ຂປລ. ຄະນະທີ່ປຶກສາຄົນເຊື້ອຊາດລາວຢູ່ຕ່າງປະເທດ ສູນກາງແນວລາວສ້າງຊາດ (ສນຊ) ຈັດກອງປະຊຸມສະຫລຸບຖອດຖອນບົດຮຽນ ກ່ຽວກັບວຽກງານຂອງ ຄະນະທີ່ປຶກສາຄົນເຊື້ອຊາດລາວຢູ່ຕ່າງປະເທດ ປະຈໍາປີ 2024 ແລະ ວາງທິດທາງແຜນວຽກຈຸດສຸມປີ 2025 ໃນວັນທີ 3 ກຸມພາ 2025 ໂດຍການເປັນ ປະທານຂອງທ່ານ ຈັນເພັງ ສຸດທິວົງ ຮອງປະທານ ສນຊ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ໄດ້ຮັບຟັງບົດສະຫລຸບຕີລາຄາຜົນງານການເຄື່ອນໄຫວ ວຽກງານພົວພັນຄົນເຊື້ອຊາດລາວ ຢູ່ຕ່າງປະເທດ ເຊິ່ງ 1 ປີ ຜ່ານມາ ຄະນະທີ່ປຶກສາວຽກງານພົວພັນ ຄົນເຊື້ອຊາດລາວຢູ່ຕ່າງປະເທດ ໄດ້ປະກອບສ່ວນ ຢ່າງຕັ້ງໜ້າເຂົ້າໃນການສ້າງສາ ພັດທະນາປະເທດຊາດ ໂດຍສະເພາະ ທາງດ້ານທຶນຮອນເຂົ້າໃນ ການສ້າງໂຮງຮຽນ ແລະ ມອບເຄື່ອງໃຊ້ໃຫ້ແກ່ ເຂດຫ່າງໄກສອກຫລີກ ເປັນຕົ້ນ ໄດ້ມອບໂຮງຮຽນປະຖົມ ໃຫ້ບ້ານນໍ້າຈ້າວເໜືອ ເມືອງໝອກ ແຂວງຊຽງຂວາງ, ໂຮງຮຽນມັດທະຍົມ ເມືອງຈອມທອງ ແລະ ເມືອງທ່າແຂກ ແຂວງຄໍາມ່ວນ, ໄດ້ປະກອບທຶນ 55 ລ້ານກີບ ເພື່ອສ້າງໂຮງຮຽນນາສະຫວ່າງ ເມືອງນາໝໍ້ ແຂວງອຸດົມໄຊ, ມອບເງິນ 65 ລ້ານກີບ ໃຫ້ເມືອງຊຽງຮອນ ເພື່ອສ້າງຂັ້ນໄດຂຶ້ນສູ່ພະເຈົ້າໃຫຍ່ ພຸດທະປາລະມີສະຣີ ທີ່ແຂວງໄຊຍະບູລີ, ມອບຜ້າຫົ່ມໃຫ້ໂຮງຮຽນມັດທະຍົມສົມບູນປາກເປັດ ມົກສະຕຸ ແລະ ໂຮງຮຽນມັດທະຍົມສົມບູນຊຽງຮອນ ແຂວງໄຊຍະບູລີ ຈໍານວນ 17 ລ້ານກີບ. ໃນນີ້, ຜົນງານ ທີ່ເປັນຂີດໝາຍປະຫວັດສາດ ແມ່ນຄະນະກໍາມະການສູນກາງແນວລາວສ້າງຊາດ ຢູ່ຕ່າງປະເທດ ໄດ້ເປັນຄັນທຸງປຸກລະດົມຂົນຂວາຍ ແລະ  ເຕົ້າໂຮມຄວາມສາມັກຄີພີ່ນ້ອງເຊື້ອຊາດລາວ ທີ່ດໍາລົງຊີວິດຢູ່ຕ່າງປະເທດ ໄດ້ມາຢ້ຽມຢາມ ສປປ ລາວ ແລະ ເຂົ້າຮ່ວມກອງປະຊຸມພົບປະພີ່ນ້ອງເຊື້ອຊາດລາວ ຢູ່ຕ່າງປະເທດ ຄັ້ງປະຖົມມະລືກ ທີ່ນະຄອນຫລວງວຽງຈັນ. ພ້ອມນີ້, ຍັງໄດ້ຮັບຟັງການຜ່ານຂໍ້ຕົກລົົງຂອງຄະນະປະຈຳ ສນຊ ວ່າດ້ວຍ ການແຕ່ງຕັ້ງ ຮອງຫົວໜ້າຄະນະທີ່ປຶກສາວຽກງານ ຄົນເຊື້ອຊາດລາວຢູ່ຕ່າງປະເທດ ຂອງ ສນຊ.

ນອກຈາກນີ້, ກອງປະຊຸມ ຍັງໄດ້ປຶກສາຫາລື ແຜນວຽກຈຸດສຸມໃນປີ 2025 ໂດຍສະເພາະແມ່ນ ສືບຕໍ່ຜັນຂະຫຍາຍນິຕິກໍາ ແລະ ຄໍາແນະນໍາ ທີ່ກ່ຽວຂ້ອງກັບພີ່ນ້ອງຊາດລາວຢູ່ຕ່າງປະເທດ ມາດໍາເນີນທຸລະກິດຢູ່ ສປປ ລາວ ແລະ ມາດໍາລົງຊີວິດຢູ່ ສປປ ລາວແບບຖາວອນ ຕາມມາດຖານ ແລະ ເງື່ອນໄຂຕົວຈິງຂອງບຸກຄົນ ເຊິ່ງພັກ-ລັດ ຖະບານ ໄດ້ສ້າງນິຕິກໍາດັ່ງກ່າວສໍາເລັດແລ້ວ ເພື່ອສືບຕໍ່ຜັນຂະຫຍາຍ ໃຫ້ພາກສ່ວນທີ່ກ່ຽວຂ້ອງຮັບຮູ້ ແລະ ເຂົ້າໃຈພ້ອມກັນຈັດຕັ້ງປະຕິບັດຢ່າງມີປະສິດທິຜົນ ເພື່ອອໍານວຍຄວາມສະດວກ ໃຫ້ແກ່ພີ່ນ້ອງເຊື້ອຊາດລາວ ຢູ່ຕ່າງປະເທດ.

ຂ່າວ-ພາບ: ສນຊ

KPL