ຂປລ
ບັນຫາຢາເສບຕິດຖືເປັນອາຊະຍາກໍາທີ່ຮ້າຍແຮງທີ່ສຸດຕ່ໍການດໍາລົງຊີວິດຂອງມວນມະນຸດ, ມັນທໍາລາຍຄວາມສະຫງົບ, ຄວາມປອດໄພ, ຄວາມເປັນລະບຽບຮຽບຮ້ອຍທາງສັງຄົມ, ເສດຖະກິດ, ວັດທະນະທໍາ ຊຶ່ງຜູ້ທີ່ເຄື່ອນໄຫວພົວພັນກ່ຽວຂ້ອງກັບຢາເສບຕິດໃນທຸກໆກໍລະນີ, ນັບທັງຜູ້ຖືກເຄາະຮ້າຍຈາກຢາເສບຕິດລ້ວນແຕ່ເປັນພິດໄພ, ມີຜົນຮ້າຍຕ່ໍຊີວິດ, ສຸຂະພາບ, ຊັບສິນຂອງສັງຄົມ ຫລື ສ້າງບາດແຜຄວາມເຈັບຊໍ້າດ້ານຈິດໃຈຕໍ່ບຸກຄົນ, ຄອບຄົວ ແລະ ຍາດພີ່ນ້ອງ.
ຂປລ. ພ້ອມນັ້ນ, ມັນຍັງທໍາລາຍຄວາມສະຫງົບປອດໄພໃນຄອບຄົວ, ກີດຂວາງການພັດທະນາເສດຖະກິດ-ສັງຄົມ ແລະ ຍັງສ້າງຜົນກະທົບຕໍ່ຄວາມໝັ້ນຄົງຂອງປະເທດຊາດ. ທ່ານ ພົອ ຄໍາລຽງ ອຸທະໄກສອນ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ປະທານຄະນະກໍາມະການແກ້ໄຂບັນຫາຢາເສບຕິດລະດັບຊາດ ໄດ້ໃຫ້ຮູ້ໃນໂອກາດວັນແຫ່ງຊາດຕ້ານຢາເສບຕິດ ປະຈໍາປີ 2026 (12 ຕຸລາ 2001-12 ຕຸລາ 2026) ຄົບຮອບ 25 ປີ ວ່າ: ບັນຫາຢາເສບຕິດຢູ່ ສປປ ລາວ ກໍຄືກັບຫລາຍປະເທດໃນໂລກ ຢາເສບຕິດໄດ້ແຜ່ລະບາດແຕ່ຕົວເມືອງໄປສູ່ຊົນນະບົດໃນຫລາຍລະດັບທີ່ແຕກຕ່າງກັນ; ເປັນສາເຫດພາໃຫ້ເກີດປະກົດການຫຍໍ້ທໍ້ ແລະ ອາຊະຍາກໍາປະເພດຕ່າງໆ, ຈໍານວນການທັບມ້າງຄະດີຢາເສບຕິດ, ຈັບຜູ້ຖືກຫາ, ນັກໂທດ, ຜູ້ຕິດຢາເສບຕິດ, ຢາເສບຕິດ ແຕ່ລະປະເພດທີ່ຢຶດໄດ້ເພີ່ມຂຶ້ນຢ່າງໜ້າເປັນຫ່ວງ, ເລ່ຫລ່ຽມການເຄື່ອນໄຫວລັກລອບ, ຂົນສ່ົງຄ້າຂາຍຢາເສບຕິດມີລັກສະນະເລິກແລບ, ແນບນຽນດ້ວຍຫລາຍວິທີ, ມີຫລາຍຮູບການ, ມີຂະບວນການທີ່ສະລັບສັບຊ້ອນເປັນກຸ່ມເຄືອຂ່າຍແໜ້ນໜາ, ເຊື່ອມໂຍງທັງພາຍໃນ ແລະ ຕ່າງປະເທດ; ນໍາໃຊ້ພາຫະນະ, ອຸປະກອນທີ່ທັນສະໄໝ, ມີອາວຸດກຽມພ້ອມຕອບໂຕ້ກັບເຈົ້າໜ້າທີ່ຂອງພວກເຮົາ; ກຸ່ມຄົນເຫລົ່ານ້ັນໄດ້ຊອກທຸກວິທີທາງ ເພ່ືອເບ່ືອເມົາຊາວໜຸ່ມ, ເຍົາວະຊົນທ່ີເປັນອະນາຄົດຂອງຊາດ ເປັນຕົ້ນການປະ ສົມສິ່ງເສບຕິດໃສ່ໃນຜະລິດຕະພັນອາຫານ, ເຄ່ືອງດ່ືມ, ຢາປົວພະຍາດ, ຢາສູບໄຟຟ້າ ແລະ ອື່ນໆ.
ຍ້ອນເຫັນໄດ້ເຖິງໄພອັນຕະລາຍ ແລະ ຄວາມຈໍາເປັນຕົວຈິງໃນວຽກງານແກ້ໄຂບັນຫາຢາເສບຕິດຕ້ອງມີຄວາມເດັດຂາດ, ໂປ່ງໃສ ແລະ ເປັນມືອາຊີບ; ໃນໜຶ່ງປີທີ່ຜ່ານມາຄະນະກຳມະການແກ້ໄຂບັນຫາຢາເສບຕິດລະດັບຊາດ ໂດຍມີກະຊວງປ້ອງກັນຄວາມສະຫງົບ ເປັນເສນາທິການໃຫ້ສູນກາງພັກ, ລັດຖະບານໃນການຊີ້ນໍາການຈັດຕັ້ງປະຕິບັດວຽກງານແກ້ໄຂບັນຫາຢາເສບຕິດຢ່າງຈິງຈັງຕະຫລອດມາ. ມາຮອດເວລານີ້, ເປັນໄລຍະເວລາການສືບຕ່ໍຈັດຕ້ັງປະຕິບັດຕາມມະຕິ 171/ ສພຊ, ລົງວັນທີ 21 ພະຈິກ 2025; ວ່າດ້ວຍການຮັບຮອງເອົາຜົນການຈັດຕັ້ງປະຕິບັດວາລະແຫ່ງຊາດ (2021-2025) ແລະ ທິດທາງແຜນການຕໍ່ໜ້າໃຫ້ຫັນມາເປັນແຜນງານແຫ່ງຊາດຕາມ 6 ວຽກຈຸດສຸມ, ທັງຫັນເຂົ້າສູ່ວຽກງານຕົວຈິງຢ່າງຕັ້ງໜ້າ.
KPL
