ຂປລ
ຜະລິດຕະພັນຫັດຖະກໍາຊາວບ້ານ ແມ່ນການນໍາເອົາເຄື່ອງຫັດຖະກໍາ ທີ່ປະຊາຊົນປະດິດສ້າງດ້ວຍພູມປັນຍາ ແລະ ວິທີການຜະລິດ ແບບດັ້ງເດີມ ທີ່ມີຄວາມປານີດ ບໍ່ວ່າຈະເປັນ ຫັດຖະກໍາຕໍ່າແຜ່ນແພ, ຈັກສານ, ເຄື່ອງປັ້ນດິນເຜົາ ແລະ ອື່ນໆ ທີ່ມີຄວາມໂດດເດັ່ນ, ມີເອກະລັກ, ບົ່ງບອກເຖິງສິລະ ປະວັດທະນາທໍາ ແລະ ການດໍາລົງຊິວິດ ຂອງປະຊາຊົນພາຍໃນຊາດ.
ຜະລິດຕະພັນຫັດຖະກໍາຊາວບ້ານ ແມ່ນການນໍາເອົາເຄື່ອງຫັດຖະກໍາ ທີ່ປະຊາຊົນປະດິດສ້າງດ້ວຍພູມປັນຍາ ແລະ ວິທີການຜະລິດ ແບບດັ້ງເດີມ ທີ່ມີຄວາມປານີດ ບໍ່ວ່າຈະເປັນ ຫັດຖະກໍາຕໍ່າແຜ່ນແພ, ຈັກສານ, ເຄື່ອງປັ້ນດິນເຜົາ ແລະ ອື່ນໆ ທີ່ມີຄວາມໂດດເດັ່ນ, ມີເອກະລັກ, ບົ່ງບອກເຖິງສິລະ ປະວັດທະນາທໍາ ແລະ ການດໍາລົງຊິວິດ ຂອງປະຊາຊົນພາຍໃນຊາດ ມາຍົກສູງຄຸນຄ່າ, ເຮັດໃຫ້ທຸກຄົນສາມາດຊົມໃຊ້ ຜະລິດຕະພັນລາວ ເພື່ອເຮັດໃຫ້ຜະລິດພັນລາວ ມີການພັດທະນາຂຶ້ນ ຄຽງຄູ່ ກັບສັງຄົມລາວຕະຫລອດໄປ ພ້ອມດຽວກັນ ຍັງເປັນການສ້າງວຽກງານທໍາ, ສ້າງລາຍຮັບໃຫ້ບັນດາຊ້າງຫັດລາວອີກດ້ວຍ.
ທ່ານ ນາງ ກຸລາບທິບ ລາດປາກດີ ນ້ອງສາວເຈົ້າຂອງຜະລິດຕະພັນ ຫັດຖະກໍາຊາວບ້ານ ເວົ້າສູ່ຟັງວ່າ: ແຮງບັນດານໃຈ ໃນການປະກອບອາຊີບນີ້ ແມ່ນຕົນເອງ ມັກຜະລິດຕະພັນລາວຢູ່ແລ້ວ ແລະ ໄດ້ມີໂອກາດກິ້ງເກືອກ ລີເລືອນໍາປະຊາຊົນ ທີ່ເຮັດອາຊີບນີ້ ໃນຫລາຍທ້ອງຖິ່ນທົ່ວປະເທດ ຈຶ່ງມີແນວຄິດ ຢາກສົ່ງເສີມສິນຄ້າລາວ ໃຫ້ໄດ້ຮັບຄວາມສົນ ຫລາຍຂຶ້ນ ຈຶ່ງຕັດສິນໃຈ ສ້າງຜະລິດຕະພັນຫັດຊາວບ້ານ ຂຶ້ນໃນປີ 2007 ໂດຍການນໍາເອົາແພ ທີ່ປະຊາຊົນຕໍ່າມາປະຍຸກ ໃຫ້ທັນສະໄໝ ເພື່ອຕອບໂຈດ ຄົນຍຸກໃໝ່ ທັງພາຍໃນ ແລະ ຕ່າງປະເທດ ເພາະປັດຈຸບັນນີ້ ຜະລິດຕະພັນລາວ ມີບາດກ້າວຂະຫຍາຍຕົວ ໄດ້ຮັບຄວາມສົນໃຈ ຈາກນັກທ່ອງທ່ຽວຕ່າງຊາດຫລາຍຂຶ້ນ ໂດຍສັງລວມ ຈາກຍອດຂາຍ ທີ່ສົ່ງອອກຕ່າງປະເທດ ໂດຍສະເພາະ ປະເທດ ສະຫະລັດ ອາເມລິກາ ໃນແຕ່ລະປີເພີ່ມຂຶ້ນ. ແນວໃດກໍດີ ຕ້ອງຂອບໃຈ ພັກ-ລັດຖະບານ ທີ່ຍາມໃດກໍໄດ້ເອົາໃຈໃສ່ ຊ່ວຍເຫລືອດ້ານການໂຄສະນາ, ການຈັດງານຕ່າງໆ ເພື່ອວາງສະແດງ ຜະລິດຕະພັນລາວ ເພື່ອເຮັດໃຫ້ນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມ ແລະ ຊື້ເປັນເຄື່ອງຝາກຂອງຕ້ອນ ກໍເປັນໂອກາດດີ ທີ່ເຮັດໃຫ້ ຜະລິດຕະພັນລາວ ຂອງພວກເຮົາເປັນທີ່ຮູ້ຈັກຫລາຍຂຶ້ນ.
ທ່ານ ນາງ ກຸລາບທິບ ເວົ້າຕື່ມວ່າ: ການປະກອບອາຊີບນີ້ ນອກຈາກ ສົ່ງເສີມຜະລິດຕະພັນລາວແລ້ວ ຍັງສົ່ງເສີມປະຊາຊົນມີວຽກເຮັດງານທໍາ , ມີລາຍຮັບເພີ່ມຫລາຍກວ່າ 300 ບ້ານໃນຂອບເຂດທົ່ວປະເທດ.
ລາວໃຊ້ ລາວຜະລິດ ລາວຈະເລີນ ສະນັ້ນ, ຈຶ່ງຮຽກຮ້ອງໃຫ້ສັງຄົມ ຫັນມາຊົມໃຊ້ຜະລິດຕະພັນລາວ ເພື່ອສົ່ງເສີມ ໃຫ້ຜະລິດຕະພັນລາວ ເຕີບໃຫຍ່ຂະຫຍາຍຕົວ ຄຽງຄູ່ກັບພາກພື້ນ ແລະ ສາກົນ.
KPL
