*ຂຸນກອງແລງ ຕັ້ງຢູ່ບ້ານນາຄື ເມືອງຫີນບູນ ແຂວງຄໍາມ່ວນ ຫ່າງຈາກເມືອງທ່າແຂກປະມານ 55 ກິໂລແມັດ, ເປັນສະຖານທີ່ທ່ອງທ່ຽວແບບອະນຸລັກທໍາມະຊາດຍືນຍົງ ແລະ ສີຂຽວ ໂດຍແມ່ນບໍລິສັດ ອິນທຣາ ໂຄໂປເຣຊັ່ນ ຈຳກັດຜູ້ດຽວ ເປັນຜູ້ສຳປະທານ ແລະ ພັດທະນາດ້ວຍການສົ່ງເສີມການມີສ່ວນຮ່ວມຂອງປະຊາຊົນ, ຄາດວ່າຈະເປີດໃຫ້ບໍລິການ ໃນເດືອນເມສາ 2025 ນ້ີ. ທ່ານ ພັນທະຈິດ ອິນທິລາດ ປະທານບໍລິສັດອິນທຣາ ໂຄໂປເຣຊັ່ນ ຈຳກັດຜູ້ດຽວ ໄດ້ໃຫ້ສຳພາດຕໍ່ສື່ມວນຊົນລາວ-ໄທ ເມື່ອບໍ່ດົນນີ້ວ່າ: ປັດຈຸບັນ, ແຫລ່ງທ່ອງທ່ຽວຂຸນກອງແລງກໍາລັງມີການປັບປຸງ-ກໍ່ສ້າງຫລາຍກິດຈະກຳ ການທ່ອງທ່ຽວ ໂດຍສະເພາະໂຮງແຮມ, ຣີສອດ, ຮ້ານອາຫານ, ສູນບໍລິການການທ່ອງທ່ຽວ, ມີກິດຈະກຳທີ່ຕິດພັນກັບທຳມະຊາດ (Green Adventures), ສູນສົ່ງເສີມ ແລະ  ພັດທະນາການຜະລິດສິນຄ້າ, ສູນຈຳໜ່າຍສິນຄ້າ, ຂອງທີ່ລະນຶກຈາກສີໄມ້ລາຍມືຂອງພໍ່ແມ່ປະຊາຊົນ (ODOP) ແລະ ອື່ນໆ. ໃນນັ້ນ, ກິດຈະກຳຫລັກໆທີ່ກະກຽມຈະເປີດໃຫ້ບໍລິການໃນເດືອນເມສາ 2025 ນີ້ປະກອບມີ: ພາຍເຮືອກາຍັກ (Kayaking), ຂີ່ສະລິງ (Zipline), ໄຕ່ຂົວອູ່, ດໍານໍ້າ (Scuba diving), ທ່ຽວຖໍ້າ (Caving), ຂີ່ລົດ ATV/KTV, ປີນຜາ (Rock climbing), ຍ່າງປ່າ (Jungle trekking), ສວນນໍ້າທໍາມະຊາດ (Natural water park), ຕັ້ງແຄ້ມ (Camping) ແລະ ກິດຈະກໍາອື່ນໆ.

      ທ່ານ ພັນທະຈິດ ອິນທິລາດ ຍັງໃຫ້ຮູ້ອີກວ່າ: ຍ້ອນຄວາມມັກຮັກໃນທຳມະຊາດ, ມັກການທ່ອງທ່ຽວແບບພະຈົນໄພ ແລະ ເຫັນໄດ້ສັກກະຍະພາບຂອງແຂວງຄຳມ່ວນ ກໍຄືເມືອງຫີນບູນ ໂດຍສະເພາະແມ່ນຂຸນກອງແລງທີ່ມີຊື່ສຽງມາຫລາຍສິບປີ, ແຕ່ຍັງບໍ່ທັນໄດ້ຮັບການພັດທະນາ. ສະນັ້ນ, ບໍລິສັດພວກເຮົາຈຶ່ງໄດ້ປຶກສາຫາລືກັບການນຳຂອງແຂວງ, ເມືອງ ແລະ ໄດ້ຂໍອະນຸຍາດສຶກສາສຳຫລວດຄວາມເປັນໄປໄດ້ເພື່ອພັດທະນາ, ພ້ອມທັງສຶກສາທາງດ້ານຜົນກະທົບຕໍ່ສິ່ງແວດລ້ອມໃນປີ 2018 ໂດຍໃຊ້ເວລາສຶກສາສໍາຫລວດເກືອບ 1 ປີ ແລະ ໄດ້ຮັບ ການອະນຸມັດເຊັນສັນຍາສໍາປະທານ ໃນປີ 2019. ຈາກນັ້ນ, ໄດ້ເລີ່ມລົງ ມືບຸກເບີກ, ກໍ່ສ້າງພື້ນຖານໂຄງລ່າງ ເປັນຕົ້ນການກໍ່ສ້າງຕາຝັ່ງເຈື່ອນ, ປູກປ່າຄືນໃໝ່, ດັດປັບທັດສະນີຍະ ພາບ, ສ້າງສິ່ງອຳນວຍຄວາມສະ ດວກ, ທີ່ພັກພາອາໄສຊຶ່ງໃຊ້ເວລາພັດທະນາມາໄດ້ປີກວ່າ ກໍປະສົບບັນຫາການແພ່ລະບາດຂອງພະຍາດ ໂຄວິດ-19 ບໍ່ສາມາດດໍາເນີນຕໍ່ໄປໄດ້. ພາຍຫລັງຜ່ານວິກິດການດັ່ງກ່າວ, ຈຶ່ງໄດ້ມາພັດທະນາໂຄງການຕໍ່ ແລະ ໄດ້ປັບປຸງກິດຈະການຕ່າງໆໃຫ້ສົມບູນທັງກິດຈະກຳທີ່ຕິດພັນກັບທຳມະຊາດ ແລະ ແບບ ພະຈົນໄພ ເປັນຕົ້ນ ສູນບໍລິການ ນັກ ທ່ອງທ່ຽວ (Clup House), ບ່ອນ ຈອດລົດ, ຣີສອດ (ເຮືອນແຄັບຊູນ ແບບທັນສະໄໝ, ເຮືອນໄມ້ໄຜ່, ເຮືອນຊົງລາວ), ສວນອາຫານ,  ຮ້ານຂາຍເຄື່ອງຂອງທີ່ລະນຶກ, ຖະ ໜົນຄົນຍ່າງ, ເຮືອນພັກຕາກອາກາດ, ສູນຮັກສາສຸຂະພາບ, ສວນນໍ້າ, ຈຸດຊົມທິວທັດ, ພາຍເຮືອກາຍັກ, ຂີ່ລົດ ATV, ປີນຜາ ແລະ ອື່ນໆ.

    ໂອກາດນີ້, ທ່ານ ພັນທະຈິດ ອິນທິລາດ ຍັງໄດ້ເຊີນຊວນບັນດານັກທ່ອງທ່ຽວທັງພາຍໃນ ແລະ ຕ່າງປະເທດ (ພາຍຫລັງທີ່ໄດ້ເປີດໃຫ້ບໍລິການແລ້ວ) ໃຫ້ເຂົ້າມາທ່ຽວສຳຜັດກັບຄວາມສວຍງາມຂອງທຳມະຊາດ ແລະ ຮັບຮູ້ເຖິງການພັດທະນາ, ການໃຫ້ບໍລິການ ໂດຍປະຊາຊົນມີສ່ວນຮ່ວມທີ່ເປັນການລົງທຶນຂອງເອກະຊົນພາຍໃນ 100%.

ໂດຍ: ວຽງສະຫວັນ

KPL