ຂປລ
ຂປລ. ແຫລ່ງຂ່າວຈາກແຂວງ ສະຫວັນນະເຂດ ໃຫ້ຮູ້ວ່າ: ໃນສົກ ຮຽນ 2025-2026 ຜ່ານມາ ເມືອງ ຈຳພອນ ແຂວງສະຫວັນນະເຂດ ຍັງຕ້ອງການຄູອະນຸບານ ແລະ ຄູ ມັດທະຍົມຕອນປາຍ 74 ຄົນ ເພື່ອ ໃຫ້ສອດຄ່ອງກັບແຜນພັດທະນາ ຂະແໜງການສຶກສາ ແລະ ກິລາ ໃນການຈັດສັນ, ສັບຊ້ອນ ແລະ ປັບປຸງຄູສອນໃນແຕ່ລະໂຮງຮຽນ ເພື່ອຫລຸດຜ່ອນການຂາດແຄນຄູ ແລະ ປັບປຸງໃນຂອດການສອນ ໃຫ້ ໄດ້ຕາມມາດຖານຂອງການສຶກສາ ວາງອອກ.
ທ່ານ ສຸລິຂັນ ສິດທິວົງ ຮອງ ຫົວໜ້າຫ້ອງການສຶກສາທິການ ແລະ ກິລາເມືອງຈຳພອນ ລາຍງານ ໃນກອງປະຊຸມຜູ້ບໍລິຫານການ ສຶກສາ ແລະ ກິລາທົ່ວເມືອງ ປະຈຳ ສົກຮຽນ 2025-2026 ເມື່ອບໍ່ດົນ ມານີ້ວ່າ: ໃນທົ່ວເມືອງຈຳພອນ ມີ ໂຮງຮຽນ 183 ແຫ່ງ, ສະຖານການ ສຶກສາກ່ອນໄວຮຽນມີ 41 ແຫ່ງ (ເອກະຊົນ 1 ແຫ່ງ), ມີໂຮງຮຽນ ປະຖົມ 117 ແຫ່ງ (ເອກະຊົນ 1 ແຫ່ງ) ແລະ ໂຮງຮຽນມັດທະຍົມ 25 ແຫ່ງ, ທົ່ວເມືອງມີນັກຮຽນ 15.303 ຄົນ, ຍິງ 7.915 ຄົນ, ທຽບໃສ່ປີຜ່ານມາຫລຸດລົງ 253 ຄົນ, ມີນັກຮຽນເອກະຊົນ 332 ຄົນ, ຍິງ149 ຄົນ, ມີຫ້ອງຮຽນ 569 ຫ້ອງ (ເອກະຊົນ 10 ຫ້ອງ), ມີຄູ ທັງໜົດ 776 ຄົນ, ຍິງ 505 ຄົນ. ໃນປີທີ່ຜ່ານມາທາງພາກສ່ວນ ສຶກສາທິການ ແລະ ກິລາເມືອງ ໄດ້ມີການປັບປຸງພື້ນຖານໂຄງລ່າງ ເປັນຕົ້ນ ເອົາໄຟຟ້າເຂົ້າໃຫ້ໂຮງຮຽນ 7 ແຫ່ງ, ປັບປຸງກໍ່ສ້າງວິດຖ່າຍ 12 ແຫ່ງ, ເດັ່ນກ່າວໝູ່ແມ່ນກໍ່ສ້າງ ປັບປຸງອາຄານຮຽນ ແລະ ສິ່ງອຳ ນວຍຄວາມສະດວກໃຫ້ແກ່ໂຮງ ຮຽນຫ້ວຍໝາກເຍົາ ແລະ ປະຖົມ ຄຳຜັກຫວານ (ໂດຍໄດ້ທຶນຈາກ ຄະນະບໍລິຫານຊາວໜຸ່ມແຂວງ ສະຫວັນນະເຂດ) ໃນໄລຍະ 1 ປີຜ່ານມາ, ອັດຕາການເຂົ້າຮຽນຂອງເດັກອາຍຸ 3-5 ປີ ປະຕິບັດໄດ້ 45,3%, ທຽບໃສ່ ສົກປີຜ່ານມາຫລຸດລົງ 5,9% (ທົ່ວ ແຂວງປະຕິບັດໄດ້ 54,3%), ອັດຕາການເຂົ້າຮຽນໃໝ່ສຸດທິ ປ1 ໃນທົ່ວເມືອງປະຕິບັດໄດ້ 99,4%, ທຽບໃສ່ສົກປີຜ່ານມາຫລຸດລົງ 0,1%, ສ່ວນອັດຕາເຂົ້າຮຽນຊັ້ນ ມ ຕົ້ນ ປະຕິບັດໄດ້ 55,6% ຫລຸດ ສົກປີຜ່ານມາ 17,6% ແລະ ລ່ືນ ຄາດໝາຍຂອງສະພາ 2,8%, ອັດຕາການເຂ້ົາຮຽນຊັ້ນມັດທະຍົມ ຕອນປາຍ ປະຕິບັດໄດ້ 18,4% ຫລຸດປີສົກຜ່ານມາ 7,6%.
ເພື່ອພັດທະນາການຮຽນ-ການ ສອນໃຫ້ດີຂຶ້ນໃນຕໍ່ໜ້າ, ຄູ-ອາຈານ ຕ້ອງເອົາໃຈໃສ່ຍົກສູງທາງດ້ານ ການບໍລິຫານ, ຄຸ້ມຄອງ, ວາງແຜນ ຍຸດທະສາດຂອງການສຶກສາ ໃຫ້ ໄດ້ມາດຖານທີ່ແທດເໝາະກັບການ ສຶກສາໃນປັດຈຸບັນ ພ້ອມທັງຍົກສູງ ຄຸນນະພາບ ທາງດ້ານການສອນ ຮອບດ້ານໃຫ້ສູງຂຶ້ນກວ່າເກົ່າ.
KPL
