ການຖອດຖອນບົດຮຽນ ຈາກການປະຕິບັດວຽກງານຜ່ານມາ ເພື່ອໃຫ້ເຫັນໄດ້ບັນດາມູນ ເຊື້ອອັນດີທີ່ຕ້ອງສືບຕໍ່ເສີມຂະຫຍາຍ ແລະ ຕັດສິນໃຈແກ້ໄຂໃຫ້ເດັດຂາດ ບັນດາຂອດຄົງຄ້າງ ແມ່ນສິ່ງຈໍາເປັນ ທີ່ຕ້ອງປະຕິບັດຢ່າງກົງໄປກົງມາ-ພາວະວິໄສ.

        ຮັບຊາບຂໍ້ມູນການຕີລາຄາຢ່າງພາວະວິໄສ ການປ້ອງກັນ, ຄວບຄຸມ ແລະ  ແກ້ໄຂສະພາບການລະບາດ ຂອງພະຍາດໂຄວິດ-19 ທີ່ຄະນະສະເພາະກິດ ໄດ້ສະຫລຸບຕີລາຄາ ຖອດຖອນບົດຮຽນ ໃນເດືອນຜ່ານມາ ມີຫລາຍອັນທີ່ປະຕິບັດໄດ້ດີ ແລະ ອັນທີ່ຕ້ອງແກ້ໄຂປັບປຸງ...ສະພາບໂດຍລວມນັບແຕ່ຕົ້ນປີ 2022 ມາ ນີ້ການລະບາດຂອງໂຄວິດ-19 ຢູ່ປະເທດເຮົາແມ່ນມີທ່າອ່ຽງຫລຸດລົງ ຊຶ່ງໄດ້ມີການຕີລາຄາວ່າ ສາເຫດສ່ວນໜຶ່ງ ແມ່ນຍ້ອນອັດຕາປົກຫຸ້ມ ຂອງການສັກວັກຊິນທີ່ບັນລຸໄດ້ກວ່າ 50% ໃນທົ່ວປະເທດ, ຕໍ່ມາແມ່ນສາມາດຜະລິດ ຢາປິ່ນປົວພະຍາດດັ່ງກ່າວ ໄດ້ເອງຢູ່ພາຍໃນປະເທດ, ທັງໄດ້ມີຄູ່ມືທີ່ລະອຽດສົມຄວນ ໃຫ້ແກ່ຜູ້ ຕິດເຊື້ອ ທີ່ປິ່ນປົວຕົນເອງຢູ່ບ້ານເຮືອນ. ພ້ອມດຽວກັນນັ້ນ ກໍ່ມີການດຸນດ່ຽງ ໃນການປະຕິບັດມາດຕະການຄວບຄຸມ, ຜ່ອນຜັນ ໂດຍການຮ່ວມມືຂອງທົ່ວສັງຄົມ...

        ການຕີລາຄາຍັງໃຫ້ເຫັນດ້ານທີ່ຄົງຄ້າງ ເປັນຕົ້ນ ການຂໍອະນຸມັດຄົນເຂົ້າ-ອອກເມືອງ ຍັງມີຫລາຍຂັ້ນຂອດ ທີ່ຈະຕ້ອງຮີບຮ້ອນປັບປຸງແກ້ໄຂ, ລວມທັງການນໍາໃຊ້ ອຸປະກອນຕິດຕາມທາງການແພດ ຜ່ານມາຍັງພົບຄວາມຫຍຸ້ງຍາກ ແລະ ບໍ່ມີປະສິດທິຜົນພໍ ຊຶ່ງຈະມີການຫັນເອົາການນໍາໃຊ້ ຄິວອາໂຄດ ຂອງລະບົບ Lao KYC ແທນການນໍາໃຊ້ເຄື່ອງມື ຕິດຕາມທາງການແພດໃນໃກ້ນີ້...

        ບັນຫາທີ່ສັງຄົມຕັ້ງຂຶ້ນ ກໍ່ເປັນປະເດັນກົງກັນການຕີລາຄາຖອດຖອນບົດຮຽນ ທີ່ຕ້ອງປັບປຸງ ນັ້ນແມ່ນການແກ້ຂອດຈໍາກັດ ໃນການອະນຸຍາດຄົນເຂົ້່າ-ອອກ ທີ່ໃຫ້ງ່າຍຂຶ້ນ ແລະ ຮັບປະກັນຄວາມປອດໄພ ເພາະເຮົາພວມເປີດຮັບນັກທ່ອງທ່ຽວ ຈາກຕ່າງປະເທດເຂົ້າມາ ໃນເຂດທ່ອງທ່ຽວສີຂຽວ ໃນໄລຍະທີ 1 ຊຶ່ງຖ້າ ເຮົາຖອດຖອນ ເຫັນບັນດາຂອດອຸດຕັນ ແລະ ແກ້ໄຂທັນການ ກໍ່ຈະເປັນຜົນດີ ໃຫ້ແກ່ການສືບຕໍ່ໄລຍະຕໍ່ໆໄປ ໃຫ້ບັນລຸຜົນສູງສຸດ ຕາມເປົ້າໝາຍທີ່ກໍານົດໄວ້.

ສະຫລຸບວ່າ ການສະຫລຸບຖອດຖອນບົດຮຽນຢ່າງກົງໄປກົງມາ ແລະ ພາວະວິໄສ ໃນເງື່ອນໄຂຂອງພວກເຮົາແມ່ນສໍາຄັນ, ຫລີກເວັ້ນການເກົາບໍ່ຖືກບ່ອນຄັນ, ບໍ່ຊັ້ນມັນກໍ່ແກ້ໄຂບໍ່ໄດ້ຈັກເທື່ອ, ຕ້ອງຮັບຮູ້ເຖິງຄວາມເປັນຈິງ ໃນເງື່ອນໄຂຂອງພວກເຮົາ. 

* ຄ້ອງໃໝ່

KPL