ນະຄອນຫລວງວຽງຈັນຄືເມືອງເອກຂອງ ສປປ ລາວ ປັດຈຸບັນມີປະຊາກອນຫລາຍກວ່າ 1 ລ້ານຄົນ ເຊິ່ງມັນວາງຄາດຫມາຍໄວ້ວ່າປີ 2023 ຈະດຶງດູດນັກທ່ອງທ່ຽວ ໃຫ້ໄດ້ຢ່າງຫນ້ອຍ 5 ແສນກວ່າຄົນ.

ການວາງເປົ້າໝາຍຂອງນະຄອນຫລວງວຽງຈັນຄັ້ງນີ້ ເພາະເຊື່ອວ່າເມືອງເອກຂອງລາວ ມີແຫ່ລງທ່ອງທ່ຽວທີ່ເປັນເອກະລັກ ຕ່າງຈາກແຂວງອື່ນໆ ໂດຍສະເພາະແຫລ່ງທ່ອງທ່ຽວດ້ານວັດທະນະທໍາ, ປະຫວັດສາດ, ຕະຫລາດກາງຄືນ, ສູນການຄ້າສາກົນ ແລະ ອື່ນໆ ທີ່ສາ ມາດສ້າງແຮງດຶງດູດ ເປັນພິເສດເຊັ່ນ: ພະທາດຫລວງ, ປະຕູໄຊ, ວັດຊຽງຄວນ, ຫໍພະແກ້ວ,ວັດສີສະເກດ,ວັດສີເມືອງ, ອາຄານເກົ່າແກ່ຊົງຝຣັ່ງ.

ທ່ານ ນາງ ວິໄລວອນ ຈັນທະລາຕີ, ຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ນະຄອນຫລວງວຽງຈັນ ລາຍງານໃນວັນທີ 6 ມີນານີ້ວ່າ: ສະພາບການທ່ອງທ່ຽວ ຢູ່ນະຄອນຫລວງວຽງຈັນ ນັບມື້ດີຂຶ້ນຢ່າງຕໍ່ເນື່ອງ ພາຍຫລັງເປີດປະເທດ ແຕ່ ຕົ້ນປີ 2022 ເມື່ອການລະບາດຂອງພະຍາດໂຄວິດ-19 ຫລຸດຜ່ອນລົງ ກໍ່ຄື ຫລາຍປະເທດຍົກເລີກ ມາດຕະການປ້ອງກັນພະຍາດດັ່ງກ່າວ ເຮັດໃຫ້ນັກທ່ອງທ່ຽວສາກົນ ສາມາດເດີນທາງມາທ່ອງທ່ຽວ ໄດ້ຢ່າງສະດວກ, ໃນນີ້ ສໍາລັບນັກທ່ອງທ່ຽວ 6 ແສນກວ່າຄົນ ທີ່ເຂົ້າມາ ທ່ອງທ່ຽວພາຍໃນ ນະຄອນຫລວງວຽງຈັນໃນປີຜ່ານມາ, ຫລາຍກວ່າໝູ່ແມ່ນນັກທ່ອງທ່ຽວ ຈາກປະເທດໄທ, ຮອງລົງມາແມ່ນນັກທ່ອງທ່ຽວຈາກ ສ.ເກົາຫລີ ເຮັດໃຫ້ບັນຫົວໜ່ວຍບໍລິການ ດ້ານການທ່ອງທ່ຽວກັບມາຄຶກຄື້ນ ແລະ ນັບມື້ຟື້ນຕົວດີຂຶ້ນ.

ທ່ານ ນາງ ວິໄລວອນ ຈັນທະລາຕີກ່າວຕື່ມອີກວ່າ:  ສໍາລັບປີ 2023 ນີ້, ນະຄອນຫລວງວຽງຈັນ ວາງຄາດຫມາຍດຶງດູດນັກທ່ອງທ່ຽວສາກົນ ໃຫ້ໄດ້ 5 ແສນຄົນ. ເພື່ອໃຫ້ບັນລຸຕາມ ຄາດຫມາຍທີ່ວາງໄວ້ ພະແນກ ຖວທ ນະຄອນຫລວງວຽງຈັນ ຈະຮ່ວມກັບທຸກພາກ ສ່ວນ ທີ່ກ່ຽວຂ້ອງ ຈັດຫລາຍກິດຈະກຳ ເພື່ອສົ່ງເສີມການທ່ອງທ່ຽວ ໂດຍສະເພາະປີໃຫມ່ລາວທີ່ຈະມາເຖີງນີ້ ຈະຈັດເຂດທ່ອງທ່ຽວປີໃຫມ່ລາວສະເພາະ ເພື່ອໃຫ້ມີຄວາມເບີກບານມ່ວນຊື່ນ ກວ່າທຸກປີຜ່ານມາ. ນອກຈາກນີ້ ຈະຈັດອີກຫລາຍກິດຈະກໍາ ທີ່ຫນ້າສົນໃຈ, ລວມເຖິງຈະເປີດແຫລ່ງທ່ອງທ່ຽວ ແຫ່ງໃຫມ່ຢູ່ເມືອງໄຊທານີ ພາຍໃນທ້າຍປີນີ້ ຄື: ສະ ຖານທີ່ທ່ອງທ່ຽວທໍາມະຊາດ ແຫລ່ງພັນໄມ້ຢູ່ເຂດເວີນແທ່ນ ແລະ ສະຖານທີ່ທ່ອງທ່ຽວ ວັດທະນະທໍາ ພິພິດຕະພັນໄມ້ຢູ່ເຂດບ້ານຫນອງເຊືອມ.

ເຖິງແມ່ນວ່ານະຄອນຫລວງວຽງຈັນບໍ່ມີແຫລ່ງທໍາມະຊາດຫລາຍກໍຕາມ ແຕ່ມັນເປັນສູງລວມຈິດ ໃດ້ານວັດທະນະທໍາ, ເສດຖະກິດ,ການສຶກສາ, ແຫລ່ງອາຫານແຊບຊ້ອຍ ແລະ ຍັງເປັນທາງຜ່ານຂອງແຂກຕ່າງດ້າວທ້າວຕ່າງເມືອງ ສິ່ງສໍາຄັນເປັນສູນກາງ ເສັ້ນທາງລົດໄຟ ລາວ-ຈີນ, ມີຂົວມິດຕະພາບລາວ-ໄທແຫ່ງທີ 1, ມີສະຫນາມບິນສາກົນວັດໄຕ ເຊິ່ງນັ້ນຄືຈຸດໄດ້ປຽບ.

ໂດຍ: ເກີດຂວັນໃຈ ມາລີຈັນສີ

KPL