ພາຍຫລັງພະຍາດໂຄວິດ-19 ໄດ້ແພ່ລະບາດຢ່າງໜັກໃນໄລຍະກວ່າ 2 ປີມານີ້ ເຮັດໃຫ້ຂະ ແໜງການ ທ່ອງທ່ຽວໄດ້ຮັບ ຜົນກະທົບບໍ່ໜ້ອຍ ຊຶ່ງໜຶ່ງໃນນີ້ ກໍແມ່ນແຫລ່ງທ່ອງທ່ຽວ ນ້ຳຕົກຕາດເຍືອງ ຢູ່ບ້ານຫລັກ 40 ເມືອງປາກຊ່ອງ ແຂວງຈຳປາສັກ, ມີບາງໄລຍະ ກໍໄດ້ປິດກິດຈະການຊົ່ວຄາວ. ເຖິງປານນັ້ນກໍຕາມ ບໍລິສັດພັດ ທະນາ ແຫລ່ງທ່ອງທ່ຽວ ນ້ຳຕົກຕາດເຍືອງ ກໍຖືໂອກາດນີ້ ເຕົ້າໂຮມ ແລະ ສົ່ງເສີມ ປະຊາຊົນບ້ານດັ່ງກ່າວ ທຳການຜະລິດ ພືດຜັກປອດສານພິດ, ຕ່ຳຫູກເປັນສິນຄ້າ ທັງພັດທະນາ ປະຊາຊົນ ໃຫ້ກຽມຄວາມພ້ອມ ຕ້ອນຮັບນັກທ່ອງທ່ຽວ ທີ່ຈະເຂົ້າມາທ່ຽວ ໃນສະຖານທີ່ ນ້ຳຕົກຕາດເຍືອງ ໃຫ້ມີຄວາມປະທັບໃຈ ທັງສ້າງລາຍຮັບ ເຂົ້າຄອບ ຄົວ ແກ້ໄຂຄວາມທຸກຍາກ ໃຫ້ນັບມື້ຫລຸດລົງ.   

          ທ່ານ ນາງ ສອນທິດາ ອຸນາພົມ ຜູ້ອຳນວຍການ ບໍລິສັດພັດທະນາ ແຫລ່ງທ່ອງທ່ຽວ ນ້ຳຕົກຕາດເຍືອງ ໃຫ້ສຳພາດເມື່ອບໍ່ດົນນີ້ວ່າ: ໃນໄລຍະກວ່າ 2 ປີທີ່ປະເທດລາວເຮົາ ໄດ້ຮັບຜົນກະທົບ ຈາກການແພ່ລະບາດ ພະຍາດໂຄວິດ-19 ສົ່ງຜົນກະທົບໂດຍກົງ ຕໍ່ແຫລ່ງທ່ອງທ່ຽວ ນ້ຳຕົກຕາດເຍືອງ ພວກເຮົາ. ບໍ່ສະເພາະ ແຕ່ແຫລ່ງທ່ອງ ທ່ຽວ ຕົນເທົ່ານັ້ນ, ຂົງເຂດອື່ນໆ ປິ່ນອ້ອມກໍໄດ້ຮັບ ຜົນກະທົບເຊັ່ນດຽວກັນ ເປັນຕົ້ນແມ່ນ ບໍລິສັດທ່ອງທ່ຽວ, ເຮືອນພັກ, ຮ້ານອາຫານອື່ນໆ. ແນວໃດກໍຕາມ ໄລຍະທີ່ໄດ້ຮັບ ຜົນກະທົບນັ້ນ, ພວກເຮົາຖືໂອກາດ ດັ່ງກ່າວເຕົ້າໂຮມ ປະຊາຊົນບ້ານຫລັກ 40 ຫລາຍສິບຄອບຄົວ ທຳການຜະລິດ ພືດຜັກປອດສານພິດ ເພື່ອສະໜອງ ໃຫ້ແກ່ ແຫລ່ງທ່ອງທ່ຽວ ນ້ຳຕົກຕາດເຍືອງ ແລະ ມາຮອດປັດຈຸບັນ ເຫັນວ່າປະຊາຊົນບ້ານນີ້ ມີຄວາມຕື່ນຕົວ ກວ່າແຕ່ກ່ອນ ຊຶ່ງເກັບກາເຟ 2 ລະດູແລ້ວ ກໍໄດ້ເສຍຫຍ້າ ຮັກສາຕົ້ນກາເຟເທົ່ານັ້ນ, ແຕ່ດຽວນີ້ ນອກຈາກສວນກາເຟ ທີ່ໄດ້ຮັກສາແລ້ວ ພື້ນທີ່ດິນເປົ່າວ່າງ ຢູ່ໃນສວນກາເຟ ກໍສາມາດນຳໃຊ້ ຜະລິດພືດຜັກຕ່າງໆ ທີ່ສ້າງລາຍຮັບ ເຂົ້າຄອບ ຄົວ ຂອງເຂົາເຈົ້າຕື່ມອີກ.

          ທ່ານຍັງກ່າວຕື່ມອີກວ່າ: ນອກຈາກສົ່ງເສີມປູກພືດຜັກແລ້ວ, ຍັງໄດ້ຊຸກຍູ້ ສົ່ງເສີມປະຊາຊົນ ບັນດາເຜົ່າຢູ່ບ້ານຫລັກ 40 ກ່ຽວກັບຫັດຖະກຳ ກໍຄືການຕຳຫູກ ເຄື່ອງນຸ່ງຂອງແຕ່ເຜົ່າ ໃຫ້ຍືນຍົງ ຊຶ່ງນອກຈາກ ນັກທ່ອງທ່ຽວ ໄດ້ທ່ຽວຊົມນ້ຳຕົກຕາດ ແລະ ທຳມະຊາດສວຍງາມແລ້ວ, ຍັງໄດ້ສຳຜັດ ກັບຮີດຄອງປະເພນີ, ວັດທະນະທຳ ຂອງ ແຕ່ລະເຜົ່າຕື່ມອີກ. ນີ້ກໍແມ່ນອີກສ່ວນໜຶ່ງ ໃນການສ້າງວຽກ ເຮັດງານທຳ ໃຫ້ແກ່ເຂົາເຈົ້າ ທັງເປັນການ ປົກປັກຮັກສາ ຮີດຄອງປະເພນີ ດ້ານການນຸ່ງຖື ແລະ ອື່ນໆ ໃຫ້ມີຄວາມຍືນຍົງ ຕະຫລອດໄປ. ແນວໃດກໍຕາມ ພວກເຮົາມີຄວາມພ້ອມແລ້ວ ທີ່ຈະຕ້ອນຮັບ ນັກທ່ອງທ່ຽວ ທຸກໆທ່ານທັງພາຍໃນ ແລະ ຕ່າງປະເທດ ທີ່ຢາກເຂົ້າ ມາທ່ຽວຊົມ ນ້ຳຕົກຕາດເຍືອງ ເນື່ອງຈາກພວກເຮົາ ມີກຳລັງກຽມ ພ້ອມຕ້ອນຮັບ ນັກທ່ອງທ່ຽວ, ພ້ອມນີ້ ກໍໄດ້ສ້າງຫລາຍກິດຈະກຳອີກຕື່ມ ແລະ ໃນມໍ່ໆນີ້ ຈະໄດ້ເປີດຕະຫລາດ ຂາຍພືດ ຜັກປອດສານພິດ ແລະ ອື່ນໆ ຢູ່ພາຍໃນ ແຫລ່ງທ່ອງທ່ຽວ ໂດຍບໍ່ໄດ້ເກັບຄ່າ ສະຖານທີ່ ເພື່ອສົ່ງເສີມເຊື່ອມຕໍ່ ທີ່ໄດ້ຊຸກຍູ້ເຂົາເຈົ້າ ປູກຟັງຄືຜ່ານມາ.   

  ໂດຍ: ຢ່າຕົ່ງ

KPL