ຂປລ. ເມື່ອບໍ່ດົນມານີ້, ທ່ານ ເຄນິຊິ ໂກບາຍາຊິ ເອກອັກຄະລັດຖະທູດຍີ່ປຸ່ນ ປະຈຳ ລາວ ໄດ້ຕາງໜ້າໃຫ້ລັດຖະບານຍີ່ປຸ່ນ ນຳເອົາຕູ້ອາຫານ (ປ໋ອງປາ) ຈໍານວນ 32 ຕູ້, ລວມມູນຄ່າປະມານ 3,6 ລ້ານໂດລາ ມາມອບໃຫ້ລັດຖະບານບານລາວ ເພື່ອເປັນອາຫານທ່ຽງ ໃຫ້ແກ່ນັກຮຽນໂຮງຮຽນປະຖົມ 132.450 ຄົນ, ໃນໂຮງຮຽນ 1.423 ແຫ່ງ ໃນທົ່ວປະເທດ, ຕາງໜ້າຮັບໂດຍ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ, ມີພາກສ່ວນກ່ຽວຂ້ອງ ສອງຝ່າຍເຂົ້າຮ່ວມ.
ທ່ານ ພຸດ ສິມມາລາວົງ ໄດ້ກ່າວວ່າ: ການລົງທຶນໃນດ້ານໂພຊະນາການ, ສຸຂະ ພາບ ແລະ ການສຶກສາຂອງເດັກນ້ອຍ ເປັນການຊ່ວຍໃຫ້ພວກເຂົາ ກາຍເປັນຜູ້ໃຫຍ່ທີ່ມີຄຸນນະພາບ ແລະ ໃນຂະນະດຽວກັນ ກໍເປັນການຊ່ວຍທຳລາຍວົງຈອນ ຂອງການຂາດສານອາຫານອີກດ້ວຍ, ປັດຈຸບັນຄອບຄົວ ແລະ ຊຸມຊົນເລີ່ມເຫັນຜົນປະໂຫຍດຂອງ ອາຫານເພື່ອສຸຂະພາບ ຜ່ານວຽກງານອາຫານ ໃນໂຮງຮຽນຫລາຍຂຶ້ນ ເຊິ່ງເປັນນິມິດ ໝາຍທີ່ດີ ເພາະມັນຈະເປັນການ ຊ່ວຍຫລຸດຜ່ອນຄວາມທຸກຍາກ ໃນໄລຍະຍາວ.
ທ່ານ ເຄນິຊິ ໂກບາຍາຊິ ກ່າວວ່າ: ຄວາມໝັ້ນຄົງດ້ານສະບຽງອາຫານ ແມ່ນມີຄວາມສຳຄັນ ຢ່າງຕໍ່ເນື່ອງໃນ ສປປ ລາວ, ການປັບປຸງໂພຊະນາການ ໂດຍສະເພາະເດັກນ້ອຍ ແມ່ນມີຄວາມສຳຄັນ ໃນລັກສະນະທີ່ ຊ່ວຍຮັບປະກັນສຸຂະພາບ ຂອງຄົນຮຸ່ນ ໃໝ່ ແລະ ການເຂົ້າເຖິງການ ສຶກສາຂັ້ນພື້ນຖານ ເຊິ່ງເປັນບົດບາດທີ່ສຳຄັນ ໃນການເສີມສ້າງ ແລະ ພັດທະນາ ຊັບພະຍາກອນມະນຸດຂອງ ສປປ ລາວ. ຍີ່ປຸ່ນ ໃນຖານະທີ່ເປັນ ຄູ່ຮ່ວມມືຍຸດທະສາດກັບ ສປປ ລາວ, ຈະສືບຕໍ່ໃຫ້ການສະໜັບສະໜູນ ສປປ ລາວ ໃນຂົງເຂດທີ່ກ່ຽວຂ້ອງເຊັ່ນ: ການຊ່ວຍເຫລືອ ດ້ານສະບຽງອາຫານ, ດ້ານກະສິກຳ ແລະ ການສຶກສາ, ໂດຍການຮ່ວມມືກັບ ອົງການສາກົນຕ່າງໆ ເປັນຕົ້ນ ໂຄງການອາຫານໂລກ.
ທ່ານ ຢານ ເດວບາເຣີ ຜູ້ອໍານວຍການ ແລະ ຜູ້ຕາງໜ້າຂອງ ອົງການອາຫານໂລກ ປະຈໍາ ສປປ ລາວ ໄດ້ມີຄຳເຫັນບາງວ່າ: ອົງການອາຫານໂລກ ໄດ້ອຸທິດ ແລະ ພະຍາຍາມສຸດຄວາມສາມາດ ໃນການພັດທະນາໂຮງຮຽນໃນ ສປປ ລາວ ເພື່ອປັບປຸງສຸຂະພາບ ແລະ ເສີມສ້າງດ້ານໂພຊະນາການ ຂອງເດັກນ້ອຍ, ນອກຈາກອັດຕາການເຂົ້າຮຽນເພີ່ມຂຶ້ນ, ການເຂົ້າຮຽນ ແລະ ຜົນການຮຽນທີ່ດີຂຶ້ນຂອງເດັກນ້ອຍ, ພວກເຮົາຍັງເຊື່ອ ໃນຜົນປະໂຫຍດຂອງວຽກງານ ອາຫານໃນໂຮງຮຽນ ທີ່ຈະເປັນທ່າແຮງໜຶ່ງຂອງຊຸມຊົນ ທີ່ຈະຊ່ວຍເຫລືອພວກເຂົາ ອອກຈາກຄວາມທຸກຍາກ ໂດຍການສ້າງໂອກາດ ແລະ ລາຍຮັບໃຫ້ແກ່ຊຸມຊົນ ດ້ວຍການສະໜັບສະໜູນ ຈາກລັດຖະບານຍີ່ປຸ່ນ ແລະ ການຮ່ວມມືທີ່ມີມາແຕ່ດົນນານກັບ ກະຊວງສຶກສາທິການ ແລະ ກິລາ.
ອົງການອາຫານໂລກ ຈະສືບຕໍ່ໃຫ້ການສະໜັບສະໜູນ ໂຄງການອາຫານໃນໂຮງຮຽນແຫ່ງຊາດ, ເຊິ່ງການຊ່ວຍເຫລືອດັ່ງກ່າວ, ລວມມີການຕິດຕັ້ງນ້ຳສະອາດ, ສຸຂະອະນາໄມ ແລະ ສິ່ງອຳນວຍຄວາມສະດວກຕ່າງໆ, ຊ່ວຍເຫລືອຊຸມຊົນ ໃນການສ້າງຫ້ອງອາຫານ, ສາງເກັບເຄື່ອງ ແລະ ເຮືອນຄົວ, ສ້າງສວນຄົວໃນໂຮງຮຽນ, ນອກຈາກນີ້ຍັງ ມີການສ້າງເຮືອນສີຂຽວ ຫລື ເຮືອນຮົ່ມຂອງຊຸມຊົນ ແລະ ໜອງປາ, ພ້ອມທັງດຳເນີນກິດຈະກຳ ການເສີມສ້າງທັກສະ ການຮຽນຮູ້ເຊັ່ນ: ການອ່ານໜັງສື.
ປັດຈຸບັນ, ງົບປະມານທີ່ໄດ້ຈາກ ການຊ່ວຍເຫລືອຂອງຍີ່ປຸ່ນ ແມ່ນໄດ້ນຳໃຊ້ເຂົ້າໃນການຮັບປະກັນ ຄວາມຍືນຍົງຂອງໂຄງການ ໂດຍສະໜອງການຝຶກອົບຮົມ ໃຫ້ແກ່ພະ ນັກງານລັດຢູ່ທຸກຂັ້ນ, ເຊັ່ນດຽວກັບຊຸມຊົນທ້ອງຖິ່ນ ເພື່ອຈັດຕັ້ງປະຕິບັດ, ຕິດຕາມໂຄງ ການໃຫ້ປະສົບຜົນສຳເລັດ ແລະ ເປັນການປະກອບສ່ວນ ດ້ານແຮງງານ ແລະ ພືດຜົນທາງ ການກະເສດຂອງຊຸມຊົນ.
ຂ່າວ: ທະນູທອງ
ເນື້ອໃນ: ຂປລ
