕອບສະໜອງຕໍ່ຄວາມຕ້ອງການຂອງຜູ້ໃຊ້, ຮອງຮັບ ໄດ້ສາມພາສາຄື: ລາວ, ຈີນ ແລະ ອັງກິດ, ເປັນ APP  ທີ່ສາມາດໃຫ້ຜູ້ໃຊ້ລົງທະບຽນຊື່ແທ້, ກວດເບິ່ງປີ້ທີ່ຍັງ ເຫລືອ, ຄົ້ນຫາຖ້ຽວລົດ, ຈ່າຍເງິນອອນລາຍ, ເຮັດທຸລະກຳປ່ຽນແປງຂໍ້ມູນໜ້າປີ້, ຂໍ້ມູນຂ່າວສານ ແລະ ອື່ນໆ. ສຳລັບຜູ້ໂດຍສານທຸກທ່ານທີ່ເປັນຄົນລາວ ນໍາໃຊ້ບັດປະຈໍາໂຕ ຫລື ຖ້າເປັນຜູ້ໂດຍສານຕ່າງປະເທດໃຫ້ນຳໃຊ້ໜັງສື ຜ່ານແດນທີ່ຍັງມີຜົນບັງຄັບໃຊ້ ເພື່ອລົງທະບຽນໃຫ້ນຳໃຊ້ຊື່ແທ້, ຫລັງຈາກລົງທະບຽນຂໍ້ມູນແທ້ໃນລະບົບແລ້ວ, ທ່ານສາມາດກວດເບິ່ງຂໍ້ມູນປີ້ທີ່ຍັງເຫລືອ ຂອງທາງລົດໄຟລາວ-ຈີນ ໄດ້ຕະຫລອດເວລາ ແລະ ຊື້ປີ້ຜ່ານທາງລະບົບ ໄດ້ ໂດຍຮອງຮັບການຊຳລະຜ່ານ VISA, UnionPay, WeChat, Alipay ແລະ ວິທີການຊໍາລະອື່ນໆ ທັງພາຍໃນ ແລະ ຕ່າງປະເທດ. ເມື່ອເວລາຈະຂຶ້ນລົດໄຟ, ຜູ້ໂດຍສານຕ້ອງຖືບັດປະຈໍາຕົວ ຫລື ໜັງສືຜ່ານແດນ ທີ່ໃຊ້ໃນເວລາຊື້ປີ້ ເພື່ອແຈ້ງເຂົ້າສະຖານີໂດຍການສະແກນລະຫັດ QR ທີ່ສ້າງຂຶ້ນໂດຍລະບົບຂາຍປີ້ ຫລື ໄປທີ່ ປ່ອງບໍລິການຂາຍປີ້ຂອງສະຖານີ ເພື່ອແລກປ່ຽນເອົາປີ້ທີ່ເປັນແບບເຈ້ຍແລ້ວກວດປີ້ເຂົ້າສະຖານີ.
  ພາຍຫລັງທີ່ APP ຂາຍປີ້ອອນລາຍຂອງ ທາງລົດໄຟລາວ-ຈີນ ໄດ້ຖືກນຳໃຊ້ແລ້ວ, ຜູ້ໂດຍສານສາມາດຊື້ປີ້ ຜ່ານທາງອອນລາຍ ໄດ້ໂດຍບໍ່ຕ້ອງອອກຈາກບ້ານ ກໍສາມາດດຳເນີນທຸລະກຳການຊື້ປີ້, ປ່ຽນແປງຂໍ້ມູນໜ້າປີ້ ແລະ ຈັດ​ວາງ​ແຜນ​ການເດີນທາງໄດ້ຢ່າງສະດວກສະບາຍ. 
    APP ຂາຍປີ້ລົດໄຟອອນລາຍນີ້, ແມ່ນການຍົກລະດັບ​ຄຸນ​ນະ​ພາບ​ການ​ບໍ​ລິ​ການ​ຂົນ​ສົ່ງ​ຜູ້​ໂດຍ​ສານ​ທາງ​ລົດ​ໄຟ​ລາວ-ຈີນ, ປັບ​ປຸງ​ປະ​ສົບ​ການ​ການ​ເດີນ​ທາງ​ຂອງ​ຜູ້​ໂດຍ​ສານ, ຊຸກ​ຍູ້​ການ​ພັດ​ທະ​ນາ​ເສດ​ຖະ​ກິດ​ການ​ທ່ອງ​ທ່ຽວ​ຕາມ​ເສັ້ນ​ທາງລົດໄຟ. ໃນຕໍ່ໜ້າ, ບໍລິສັດລົດໄຟລາວ-ຈີນ ຍັງຈະສືບຕໍ່ເປີດກວ້າງຮັບຟັງຄຳແນະນຳຂອງປະຊາຊົນ ເພື່ອນຳມາປັບປຸງ ແລະ ພັດທະນາ APP ຕາມການສະເໜີຂອງຜູ້ໂດຍສານສ່ວນໃຫຍ່, ອັດເດດລະບົບຕ່າງໆ ໃຫ້ມີຄຸນນະພາບສູງ ແລະ ອຳນວຍຄວາມສະດວກໃນການນຳໃຊ້ຫລາຍຂຶ້ນ.
     LCR Ticket APP ຈະເປີດນຳໃຊ້ຢ່າງເປັນທາງການໃນວັນທີ 15 ມີນານີ້, ນັກທ່ອງທ່ຽວທັງພາຍໃນ ແລະ ຕ່າງປະເທດສາມາດດາວໂຫລດ APP ໄດ້ແລ້ວໃນລະບົບປະຕິບັດການ Apple Store ຫລື Android. ກ່ຽວກັບ​ລາຍ​ລະອຽດ​ການນຳໃຊ້ LCR Ticket APP, ຜູ້​ໂດຍສານ​ສາມາດ​ສອບຖາມ​ກັບພະນັກງານທາງລົດໄຟ ແຕ່ລະສະຖານີ ຫລື ເບີ່ງຂັ້ນຕອນການໂຫລດ, ຕິດຕັ້ງ ແລະ ຂັ້ນຕອນການນຳຊັ້ນຕ່າງໆ ໄດ້ທີ່ Facebook page: Laos-China Railway Company Limited ຂອງບໍລິສັດທາງລົດໄຟລາວ-ຈີນ ຈໍາກັດ.

KPL