ຂປລ
ວັນຄູແຫ່ງຊາດທີ່ຈະໝູນວຽນມາຄົບຮອບ 28 ປີ (ວັນທີ 7 ຕຸລາ 1994 - ວັນທີ 7 ຕຸລາ 2022) ຮອດເວລານີ້ ເຮົາມັກຈະໄດ້ເຫັນວະລີ “ແມ່ພິມຂອງຊາດ” ປະກົດຕາມຂ່າວ ທີ່ເວົ້າເຖິງຄູ ເຊິ່ງເປັນໜຶ່ງ ໃນຫລາຍວະລີ ທີ່ຄູຖືກຂະໜານນາມ, ເປັນການສັນລະເສີນ ຄຸນງາມຄວາມດີຂອງຄູ ທີ່ໄດ້ອຸທິດຕົນເພື່ອທຸກຄົນ ໃນການປະຕິບັດ ໜ້າທີ່ສິດສອນ, ຖ່າຍທອດຄວາມຮູ້, ສຶກສາອົບຮົມ, ຄົ້ນຄວ້າວິໄຈ, ຊຸກຍູ້, ສົ່ງເສີມ ແລະ ຊ່ວຍເຫລືອ ຜູ້ຮຽນດ້ວຍຫລາຍຮູບແບບ.
ວັນຄູແຫ່ງຊາດທີ່ຈະໝູນວຽນມາຄົບຮອບ 28 ປີ (ວັນທີ 7 ຕຸລາ 1994 - ວັນທີ 7 ຕຸລາ 2022) ຮອດເວລານີ້ ເຮົາມັກຈະໄດ້ເຫັນວະລີ “ແມ່ພິມຂອງຊາດ” ປະກົດຕາມຂ່າວ ທີ່ເວົ້າເຖິງຄູ ເຊິ່ງເປັນໜຶ່ງ ໃນຫລາຍວະລີ ທີ່ຄູຖືກຂະໜານນາມ, ເປັນການສັນລະເສີນ ຄຸນງາມຄວາມດີຂອງຄູ ທີ່ໄດ້ອຸທິດຕົນເພື່ອທຸກຄົນ ໃນການປະຕິບັດ ໜ້າທີ່ສິດສອນ, ຖ່າຍທອດຄວາມຮູ້, ສຶກສາອົບຮົມ, ຄົ້ນຄວ້າວິໄຈ, ຊຸກຍູ້, ສົ່ງເສີມ ແລະ ຊ່ວຍເຫລືອ ຜູ້ຮຽນດ້ວຍຫລາຍຮູບແບບ. ທຸກຄໍາສະໜານນາມ ລ້ວນແຕ່ໄດ້ຊີ້ໃຫ້ເຫັນວ່າ ຄູມີຄວາມໝາຍ ຄວາມສໍາຄັນລົ້ນເຫລືອ ຕໍ່ການສຶກສາ, ຕໍ່ການພັດທະນາ ຊັບພະຍາ ກອນມະນຸດ ກໍ່ຄືການພັດທະນາ ປະເທດຊາດ. ສະນັ້ນ, ເພື່ອສະແດງຄວາມກະຕັນຢູ ຮູ້ບຸນຄຸນຂອງຄູ ມື້ນີ້ ຜູ້ຂຽນຂໍນຳສະເໜີ ບາງຄວາມຮູ້ສຶກ ຂອງມວນຊົນ ທີ່ສະແດງຄວາມຮັກ ຄວາມກະຕັນຢູ່ ເຖິງຄູທົ່ວປະເທດ ໃນໂອກາດວັນຄູແຫ່ງຊາດທີ່ຈະມາເຖິງນີ້.
ທ່ານ ສຸລິຍະ ຕະນຸວັນ ເຈົ້າຂອງຄ້າຍເພງ Newgen Entertainment ແລະ ສູນລວມໄວໜຸ່ມ ເຜີຍຄວາມຮູ້ສຶກວ່າ : Newgen Entertainment ແມ່ນຄ້າຍເພງ ແລະ ສູນພັດທະນາໄວໜຸ່ມ ທີ່ສ້າງກິດຈະກໍາດີໆ ໃຫ້ໄວໜຸ່ມຫ່າງໄກ ຈາກສິ່ງເສບຕິດ ແລະ ເນື່ອງໃນໂອກາດວັນຄູ ທີ່ຈະມາເຖິງນີ້ ຂ້າພະເຈົ້າ ຂໍອວຍພອນໃຫ້ຄູ ຈົ່ງມີສຸພາບແຂງແຮງ ເປັນຮົ່ມໂພຮົ່ມໄຊ ຂອງລູກທົ່ວປະເທດ ພ້ອມດຽວ ກັນ ກໍຂໍສະແດງບາງທັດສະນະຕໍ່ລະບົບການສຶກສາຂອງບ້ານເຮົາວ່າ ຢາກໃຫ້ມີການພັດທະນາທາງດ້ານຫລັກສູດ ໃໝ່ໆໃຫ້ສອດຄ່ອງກັບຍຸກສະໄໝ, ເພາະຍຸກນີ້ເປັນຍຸກທີ່ຕ້ອງປ່ຽນແປງ ແລະ ປັບປຸງ ໃຫ້ທັນກັບສະພາບໂລກ ເໝືອນກັບ ຫລາຍຫລັກສູດ ຂອງຕ່າງປະເທດ ເພີ່ນກໍໄດ້ເອົາຫລັກສູດ ທີ່ປະຕິບັດໂຕຈິງ ຫລາຍກວ່າ ທິດສະດີ ເພື່ອໃຫ້ໄວໜຸ່ມ ໄດ້ຄວາມຮູ້ ໄດ້ອາຊີບ ຈົບມາແລ້ວສາມາດ ນໍາມາໃຊ້ໄດ້ ໃນການປະກອບອາຊີບ ໃນສາຂາຕ່າງໆ. ສໍາລັບກິດຈະກໍາ ຕໍ່ໄປທີ່ທາງຄ້າຍກໍາລັງເຮັດ ແມ່ນການລົງຈັດກິດຈະກໍາ ໃນແຕ່ລະໂຮງຮຽນ ເພື່ອໃຫ້ຄວາມຮູ້ ແລະ ແລກປ່ຽນທັດສະນະຄະຕິ ໃນດ້ານຕ່າງໆທີ່ເປັນປະໂຫຍດ ເພື່ອເຮັດໃຫ້ໄວໜຸ່ມລາວເຮົາ ຫ່າງໄກຈາກສິ່ງເສບຕິດ.
ພ້ອມນີ້, ນາງ ພິມພາ ແກ້ວມະນີງວົງ ໄດ້ເວົ້າສູ່ຟັງວ່າ: ອາຊີບຄູ ແມ່ນອາຊີບທີ່ມີຄວາມສໍາຄັນຫລາຍ ເພາະຕ້ອງແບກຫາບ ພາລະບົດບາດທີ່ຍິ່ງໃຫຍ່ ຜູ້ເປັນຄູຕ້ອງປະຕິບັດຕົນ ເປັນແມ່ພິມ ກໍຄື ຕົວແບບທຸກດ້ານ ໄປພ້ອມກັນ, ອັນໝາຍເຖິງ ທັງຄຸນສົມບັດສິນທໍາປະຕິວັດ, ເປັນຜູ້ເຄັ່ງຄັດ ໃນລະບຽບວິໄນ, ການຝຶກຝົນຕົນເອງ, ຄວາມອົດທົນ, ເສຍສະຫລະ ເພື່ອຜູ້ອື່ນ, ຄວາມບໍລິສຸດຈິງໃຈ, ເອື້ອ ເຟື້ອເພື່ອແຜ່, ຮູ້ຜ່ອນສັ້ນຜ່ອນຍາວ, ຮັກໃນອາຊີບ,ຮັກນັກຮຽນ ຖ່າຍທອດຄວາມຮູ້ ສູ່ນັກຮຽນຢ່າງ ມີປະສິດທິພາບ ເພື່ອໃຫ້ນັກຮຽນ ມີຄວາມຮູ້ ຄວາມສາມາດ ມີສິນທໍາປະຕິວັດ ເປັນຄົນດີ,ເປັນໜໍ່ແໜ່ງຂອງຊາດ ບ້ານເມືອງໃນອະນາຄົດ. ສະນັ້ນ, ຄູ-ອາຈານ ກໍ່ຕ້ອງໄດ້ພັດທະນາ ຍົກລະດັບຕົນເອງຢູ່ສະເໝີ ເພື່ອໃຫ້ວິທີການສິດສອນ ມີປະສິດທິຜົນສູງ, ສາມາດຊັກຈູງ ດຶງດູດນັກຮຽນ ຢາກຮຽນ ໃນ ວິຊາທີ່ຕົນເອງສິດສອນ.
KPL