ຂປລ. ລັດຖະບານຍີ່ປຸ່ນ ໄດ້ໃຫ້ການຊ່ວຍເຫລືອ ກໍ່ສ້າງອາຄານຮຽນ ແລະ ຫ້ອງນໍ້າໃໝ່ ຢູ່ໂຮງຮຽນມັດທະຍົມສົມບູນໂນນຍາງ ເມືອງສຸຂຸມາ ແຂວງຈຳປາສັກ ລວມມູນຄ່າປະມານ 104.000 ໂດລາສະຫະລັດ, ພ້ອມທັງສະໜອງ ອຸປະກອນ-ເຄື່ອງໃຊ້ ໃຫ້ໂຮງຮຽນດັ່ງກ່າວ ເພື່ອສົ່ງເສີມການສຶກສາຂອງນັກຮຽນ ແລະ ຄູອາຈານແຂວງຈຳປາສັກ, ທັງ​ເປັນ​ການປະກອບສ່ວນ ເຂົ້າໃນການປັບປຸງສະພາບແວດລ້ອມ ການສຶກສາ ແລະ ສະພາບສຸຂະອານະໄມ ຂອງໂຮງຮຽນດັ່ງກ່າວ. ພິທີເຊັນສັນຍາໂຄງການດັ່ງກ່າວ ຈັດຂຶ້ນໃນວັນທີ 24 ກຸມພາ 2023 ຜ່ານມາ ທີ່ນະຄອນຫວງວຽງຈັນ ໂດຍຮ່ວມ​ລົງ​ນາມ ລະຫວ່າງ ທ່ານ ໂຄບະຢະຊິ ເຄັນອິຈິ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ແລະ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ມີຜູ້ຕາງໜ້າຈາກ ກະຊວງການຕ່າງປະເທດ ແລະ ກະຊວງສຶກສາທິການ ແລະ ກິລາ ເຂົ້າຮ່ວມເປັນສັກຂີພິຍານ.

ທ່ານ ວິໄລວົງ ບຸດດາຄຳ ໄດ້ກ່າວວ່າ: ການຊ່ວຍເຫລືອອັນລ້ຳຄ່າໃນຄັ້ງນີ້, ຈະເປັນການປະ ກອບສ່ວນເຂົ້າໃນວຽກງານ ພັດທະນາ ຊັບພະຍາກອນມະນຸດ ແລະ ການພັດທະນາ ເສດຖະກິດ-ສັງຄົມ ຂອງແຂວງຈຳປາສັກ ໂດຍສະເພາະແມ່ນ ວຽກງານການສຶກສາ ຂອງເມືອງສຸຂຸມາ. ໃນຫລາຍປີຜ່ານມາ, ລັດຖະບານ ແລະ ປະຊາຊົນຍີ່ປຸ່ນ ໄດ້ໃຫ້ການຊ່ວຍເຫລືອ ໃນຫລາຍດ້ານໃຫ້ແກ່ ແຂວງຈຳປາສັກ ເຊັ່ນ: ການກໍ່ສ້າງຕຶກປິ່ນປົວຄົນເຈັບ, ໂຮງໝໍແຂວງ ແລະ ໂຮງຮຽນຕ່າງໆ ເຊິ່ງສິ່ງດັ່ງກ່າວໄດ້ສົ່ງເສີມໃຫ້ແກ່ ການຍົກລະດັບໂຄງລ່າງພື້ນຖານ ແລະ ຍັງເປັນການເພີ່ມໂອກາດ ໃນການເຂົ້າສຶກສາຮ່ຳຮຽນຂອງເດັກ ນ້ອຍ ທີ່ດ້ອຍໂອກາດ ອີກດ້ວຍ.

ທ່ານ ໂຄບະຢະຊິ ເຄັນອິຈິ ໄດ້ກ່າວວ່າ: ໂຄງການຊ່ວຍເຫລືອດັ່ງກ່າວ, ຈະຊ່ວຍໃຫ້ສະພາບແວດລ້ອມ ການສຶກສາຮ່ຳຮຽນຂອງນັກຮຽນ ແລະ ການສິດສອນຄູອາຈານ ໄດ້ຮັບການແກ້ໄຂ ພ້ອມທັງເປັນການຮັກສາ ແລະ ຍົກລະດັບສະພາບສຸຂະອານະໄມ ຂອງໂຮງຮຽນອີກເຊັ່ນກັນ. ປັດຈຸບັນ, ແຂວງຈຳປາສັກ ມີບໍລິສັດຍີ່ປຸ່ນ ຈຳນວນຫລາຍ ມາເຄື່ອນໄຫວທຸລະກິດ ແລະ ມີພະນັກງານທີ່ດີເດັ່ນຈຳນວນຫລາຍຈາກ ແຂວງຈຳປາສັກ ກຳລັງເຮັດວຽກຢູ່ໃນບໍລິສັດດັ່ງກ່າວ, ເຊິ່ງລັດຖະບານຍີ່ປຸ່ນ ຈະສືບຕໍ່ ໃຫ້ການຊ່ວຍເຫລືອ ໃນຫລາຍດ້ານ ລວມເຖິງດ້ານການສຶກສາ ເພື່ອສະໜັບສະໜູນ ການເພີ່ມຈຳ ນວນບຸກຄະລາກອນເຫລົ່ານີ້ ໃຫ້ຫລາຍຂຶ້ນ ແລະ ເປັນການຍົກລະດັບຄວາມສາມາດ ຂອງຊັບພະຍາ ກອນມະນຸດຂອງ ແຂວງຈຳປາສັກ.

ໃນໄລຍະ 5 ປີຜ່ານມາ, ລັດຖະບານຍີ່ປຸ່ນ ໄດ້ສະໜັບສະໜູນ ແຂວງຈຳປາສັກ ໃນດ້ານການສຶກສາ, ສາທາລະນະສຸກ ແລະ ໂຄງລ່າງພື້ນຖານຕ່າງໆ ລວມເປັນມູນຄ່າຫລາຍກວ່າ 780.000 ໂດລາສະຫະລັດ. ພ້ອມກັນນີ້, ປະເທດຍີ່ປຸ່ນ ຈະສືບຕໍ່ໃຫ້ການຊ່ວຍເຫລືອ ປະເທດລາວ ໃນການປັບປຸງພື້ນຖານ ຊີວິດການເປັນຢູ່ຂັ້ນຮາກຖານຕໍ່ໄປ ເພື່ອຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫລັງ” ຜ່ານການແກ້ໄຂ ຄວາມແຕກໂຕນໃນພາກພື້ນ.

KPL