ຂປລ.ໃນວັນທີ 14 ສິງຫາ 2022, ສະຖານເອກອັກຄະລັດຖະທູດ ແຫ່ງ ສປປ ລາວ ແລະ ສສ ຫວຽດນາມ ປະຈໍາ ຟິລິບປິນ ໄດ້ຮ່ວມກັນຈັດພິທີ ສະເຫລີມສະຫລອງ ປີສາມັກຄີ ມິດຕະພາບ ລາວ-ຫວຽດນາມ ກໍຄື ໂອກາດວັນສ້າງຕັ້ງ ສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທີສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ ໂດຍການເຂົ້າຮ່ວມຂອງ ທ່ານ ສົງການ ຫລວງມຸນິນທອນ ເອກອັກຄະລັດຖະທູດ ແຫ່ງ ສປປ ລາວ ແລະ ທ່ານ ຮວງ ຮຸຍ ຈຸງ ເອກອັກຄະລັດຖະທູດແຫ່ງ ສສ ຫວຽດນາມ ປະຈຳ ສ ຟິລິບປິນ, ມີບັນ ດາພະນັກງານ ກ່ຽວຂ້ອງຂອງສະຖານທູດ ລາວ ແລະ ຫວຽດນາມ ເຂົ້າຮ່ວມຢ່າງພ້ອມພຽງ.

ທ່ານ ເອກອັກຄະລັດຖະທູດ ລາວ ແລະ ຫວຽດນາມ ໄດ້ຂຶ້ນມີຄຳເຫັນ ໂດຍໄດ້ເລົ່າຫວນຄືນເຖິງຄວາມໝາຍສຳຄັນ ຂອງສອງວັນປະຫວັດສາດ ລາວ-ຫວຽດນາມ ເຊິ່ງໄດ້ຍົກໃຫ້ເຫັນ ເຖິງຄຸນງາມຄວາມດີ ແລະ ສະແດງຄວາມຮູ້ ບຸນຄຸນຢ່າງເລິກເຊິ່ງຕໍ່ ປະທານ ໂຮ່ຈິມິນ ແລະ ປະທານ ໄກສອນ ພົມວິຫານ ທີ່ແສນເຄົາລົບຮັກ ທີ່ເປັນຜູ້ກໍ່ສ້າງສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ແລະ ໄດ້ຮັບການສືບທອດ ຈາກຄົນຮຸ່ນກ່ອນ ສູ່ຮຸ່ນປັດຈຸບັນ. ພ້ອມດຽວກັນນີ້, ສອງຝ່າຍ ກໍໄດ້ຕີລາຄາສູງ ຕໍ່ການພົວພັນຮ່ວມມືສອງຝ່າຍ ຕະຫລອດໄລຍະຜ່ານມາ ແລະ ສືບຕໍ່ໄດ້ຮັບການ ເສີມຂະຫຍາຍຢ່າງຮອບດ້ານ ແລະ ເຂົ້າສູ່ລວງເລິກ ໂດຍໄດ້ມີການພົບປະແລກປ່ຽນ ການຢ້ຽມຢາມສອງຝ່າຍ ຂອງການນຳໃນທຸກລະດັບ ແຕ່ຂັ້ນສູນກາງ ຈົນຮອດທ້ອງຖິ່ນ ແລະ ໄດ້ມີກົນໄກການຮ່ວມມືກັນ ໃນທຸກຂະແຫນງການ. ສອງພັກ, ສອງລັດ ກໍຄື ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ຍາມໃດກໍໄດ້ໃຫ້ການຊ່ວຍເຫລືອ ແລະ ສະຫນັບສະໜູນ ເຊິ່ງກັນ ແລະ ກັນຢ່າງຮອບ ດ້ານຕະຫລອດມາ ທັງໃນພາລະກິດ ຕໍ່ສູ້ກູ້ຊາດ ໃນເມື່ອກ່ອນ ກໍຄືພາລະກິດແຫ່ງການປົກປັກຮັກສາ ແລະ ສ້າງສາພັດທະນາ ຂອງສອງປະເທດໃນປັດຈຸບັນ.

ໃນຂະນະດຽວກັນ, ທ່ານທູດລາວ-ຫວຽດນາມ ຕ່າງກໍໄດ້ຢືນຢັນ ຄືນຈະສືບຕໍ່ຊຸກຍູ້ ສົ່ງເສີມສາຍພົວພັນອັນຍິ່ງໃຫຍ່ ຂອງສອງປະເທດ ລາວ-ຫວຽດນາມ ໃຫ້ນັບມື້ຈະເລີນ ງອກງາມຍິ່ງໆຂຶ້ນ ເວົ້າລວມ, ເວົ້າສະເພາະ ກໍຄື ວຽກງານການປະສານ ສົມທົບເຊິ່ງກັນ ແລະ ກັນ ລະຫວ່າງ ພະນັກງານ ຂອງທັງສອງສະຖານທູດ ລາວ-ຫວຽດນາມ ເພື່ອສົ່ງເສີມຖ່າຍທອດ ບົດຮຽນປະຫວັດສາດ ໃຫ້ຄົນຮຸ່ນຫນຸ່ມຮັບຮູ້ ແລະ ເຂົ້າໃຈ ເພື່ອສືບຕໍ່ເປັນກຳລັງແຮງ ໃນການປະກອບສ່ວນເຂົ້າ ໃນການເສີມຂະຫຍາຍ ສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມື ຮອບດ້ານ ລະຫວ່າງສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ອ້າຍນ້ອງ ໃຫ້ນັບມື້ໄດ້ຮັບການເພີ່ມພູນຄູນສ້າງ ແລະ ໝັ້ນຄົງຂະໜົງແກ່ນ ຕະຫລອດໄປ.

ພິທີສະເຫລີມສະຫລອງ ປີສາມັກຄີມິດຕະພາບ ລາວ-ຫວຽດນາມ ໃນຄັ້ງນີ້ໄດ້ດຳເນີນໄປ ດ້ວຍບັນຍາກາດແຫ່ງໄມຕີຈິດ ມິດຕະພາບອັນອົບອຸ່ນ ແລະ ມີຜົນສຳເລັດ ຢ່າງຈົບງາມ ບົນຈິດໃຈຄວາມຮັກແພງສາມັກຄີພິເສດ ລະຫວ່າງ ສອງຊາດ ລາວ-ຫວຽດນາມ.

ເນື້ອໃນ: ຂປລ