ຂປລ.ກອງປະຊຸມຄະນະກໍາມາທິການຮ່ວມວ່າດ້ວຍການຮ່ວມມື ລາວ- ໄທ ຄັ້ງທີ 23 ໄດ້ຈັດຂຶ້ນຢ່າງເປັນທາງການໃນວັນທີ 2 ຕຸລາ 2026 ທີ່ແຂວງຫລວງພະບາງ ສປປ ລາວ, ພາຍໃຕ້ການເປັນປະທານຮ່ວມຂອງທ່ານ ທອງສະຫວັນ ພົມວິຫານ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ສີຫະສັກ ພວງເກດແກ້ວ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ  ແຫ່ງ ລາຊະອານາຈັກໄທ ພ້ອມດ້ວຍຄະນະຜູ້ແທນຂອງທັງສອງຝ່າຍເຂົ້າຮ່ວມ.

    ກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມື ລາວ-ໄທ ຄັ້ງທີ 23 ນີ້ ຈັດຂຶ້ນໃນທ່າມກາງບັນຍາກາດ ທ່ີການພົວພັນ  ແລະ  ການຮ່ວມມືຂອງສອງປະເທດ   ສືບຕໍ່ໄດ້ຮັບການເສີມຂະຫຍາຍຢ່າງຕ່ໍເນື່ອງ, ນັບມື້ເລິກເຊິ່ງ ແລະ ກວ້າງຂວາງໃນຫລາຍຂົງເຂດ. ກອງປະຊຸມຄັ້ງນີ້, ໄດ້ທົບທວນຄືນຜົນ ສໍາເລັດຂອງການຈັດຕັ້ງປະຕິບັດບົດບັນທຶກກອງປະຊຸມຄະນະກໍາມາທິການຮ່ວມວ່າດ້ວຍການຮ່ວມມື ລາວ-ໄທ ຄັ້ງທີ 22 ແລະ ຮ່ວມກັນປຶກສາຫາລື ເພື່ອກໍານົດທິດທາງແຜນງານການຮ່ວມມືໃນຕໍ່ໜ້າ. ກອງປະຊຸມໄດ້ຕີລາຄາສູງຕໍ່ການຮ່ວມມືສອງຝ່າຍຢ່າງຮອບດ້ານຕະຫລອດໄລຍະ 5 ປີຜ່ານມາ ເປັນຕົ້ນແມ່ນດ້ານການເມືອງ ແລະ ຄວາມໝັ້ນຄົງ, ເສດຖະກິດ-ສັງຄົມ, ການຄ້າ, ການລົງທຶນ, ທ່ອງທ່ຽວ ແລະ ດ້ານອ່ືນໆ  ໄດ້ຂະຫຍາຍຕົວຂຶ້ນຢ່າງກວ້າງຂວາງ. ຍິ່ງກວ່ານັ້ນ, ສາຍພົວພັນ ລະຫວ່າງ ສອງປະເທດ ລາວ  ແລະ  ໄທ  ໄດ້ກ້າວຂຶ້ນສູ່ລະດັບໃໝ່ພາຍຫລັງສອງປະເທດໄດ້ຍົກລະດັບສາຍພົວພັນມິດຕະພາບເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງໃນປີ 2022. ຄຽງຄູ່ກັນນັ້ນ, ສອງຝ່າຍກໍໄດ້ມີການພົບປະ ແລະ ແລກປ່ຽນການຢ້ຽມຢາມຂອງຄະນະຜູ້ແທນລະດັບສູງລະຫວ່າງສອງປະເທດຢ່າງເປັນປົກກະຕິ, ພິເສດແມ່ນການແລກປ່ຽນການຢ້ຽມຢາມ ແລະ ການເຂົ້າຮ່ວມພິທີເປີດຂົວມິດຕະພາບ ລາວ-ໄທ ແຫ່ງທີ 5 (ບໍລິຄຳໄຊ-ບຶງການ) ຢ່າງເປັນ ທາງການຂອງປະມຸກລັດສອງປະເທດໃນໂອກາດສະເຫລີມສະຫລອງວັນສ້າງຕັ້ງສາຍພົວພັນທາງການທູດ ລາວ-ໄທ ຄົບຮອບ 75 ປີ ໃນປີ 2025 ທີ່ຜ່ານມາ. 

    ກອງປະຊຸມຄັ້ງນີ້, ໄດ້ລົງເລິກປຶກສາຫາລືການຮ່ວມມືສອງຝ່າຍ ຢ່າງຮອບດ້ານເປັນຕ້ົນແມ່ນການຮ່ວມມື ດ້ານການເມືອງ  ແລະ ຄວາມໝັ້ນຄົງ ໂດຍສະເພາະການຮັກສາຄວາມໝັ້ນຄົງ ແລະ ຄວາມສະຫງົບ ຮຽບຮ້ອຍຕາມບໍລິເວນຊາຍແດນ ລາວ-ໄທ, ການຊຸກຍູ້ການສຳຫລວດ ແລະ ປັກຫລັກໝາຍຊາຍແດນລາວ-ໄທ ທັງທາງບົກ, ທາງນ້ຳ ແລະ ຊຸກຍູ້ໜ້າວຽກຄົງຄ້າງຕ່າງໆໃຫ້ມີຄວາມຄືບໜ້າ ແລະ ສຳເລັດເປັນຮູບປະທຳລວມເຖິງການປ້ອງກັນ ແລະ ສະກັດກ້ັນຢາເສບຕິດ, ອາຊະຍາກໍາທາງເຕັກໂນໂລຊີ-ການສື່ສານ, ຕ້ານການຄ້າມະນຸດ ແລະ ອື່ນໆ; ການຮ່ວມມືດ້ານເສດຖະກິດ-ການຄ້າ-ການລົງທຶນເຫັນວ່າມີການຂະຫຍາຍຕົວ ໂດຍສະເພາະການຮ່ວມມືລະຫວ່າງພາກເອກະຊົນ, ເສດຖະກິດດີຈິຕອນ, ການສົ່ງເສີມ ແລະ ພັດທະນາວິສາຫະກິດຂະໜາດກາງ ແລະ ຂະໜາດນ້ອຍ; ການຮ່ວມມືດ້ານເສດຖະກິດໃນຂອບອະນຸພາກພ້ືນ; ການຮ່ວມມືດ້ານວຽກງານການທູດເສດຖະກິດ; ການຮ່ວມມືເພື່ອການເຊື່ອມໂຍງ ໂດຍສະເພາະແມ່ນການເຊ່ືອມຕ່ໍລົດໄຟລາວ-ຈີນ ກັບລະບົບລາງຂອງໄທ, ໂຄງການກໍ່ສ້າງຂົວຂ້າມນໍ້າຂອງຊຽງແມນ-ຫລວງພະ ບາງ ສປປ ລາວ, ໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ 6 (ສາລະວັນ-ອຸບົນຣາຊະທານີ), ໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ 7 (ເມືອງໝື່ນ, ແຂວງວຽງຈັນ-ອຳເພີປາກຊົມ, ຈັງຫວັດເລີຍ) ແລະ ໂຄງການພັດທະນາເສັ້ນທາງອື່ນໆ; ການຮ່ວມມືດ້ານການທ່ອງທ່ຽວ, ການຮ່ວມມືດ້ານກົດໝາຍ ແລະ ຍຸຕິທໍາ, ການຮ່ວມມືດ້ານແຮງງານ, ການຮ່ວມມືດ້ານພະລັງງານໄຟຟ້າ ແລະ ພະລັງງານອື່ນໆ, ການຮ່ວມມືດ້ານການເງິນ-ການທະນາຄານ,  ການຮ່ວມມືດ້ານສັງຄົມ ແລະ ການພັດທະນາ; ການຮ່ວມມືດ້ານກະສິກໍາ; ການຮ່ວມມືດ້ານສາທາລະນະສຸກ; ການຮ່ວມມືດ້ານການສຶກສາ ແລະ ການພັດທະນາຊັບພະຍາກອນມະນຸດ; ການຮ່ວມມືດ້ານວິທະຍາສາດ ແລະ ເຕັກໂນໂລຊີ; ການຮ່ວມມືດ້ານສ່ິງແວດລ້ອມ ແລະ ຊັບພະຍາກອນທໍາມະຊາດ, ການຄຸ້ມຄອງນໍ້າຢ່າງຍືນຍົງ; ການຮ່ວມມືດ້ານວັດທະນະທໍາ-ສັງຄົມ; ການຮ່ວມມືດ້ານສື່ມວນຊົນ; ການຮ່ວມມືລະຫວ່າງສະມາຄົມ ລາວ-ໄທ, ໄທ-ລາວ ເພື່ອມິດຕະພາບ ແລະ ການຮ່ວມມືດ້ານອື່ນໆ.

   ກອງປະຊຸມຄັ້ງນີ້, ຍັງໄດ້ປຶກສາຫາລືເພື່ອກໍານົດແຜນງານການຮ່ວມມືໃນຕໍ່ໜ້າ ໂດຍໄດ້ຢືນຢັນເຈດຕະນາລົມຂອງລັດຖະບານທັງສອງປະເທດ ທີ່ຈະເພີ່ມທະວີການຮ່ວມມືທັງໃນຂອບສອງຝ່າຍ ແລະ ຫລາຍຝ່າຍລວມທັງການພົບປະ ແລະ ແລກປ່ຽນການຢ້ຽມຢາມລະຫວ່າງກັນຂອງເຈົ້າໜ້າທີ່ລະດັບຕ່າງໆທັງສູນກາງ ແລະ ທ້ອງຖ່ິນ ແນໃສ່ຊຸກຍູ້ ແລະ ສ້າງສະພາບແວດລ້ອມໃຫ້ເອື້ອຍອໍານວຍຕໍ່ການເປັນ “ຄູ່ຮ່ວມຍຸດທະສາດ ເພ່ືອການຈະເລີນເຕີບໂຕ ແລະ ການພັດທະນາແບບຍືນຍົງ” ໃຫ້ເປັນຮູບປະທໍາ ແລະ ນໍາຜົນປະໂຫຍດສູງສຸດມາສູ່ປະຊາຊົນສອງປະເທດຢ່າງແທ້ຈິງ. 

   ໃນຕອນທ້າຍຂອງກອງປະຊຸມ, ທ່ານປະທານກອງປະຊຸມຮ່ວມທັງສອງໄດ້ຮ່ວມກັນຮັບຮອງເອົາບົດບັນທຶກກອງປະຊຸມຄະນະກໍາມາທິການຮ່ວມວ່າດ້ວຍການຮ່ວມມື ລາວ-ໄທ ຄັ້ງທີ 23 ເພື່ອເປັນພ້ືນຖານອັນສໍາຄັນ ແລະ ໜັກແໜ້ນໃນການສືບຕໍ່ສົ່ງເສີມການພົວພັນຮ່ວມມືບົນພື້ນຖານບ້ານໃກ້ເຮືອນຄຽງທີ່ດີ,  ເຕັມໄປດ້ວຍໄມຕີຈິດມິດຕະພາບ, ການຊ່ວຍເຫລືອເຊ່ິງກັນ  ແລະ ກັນ ແລະ ຮ່ວມກັນກ້າວຂຶ້ນຕະຫລອດ ໄປ.

   ຈາກນ້ັນ, ສອງຮອງນາຍົກລັດຖະມົນຕີ ລາວ ແລະ ໄທ ໄດ້ເຂົ້າຮ່ວມເປັນສັກຂີພິຍານໃນພິທີລົງນາມໜັງສືເຈດຈໍານົງໃນການສ້າງຕັ້ງສາຍພົວພັນມິດຕະພາບລະຫວ່າງແຂວງຫລວງພະບາງ ແຫ່ງ ສປປ ລາວ ແລະ ຈັງຫວັດນ່ານ ແຫ່ງ ລາຊະອານາຈັກໄທ ແລະ ພິທີ ແລກປ່ຽນເອກະສານແຜນປະຕິບັດງານວຽກງານຊາຍແດນ ລາວ- ໄທ ແລະ ໂຄງການກໍ່ສ້າງຂົວຊຽງແມນ-ຫລວງພະບາງ ສປປ ລາວ. 

    ນອກຈາກນັ້ນ, ສອງຮອງນາຍົກລັດຖະມົນຕີ ລາວ ແລະ ໄທ ພ້ອມດ້ວຍຄະນະຜູ້ແທນທັງສອງຝ່າຍຍັງໄດ້ໄປກວດກາຈຸດໂຄງການກໍ່ສ້າງຂົວຂ້າມນໍ້າຂອງຊຽງແມນ-ຫລວງພະບາງ ແລະ ຢ້ຽມຊົມວັດຊຽງທອງ ອີກດ້ວຍ.

ຂ່າວ: ກົມການຂ່າວ, ກະຊວງການ ຕ່າງປະເທດ; ພາບ: ເກດສະໜາ

KPL