ຂປລ
ຂປລ. ໃນຍຸກທີ່ສັງຄົມໃຫ້ຄວາມສໍາຄັນກັບສຸຂະພາບ ແລະ ຄວາມປອດໄພຂອງອາຫານເພີ່ມຂຶ້ນຢ່າງວ່ອງໄວ, "ກະສິກຳສະອາດ" ບໍ່ໄດ້ເປັນພຽງແຕ່ທາງເລືອກອີກຕໍ່ໄປ ແຕ່ໄດ້ກາຍເປັນທາງລອດ ແລະ ຍຸດທະສາດສໍາຄັນໃນການພັດທະນາເສດຖະກິດ.
ຂປລ. ໃນຍຸກທີ່ສັງຄົມໃຫ້ຄວາມສໍາຄັນກັບສຸຂະພາບ ແລະ ຄວາມປອດໄພຂອງອາຫານເພີ່ມຂຶ້ນຢ່າງວ່ອງໄວ, "ກະສິກຳສະອາດ" ບໍ່ໄດ້ເປັນພຽງແຕ່ທາງເລືອກອີກຕໍ່ໄປ ແຕ່ໄດ້ກາຍເປັນທາງລອດ ແລະ ຍຸດທະສາດສໍາຄັນໃນການພັດທະນາເສດຖະກິດ. ຫົວໃຈສໍາຄັນຂອງການຫັນປ່ຽນນີ້ ບໍ່ໄດ້ຢູ່ພຽງແຕ່ການມີນະໂຍບາຍທີ່ດີເທົ່ານັ້ນ, ແຕ່ມັນແມ່ນການຖ່າຍທອດບົດຮຽນ ແລະ ຄວາມຮູ້ໃຫ້ໄປຮອດມືຂອງຊາວກະສິກອນຜູ້ເປັນເຈົ້າການຜະລິດຕົວຈິງຢ່າງມີປະສິດທິພາບ.
ດັ່ງເມື່ອມໍ່ໆມານີ້, ສູນກະສິກຳສະອາດ ກົມປູກຝັງ ໄດ້ຈັດຝຶກອົບຮົມດ້ານວຽກງານກະສິກຳສະອາດໃຫ້ແກ່ກຸ່ມຊາວສວນຜະລິດພືດຜັກ ບ້ານດອຍແດງ ແລະ ບ້ານສີເມືອງງາມ ເມືອງຕົ້ນເຜິ້ງ, ແຂວງບໍ່ແກ້ວ ຊຶ່ງການຝຶກອົບຮົມຄັ້ງນີ້ ແນໃສ່ການຖ່າຍທອດຄວາມຮູ້ ຈາກພາກວິຊາການລົງສູ່ຊຸມຊົນ ເພື່ອໃຫ້ຊາວກະສິກອນສາມາດນຳເອົາບັນດາຄວາມຮູ້ ແລະ ຫລັກການດ້ານກະສິກຳສະອາດ ໄປປະຍຸກໃຊ້ໃນການຜະລິດຕົວຈິງ ແລະ ລິເລີ່ມກ້າວເຂົ້າສູ່ລະບົບການຜະລິດທີ່ປອດໄພ, ມີຄຸນນະພາບ ແລະ ເປັນມິດຕໍ່ສິ່ງແວດລ້ອມ. ສໍາລັບເນື້ອໃນທີ່ນໍາມາຝຶກອົບຮົມດັ່ງກ່າວ ປະກອບມີມາດຕະຖານກະສິກຳທີ່ດີ (GAP), ລະບົບຄວບຄຸມພາຍໃນ (ICS), ການເຮັດນໍ້າໝັກຈຸລິຊີ, ວິທີເຮັດຝຸ່ນຊີວະພາບ ແລະ ການນຳຄວາມຮູ້ໄປປະຍຸກໃຊ້ໃນສວນຜັກຂອງຕົນເອງ.
ກະສິກຳສະອາດ ແມ່ນລະບົບການຜະລິດທີ່ຫລຸດຜ່ອນ ຫລື ຫລີກເວັ້ນການໃຊ້ສານເຄມີເຊັ່ນ: ປຸຍເຄມີ, ຢາຂ້າຫຍ້າ ແລະ ຢາປາບສັດຕູພືດ ໂດຍຫັນມາໃຊ້ປຸຍອິນຊີ, ການຄວນຄຸມສັດຕູພືດແບບປະສົມປະສານ ແລະ ການຮັກສາຄວາມອຸດົມສົມບູນຂອງດິນຕາມທຳມະຊາດ ຊຶ່ງຊ່ວຍໃຫ້ສຸຂະພາບຊາວກະສິກອນ ແລະ ຜູ້ບໍລິໂພກປອດໄພຈາກສານພິດຕົກຄ້າງ; ຫັນມາໃຊ້ວັດຖຸດິບໃນທ້ອງຖິ່ນເຊັ່ນ: ການເຮັດປຸຍໝັກ ແລະ ຢາປາບສັດຕູພືດຊີວະພາບ ຊ່ວຍຫລຸດການຊື້ປຸຍເຄມີລາຄາແພງ ແລະ ດິນບໍ່ເສື່ອມໂຊມ, ນ້ຳບໍ່ເປັນພິດ ແລະ ຄວາມຫລາກຫລາຍທາງຊີວະພາບໃນທຳມະຊາດກັບຄືນມາສົມບູນຂຶ້ນ.
ການຜະລິດກະສິກຳສະອາດ ຍັງເປັນການສ້າງຄວາມໝັ້ນຄົງທາງອາຫານ ບໍ່ໄດ້ໝາຍເຖິງພຽງແຕ່ການມີອາຫານພຽງພໍ ແຕ່ໝາຍເຖິງການມີອາຫານທີ່ປອດໄພ ບໍລິໂພກຕະຫລອດປີ. ເມື່ອກະສິກອນຮູ້ຈັກວິທີປູກຝັງທີ່ຫລາກຫລາຍ ແລະ ປອດສານພິດ ຈະເຮັດໃຫ້ຄອບຄົວ ກໍຄື ສັງຄົມມີຜົນຜະລິດສະບຽງອາຫານທີ່ສະອາດກິນໄດ້ຕະຫລອດປີ. ນອກຈາກນີ້, ຍັງເປັນການສ້າງລາຍຮັບທີ່ໝັ້ນຄົງຈາກຜົນຜະລິດກະສິກຳສະອາດ ເພາະມີລາຄາສູງກວ່າ ແລະ ເປັນທີ່ຕ້ອງການຂອງຕະຫລາດ ຊ່ວຍໃຫ້ຊາວກະສິກອນມີລາຍໄດ້ເພີ່ມຂຶ້ນ ແລະ ກ້າວໄປສູ່ການຫລຸດຜ່ອນຄວາມທຸກຍາກເທື່ອລະກ້າວ.
ສໍາລັບການຝຶກອົບຮົມ ເຂົ້າຮ່ວມໂດຍ ທ່ານ ປາລະມີ ສົນບຸດຕະແສນ ຮອງຫົວໜ້າພະແນກກະສິກໍາ ແລະ ສິ່ງແວດລ້ອມ ແຂວງບໍ່ແກ້ວ, ມີຜູ້ຕາງໜ້າຈາກສູນກະສິກຳສະອາດ ແລະ ຊາວກະສິກອນ ຊຶ່ງກິດຈະກຳດັ່ງກ່າວ ໄດ້ຮັບການສະໜັບສະໜູນຂອງ ໂຄງການ FARM ແລະ ກົມປູກຝັງ, ກະຊວງກະສິກຳ ແລະ ສິ່ງແວດລ້ອມ.
(ແຫລ່ງຂໍ້ມູນ: ໜັງສືພິມແຂວງບໍ່ແກ້ວ)
KPL
